A Xikombiso Xa Lezaku Hi Na Ni Kukholwa Ka Hombe!

1. Hi zihi a zikarato lezi Jesu a zi wulileko na ka ha hi mahlweni?

¹ A vapostoli va wa ingisela khwatsi a xikhati lexi Jesu a nga wulawula xungetano hi kuvakona kakwe ni kugumesa ka mafambisela ya zilo. A vanhu va wa ta welwa hi zikarato — tiyimpi, tindlala, kutsekatseka ka misava, mitungu. Hi kulanzela, Jesu i wulile lezaku a valanzeli vakwe va wa ta vengiwa, va nyikelwa kuxanisekeni, ni ku dawa. Ku wa ta huma vaprofeti va mawunwa, va pengisa votala. A liranzo la vanyingi li wa ta titimela.

2. Hikuyini a kuxumayelwa ka mahungu yo saseka misaveni yontlhe ku hi nchumu wo hlamalisa?

² Hi kota ya zikarato lezo, a vapostoli va hlamalile nguvu a xikhati lexi Jesu a gumesileko a wula lezaku a mahungu yo saseka ya Mufumo wa Nungungulu ma wa ta kanelwa misaveni yontlhe. (Mat. 24:3-14) Inyamutlha ha wona a kutatiseka ko hlamalisa ka xiprofeto lexo xo tsakisa. Hambu lezi hi hanyako zikhatini zo biha nguvu, a Timboni ta Jehova ti huwelela a mahungu yo saseka hi kuchivirika. A xikhati lexi a liranzo la tiko li titimelako, a liranzo la hina li ya li kufumela nguvu. Hambu lezi hi vengiwako hi “matiko wontlhe,” ha xumayela laha ka kuza hi hi kusuhani ni ku eneta matiko wontlhe.

3. Hi yihi a mitsengo leyi yi ku tiyisako hlana lomu ka mubiko wa misava yontlhe?

³ A hi kutiyisa ka zona hlana a ku kambisisa ntiro lowu a Timboni ta Jehova ti wu mahileko nzeni ka lembe ga ntiro gi hunzileko kota lezi wu kombiswako lomu ka maphajina 3 kuya ka 6! Hi 16 wa malembe ya ku lanzelana, ku mbhetilwe a kuhunza biliyoni yinwe ya tihora ntirweni wa kuxumayela ni ku maha vapizani. Lexo hakunene xikombiso xa lezaku a Timboni ta Jehova ti na ni kukholwa ka hombe! Ku vile ni kuengetela ka 5,8 wa tipursento hehla ka hlayo ya maphayona, 3,1 wa tipursento ka vahuweleli, ni 4,4 wa tipursento hehla ka hlayo ya zigonzo za Biblia. A hlayo ya lava va bapatizilweko yi kwelile hi 20,1 wa tipursento hehla ka hlayo ya lembe ga ntiro ga nwecemu. Za tsakisa nguvu a ku wona lezaku kusuhani ka ntlhanu wa timiliyoni ni timbiri ta vanhu va tirela Jehova hi kutsumbeka​ — ⁠ku nga hlayo leyi makunu yi hunzako tontlhe ti vileko kona matinwini ya vanhu! A xikhati lexi u kambisisako a maphajina 3 kuya ka 6, zini lezi u zi wonako na zi ku tiyisa nguvu hlana?

4. Zikarato muni lezi a wanuna wo kari a zi hlulileko a xikhati lexi a nga ti karatela ku bapatizwa?

⁴ Hambu lezi a mitsengo leyo yi hlamalisako, a hi faneli ku rivala lezaku yona yi yimela vanhu lava va kombisileko a kukholwa kabye. Wona a xikombiso xinwe. Guillermo i pswalelwe tikweni ga Bolivia hi 1935. I sangulile ku tira lomu masinwini ya coca (muri wo lahlisa mapimo) na a hi ni ntlhanu wa malembe ni mune. Kusukela wunwananeni, yena i wa cakunya a matluka ya coca lezaku a hungula hlomulo lowu a nga hi ka wona wa ku maha ntiro wo binza. Hi nzhako ka xikhati i wa delela byala a tlhela a dzaha masigari. A xikhati lexi a nga sangula ku gonza lezi Jehova a zi lavako ka yena, Guillermo i lo nyima ku dzaha a tlhela a tsika ku delela byala. A xikarato xa hombe ku wa hi ku tsika a tolovelo wakwe wa wutomi gontlhe wa ku cakunya a matluka ya coca. Yena i khongelile hi kuphindaphinda a guma a hlula a tolovelo lowo. A xikhati lexi a nga tsika zontlhe lezi zi nga mu maha khumbi, i lo bapatizwa. Yena i ngalo: “Zalezi nzi tizwa na nzi basile ni ku tsaka nguvu.”

5. Hi kwihi a kuxuva ka wena?

⁵ Hakunene Jehova wa khatala hi vanhu. A kuranza kakwe hi lezaku vontlhe va hunzuluka. (2 Ped. 3:9) Hinawu hi xuva zalezo. Ngha a timbilu ta hina ti hi kuca a ku maha zontlhe hi zi kotako lezaku hi simama ku vuna vanhu va timbilu ti nene lezaku va tiva Jehova va tlhela va mu ranza a ku fana na hina.