Ngha “Muva Ni Kubonga”
1 A xikhati lexi Jesu a nga hanyisa a khume ga vavanuna va nga hi ni hlokonho, munwe ntsena xikari ka vona loyi a wuyileko a ta mu bonga. Jesu i lo wutisa, aku: “Xana a va basiswangi hi wukhume gabye ke? Lava va ntlhanu ni mune va kwihi ke?” (Luka 17:11-19) Hakunene za lisima nguvu ka hina a ku tsakela hi tlhela hi kombisa kubonga a zinyikiwo zontlhe zo saseka ni zinyikiwo zontlhe zi mbheleleko zi tako hi ka Dadani wa hina wa wuhana ni wa liranzo, Jehova Nungungulu! — Kol. 3:15; Jak. 1:17.
2 Hi zihi a zilo zo kari lezi hi faneleko ku kombisa kubonga hi kota ya zona? Hi bonga a nzhiho, ku nga xinyikiwo xa hombe ka zontlhe za Nungungulu ka vanhu. (Joh. 3:16) Hi bonga Jehova kambe hi lezi a hi kokelako ka yena. (Joh. 6:44) A wumunwe ga hina ga wuKristu xigelo xinwani xa lezaku hi bonga. (Tis. 133:1-3) Handle ko kanakana wa alakanya a zinyikiwo zinwani zo tala zi tako hi ka Jehova. Cima a hi lavi ku fana ni vaIsraeli va nga bongiko, lava va nga rivala a mitiro leyi Jehova a va maheleko yona! — Tis. 106:12, 13.
3 Kombisa Kubonga: Hambu lezi zi kotekako ku ngha vontlhe a vavanuna lavayani va khume va tsakele lezi Jesu a va maheleko, munwe ntsena a kombisileko kubonga. (Luka 17:15) Hi kufanana, hinawu hi kombisa kubonga hi ku hlengela wutirelini hi kuhiseka. Loku hakunene hi tsakela zontlhe lezi a Dadani wa hina wa liranzo wa le tilweni a hi mahelako, a timbilu ta hina ti ta kuceka ku pimanyisa a liranzo ni wuhana gakwe hi ku byela vanwani xungetano hi yena. (Luka 6:45) Hi tlhelo ginwani, a xikhati lexi hi bikelako vanwani a ‘mitiro yi hlamalisako ya Jehova zinwe ni makungo yakwe ha hina,’ a liranzo ni ku mu bonga ka hina Jehova ziya zi kula. — Tis. 40:5.
4 Kuca Vanwani Lezaku Va Kombisa Kubonga: Hi fanele ku lava tindlela ta ku vuna vana va hina ni zigonzani za hina za Biblia lezaku ziva ni kubonga. A vapswali va na ni zikhati zinyingi za ku maha lezo, zo kota loku va cuwukela a zivangwa za Jehova ni vana vabye. (Rom. 1:20) A xikhati lexi hi fambisako xigonzo xa Biblia, hi nga ha wutisa a xigonzani xa hina, hiku: “Xana lezi zi hi byela yini xungetano hi wumunhu ga Jehova?” A xikhati lexi a kubonga ka xigonzani ku yako ku kula, a liranzo la xona ha Nungungulu ni kutiyimisela ka xona a ku mu tsakisa zonawu zi taya mahlweni zi kula.
5 Masikwini lawa yo gumesa, a kutala ka vanhu hi lava va nga kombisiko kutsakela ni va nga bongiko. (2 Tim. 3:1, 2) A zo ku mu tsakisa Jehova a ku wona malanza yakwe ma ti hendleletileko na ma kombisa kubonga hi ku hlengela hi kuhiseka wutirelini! — Jak. 1:22-25.