Kuvuxeta Ka Xikola Xa Wutireli Ga Nungungulu
A ziwutiso lezi zi lanzelako zi ta kambisiswa ka Xikola Xa Wutireli Ga Nungungulu ka viki gi sangulako hi 28 ka Abril wa 2008. Hi 30 wa timeneti, a muwoneleli wa xikola i ta fambisa a kuvuxeta ku seketelwako ka timhaka ti gonzilweko ka ziavelo za maviki ya 3 ka Março kala 28 ka Abril wa 2008.
MATSHAMELA YA WUKANELI
1. Hikuyini zi hi za lisima a ku tirisa timhaka leti hi avelweko tona lezaku hi longisela tikanelo ta hina, niku xana lezo hi nga zi mahisa kuyini? [be p. 234 nzi. 1–p. 235 nzi. 1]A ku tirisa timhaka leti hi avelweko tona lezaku hi longisela tikanelo ta hina zi kombisa xichawo hi “zakuga hi xikhati xi faneleko” lezi hi zi kumako hi kutiriswa ka “nanza gi tsumbekileko ni go tlhariha.” (Mat. 24:45) Lezaku hi kota ku ti tirisa khwatsi a timhaka leti hi avelweko tona zi lava lezaku hi ti kambisisa khwatsi zinwe ni mitsalo leyi yi nga nzeni ka tona. Zonake hi nga ha hlawula a timhaka-tshinya timbiri kutani tinharu leti ti ta nga gonzisa vaingiseli va hina hi tlhela hi ti karatela ku ti anzisa ni ku ti tlhamusela khwatsi.
2. Hikuyini a ziwutiso zi hi za lisima nguvu a xikhati lexi hi gonzisako? [be p. 236 tinz. 1-5]A ziwutiso zi kuca vanhu lezaku va wula lezi va zi alakanyako. Zi vuna vanhu lezaku va ehleketa va tlhela va wula a mawonela yabye wutsumbu. Lezo zi nga ha hi vululela lungelo ga ku tlhamusela a zinene za Biblia. (Miti. 8:30, 31)
3. Xana a ziwutiso zi nga va vunisa kuyini a vaingiseli va hina lezaku va alakanyisisa hi mhaka leyi hi bhulako hi yona? [be p. 237 nzi. 3–p. 238 nzi. 1]Hi ku pimanyisa Jehova, ha zi kota ku tirisa ziwutiso kasi ku vuna vanhu lezaku va wona a kuzwisiseka ka zinene lezi hi va gonzisako. (Mala. 1:2-10) Hi xikombiso, a xikhati lexi hi fambisako a xigonzo xa Biblia, hi nga ha maha ziwutiso zo kota lezi: Hi kwihi a kuzwanana ku nga kona xikari ka mhaka leyi hi wulawulako hi yona zalezi ni leyi yinwani hi sinako hi yi gonzile? Hikuyini a mhaka leyi yi hi ya lisima? Xana yi fanele ku gi khumbisa kuyini a wutomi ga hina? A ziwutiso zo fana ni lezo zi vuna a zigonzani za hina a ku tirisa a ‘wuzikoti ga zona ga kualakanya.’ (Rom. 12:1, Tradução do Novo Mundo)
4. A xikhati lexi hi gonzisako, hikuyini a kutirisa khwatsi ziwutiso ku hi ka lisima kasi ku humesa a kutizwa ka le nzeni ka loyi hi wulawulako naye? (Mav. 20:5; Mat. 16:13-16; Jo. 11:26) [be p. 238 tinz. 3-5]A xikhati lexi a vanhu va hlamulako ziwutiso, za koteka ku ngha va wula ntsena lezi va alakanyako ku hi zona hi lavako ku zizwa. Kanilezi kasi ku vuna nguvu a vanhu, hi fanele ku ti karatela ku pola a kutizwa kabye ka lisine hi ku tirisa ziwutiso zo fana ni lezi Jesu a zi tirisileko kota lezi zi tsalilweko ka Mateu 16:13-16 ni ka Johani 11:26.
5. Hi lihi lisima la ku tirisa mifananiso a xikhati lexi hi gonzisako? (Gen. 22:17; Jer. 13:11) [be p. 240 tinz. 1-3]Hi magezu ma tsongwani ntsena, ha zi kota ku maha mufananiso wo zwala wu kokako kupima, wo tlhotlha maalakanyo, wu tlhela wu kuca munhu lezaku a kombisa kutizwa kakwe. A Biblia gi na ni mifananiso yo tala. Hi xikombiso, a munhu loyi a gonzako a Mhaka ya Nungungulu hi kukhanzakanya i “fanana ni sinya yi byelweko kusuhi ni micongo ya mati,” niku a wakubiha i “khwatsi i nghala” leyi yi tumbelako na yi xiyelela ku khoma xo kari. (Tis. 1:3; 10:9) Ka zikhati zo kari, zi nga ha vuna a ku komba lisima la mufananiso hi ku engetela a tlhamuselo wo koma.
XIAVELO N.° 1
6. Hi wahi a matshinya yo kari ya milayo ma khanyiswako bhukwini ga Marku lawa ma nyikako wurangeli legi gi ta nga hi vuna lezaku hi kuma wutomi hasi ka Mufumo wa Nungungulu? [bsi08-1 p. 8 nzi. 32]A Ivangeli ya Marku yi khanyisa a xilaveko xa kutikarata, ku cica ka hombe nguvu loku zi laveka lezaku hi nga khunguvanyeki, ni lezaku hi ti tsongahata hi tlhela hi vumela ku gonzisiwa a ku fana ni nwanana. (Mar. 8:35; 9:43-48; 10:13-15) Yi tlhela yi yisa kupima ka lezi zi karatisako zona ka lava va fumileko a ku “enghena mufunweni wa Nungungulu.” (Mar. 10:23-25) Lexi xi nga xa lisima nguvu a ku hunza minyikelo ya tsanza-vahlayi ku hlayisa a milayo yimbiri ya hombe ka yontlhe.
7. Xana a moya wa ku basa wu ma vunisa kuyini a malanza ya Nungungulu nyamutlha? (Joh. 14:25, 26) [be p. 19 tinz. 2-3]A moya wa ku basa a wu cheli zilo maalakanyweni ya hina lezi cima hi nga hi nga zi gonzangiko, kanilezi wu tira kota muvuneteli, wu hi alakanyisa a zilo za lisima lezi hi gonzileko masiku nzhako.
8. Hi gihi a bhinzu ga hombe ka wontlhe legi hi gi kumako hi kulera? [be p. 21 nzi. 3]A kulera ku nga hi vuna lezaku hi “kuma wutivi ga Nungungulu.” (Mav. 2:5) Hi mawulela yo tsema, a kukula ka hina hi tlhelo ga moya ku khegela ka ku lera a Mhaka ya Nungungulu. A tindlela to tala leti hi mu tirelako ha tona Nungungulu tonawu ti patsa kulera. Hi lera a Biblia ni mabhuku ma seketelwako ka gona lomu mitlhanganwini ya hina ya bandla ni le wutirelini ga simu.
9. Xana a kugonza ku patsa yini? [be p. 27 nzi. 3–p. 28 nzi. 1]A ku gonza a zi wuli ku lera ntsena. Zi patsa ku kambisisa a mhaka hi wukheta ni hi kuetileko. Zi patsa ku kambisisa khwatsi lezi hi gonzako hi tlhela hi zwisisa a ku hikuyini a mhaka yo kari yi tlhamuselwe hi ndlela leyo. A ku gonza zi patsa kambe ku alakanyela hi tlhamuselo wa lezi hi lerako, lezi zi tlhamuselako zona xungetano hi Jehova zinwe ni kungo gakwe, ni ndlela leyi zi nga hi vunako ha yona a ku hambanyisa xikari ka lezi za zi nene ni zo biha, a ku fana ni ndlela leyi hi nga tirisako ha yona lezi hi zi gonzako ni ku zi tirisa kasi ku vuna vanwani.
10. Xana a Ivangeli ya Luka yi akisa kuyini kutsumba xungetano hi kuva a Mitsalo ya xiHeberu yi pimiselwe hi Nungungulu? [bsi08-1 p. 10 nzi. 30-1]A Ivangeli ya Luka yi nyika zikombiso zo tala za ziprofeto za Mitsalo ya xiHeberu lezi zi tatisekileko hi kutsumbeka, kota lezi zi nga woniwako hi ku ringanisa Luka 4:17-19 na Isaya 61:1, 2; ni ku ringanisa Luka 18:32, 33 na Tisimu 22:7; Isaya 50:6; 53:5-7; na Jona 1:17. A magezu ya Jesu ma tsalilweko ka Luka 24:44, 45 ma tiyisa lezaku a Mitsalo ya xiHeberu yi pimisilwe hi Nungungulu.
KUGONZA KA BIBLIA KA VIKI NI VIKI
11. Hikuyini Jesu a kawukile wanuna wo kari hi ku Mu vitana “Mugonzisi wa nene”? (Mar. 10:17, 18) [w08 15/2 “A Palavra de Jeová É Viva — Destaques do livro de Marcos”]Hi ku ala ku vumela a vito lego ga wudzunzo, Jesu i yisile wudzunzo ka Jehova a tlhela a kombisa lezaku a Nungungulu wa lisine hi yena a nga munyiki wa zilo zontlhe zo saseka. Hi kuengetelekileko, Jesu i yisile kupima zineneni za lisima za lezaku a Muvangi hi yena yece a nga ni fanelo ya ku yimisa milayo xungetano hi za zi nene ni za kubiha.
12. Xana Jesu i tirisile a sinya ya nkuwu kasi ku fananisa yini xungetano hi tiko ga Israeli? (Mar. 11:12-14, 20, 21) [w03 15/5 p. 26 tinz. 2-3]Kota lezi a makuwu yo sangula ma pswaliwako khati ginwe ni matluka — niku zikhati zinwani ma rangela matluka — a mhaka ya kuva a sinya leyo yi hi ni matluka kanilezi na yi nga hi na mihanzu yi kombisile lezaku yi wa nga vuni nchumu. A ku fana ni lezi a sinya ya nkuwu leyi yi nga pswaliko mihanzu yi nga woneka ku khwatsi yi wa hanya khwatsi, a tiko ga Juda gi wahi ni xiyimo xo khohlisa. Kanilezi gona gi wa nga hanyi hi kuyelana ni kuranza ka Nungungulu, niku hi kugumesa gi alile a N’wana wa Jehova ha yece. Jesu i rukatele a sinya ya nkuwu leyi yi nga pswaliko mihanzu, niku hi manziko wa kona, a vapizani va lo wona lezaku a sinya ya nkuwu yi wa womile. A sinya leyo yi womileko yi wa yimela hi kufaneleko a kualiwa ka vaJuda hi Nungungulu kota vanhu vakwe va hlawulilweko, loku ku nga ha hi mahlweni.
13. Xana ma wa tlhamusela yini a magezu lawa a ngelosi Gabrieli yi nga ma tirisa a xikhati lexi yi nga wula lezaku Maria i wa ta “xura nyimba” kota wuyelo ga kuva a moya wa ku basa wu tile hehla kakwe ni kuva a ntamu wa Nungungulu wu mu fenengetile? (Luka 1:30, 31, 34, 35) [w08 15/3 “A Palavra de Jeová É Viva — Destaques do livro de Lucas”; it-2 p. 538 nzi. 1]Kota lezi hakunene Maria a xurileko nyimba, zi wonekisa ku khwatsi Jehova i mahile lezaku a tanza ga lomu khwirini ga Maria gi xura, a maha lezo hi ku rurisa a wutomi ga N’wana wakwe wa matewula wutshanwini ga zivangwa za moya ata misaveni. (Gal. 4:4) Ntsena hi ndlela leyi zi wa ta koteka lezaku a n’wana loyi a nga wa ta pswaliwa a simama kuva munhu yaloyi wa munwe a hanyileko le tilweni kota Gezu, niku ntsena hi ndlela leyi i wa tava n’wana wa lisine wa Maria niku hikwalaho ava zukulu wa lisine wa vakokwani vakwe Abrahama, Isaka, Jakobe, Juda, na Hosi Davida ni kuva xiga-tshomba xa nayo xa zitsumbiso za Nungungulu lezi zi mahelweko vona. (Gen. 22:15-18; 26:24; 28:10-14; 49:10; 2 Sam. 7:8, 11-16; Luka 3:23-34)
14. Xana a vapizani va Jesu hakunene va wo maha ‘lezi zi nga faneliko ku mahiwa hi siku ga sabado ke’? (Luka 6:1, 2) [gt 31]Ahihi, va wa nga tshovi a nayo wa Jehova wa Sabado. A Vafarisi va wa wula lezaku a ku tshova mavele ni ku ma hloswa lomu mandleni lezaku vaga zi wa fana ni ku tshovela u tlhela u hula. Kanilezi a kutlhamusela kabye ko binza ka lezi va zi tekileko kota ntiro, zi mahile a Sabado giva nzhwalo, kuveni gi wa fanele kuva xikhati xo tsakisa ni xi akako hi tlhelo ga moya. Hizalezo, Jesu i kanetile a kulumbetwa loko hi ku tirisa a zikombiso za lomu Mitsalweni kasi ku komba lezaku Jehova Nungungulu cima a nga lavangi lezaku a nayo Wakwe wa Sabado wu tiriswa hi ndlela leyo yo hunzeletwa. (Mat. 12:3-5)
15. Hi xihi a xigonzo lexi hi xi kumako ka wusungukati ga Jesu ka Marta? (Luka 10:40-42) [w99 1/9 p. 31]Hontlheni hi fanele ku ‘hlawula a xiavelo xo saseka’ hi ku rangisa a zilo za moya. Loku hi tiyiseka hi zilo lezi zi nga za lisima, hi ta kuma a tipswalo ni makatekwa ya Jehova. (Fil. 1:9-11)