Zikhumbuxeto Za Gotsovanyano Wa Muganga

◼ Zikhati Za Longoloko: Ka masiku wontlhe ya manharu, a longoloko wu ta sangula hi ma 8:20. A tivati ti ta vululiwa hi ma 7:​00. Loku a wucenje go vulula gi sangula, hontlheni hi fanele ku tshama kasi a longoloko wu sangula hi ndlela yi nene. Hi wa Wuntlhanu ni Mulongiso, a longoloko wu ta gumesa hi ma 15:​55 niku hi Sonto wu ta gumesa hi ma 15:00. Hi kombela lezaku hontlheni hi simama hi tshamile anzhako ka drama kasi hi ingisela a xipanze lexi xi seleko nzeni ka longoloko wa Sonto ni gambo.

◼ Wutshamu Go Veka Mimova: Ka matshamu wontlhe lawa ku mahiwako gotsovanyano na hi hi ni wutshamu ga hina go veka mimova, ku nga ta hakhelwa nchumu niku a mimova yi ta vekiwa hi xaxameto hi kuya hi loyi a rangako a chikela. A makaraxa hi wona ma to tira kota xikombiso xa lezaku wa faneleka a ku veka mova laho ke.

◼ Ku Vekisa Wutshamu: A wutshamu gi nga ha vekiselwa a vanhu lava u fambako navo moveni wunwe kutani lava u tshamako navo mutini wunwe.

◼ Zifihlulo: Mahani wuxinji mu neha a zifihlulo hi kaya kasi mu nga suki wutshanwini ga gotsovanyano lezaku mu ya xava kutani ku ya teka zakuga hi xikhati xa kuhumula ka ni hlikanhi. Mu nga tirisa minzhava yi tsongwani yo hlayisa zilo na zi titimela leyi yi enelako ku vekiwa lahasi ka xitulo. A minzhava ya hombe nguvu, a zibya za vidro, ni mabyala a zi vumelelwi wutshanwini ga gotsovanyano. A ku na munhu a vumelelwako ku xavisa zakuga laha wutshanwini ga gotsovanyano.

◼ Minyikelo: Hi nga kombisa ku bonga a malulamiselo ya gotsovanyano hi ku maha a minyikelo ya kutiranzela yi yako ka ntiro wa misava yontlhe laha Salawu ya hina ya Mufumo kutani le gotsovanyweni. A minyikelo yontlhe yi mahiwako hi xeke yi fanele ku tsaliwa lezaku yiya ka “Associação das Testemunhas de Jeová de Moçambique.”

◼ Timhango Ni Timhaka Ta Xihatla: Loku ku humelela mababyi ya xitshuketi wutshanwini ga gotsovanyano, maha wuxinji u byela a mukombeteli a nga laha kusuhani, loyi a ta nga tivisa a Xipanze Xa Ku Lamulela Timhango kasi lava va tirako lomo va tiva wuhombe ga xikarato lexo lezaku va nyika xivuno.

◼ Zimovana Zo Khileta Zivanana: A zimovana zo khileta zivanana a zi faneli ku tisiwa wutshanwini ga gotsovanyano. Hambulezo, a zitulwana zi nga vekiwako kusuhani ka vapswali za vumelelwa.

◼ Maformulario Queira Visitar: Ku fanele ku tiriswa a maformulario Queira Visitar (S-43) kasi ku nyika mahungu xungetano hi munhu wihi ni wihi loyi a kombisako kutsakela kota wuyelo ga kuxumayela ka hina ka xitshuketi hi xikhati xa gotsovanyano. A vahuweleli va fanele ku neha a formulario ginwe kutani mambiri ya Queira Visitar laha gotsovanyweni. A maformulario lawa ma tatisilweko ma fanele ku yiswa ka Xipanze Xa Mabhuku kutani ka matsalani wa bandla ga wena loku mu wuyile hi gotsovanyweni. — Wona a Nosso Ministério do Reino ga Fevereiro wa 2005, p. 6.

◼ Malulamiselo Ya Wutshamu Go Etlela: Kasi a gotsovanyano wa muganga wu famba khwatsi, ka mahiwa mitiro yo tala. A wunwe wa yona wu yelana ni ku lulamiselela wutshamu a vamakabye, ku ngava lava va tako voce kutani lava va tako hi mingango. Hi lisine, a Xipanze Xa Ku Rurela Vapfhumba xi sangula ku tira a gotsovanyano na wa ha hi kule nguvu kasi ku maha malulamiselo ya ku khatalela vontlhe lava va kombelako wutshamu go etlela. A malulamiselo lawo ma engetela a litsako la kuva zinwe kota maKristu.

Hambulezo, kota lezi hi lavako lezaku a “zilo zontlhe zi mahiwa hi fanelo ni nayo,” ni lezaku ku patseka a kutshamiseka ka vanwani, ka laveka a zikhumbuxeto zo kari. Lava va ta ngava vapfhumba mutini wa makabye wo kari, va fanele ku eneliswa hi lezi va nyikwako va tlhela va maha lezi va kombeliwako. Tiyiseka kambe lezaku wa siya a yindlu na yi basile a siku ni siku legi u yako gotsovanyweni zinwe ni siku go gumesa legi u ta nga suka laha mutini wa makabye. A kuva mupfhumba mutini wa makabye a zi suseli munhu a wutihlamuleli ga ku ti lavela a zakuga zakwe wutsumbu ni mali yo khilela hi yona mova. Hikwalaho, a munwe ni munwani i fanele ku maha malulamiselo yakwe mhakeni leyi. A ku tirisana ni nwinyi wa muti mhakeni leyi zi ta maha lezaku a kombisa a kururela ka yena vapfhumba hi kuziranza, na ku nga hi hi kukurumetwa. Lezo zi maha lezaku a “zilo zontlhe zi mahiwa hi fanelo ni nayo.” A tshinya legi ga nayo gi tira kambe ka lava va ta nga etlela laha a gotsovanyano wu ta nga mahelwa kona, vonawu va fanele ku tirisana ni vakombeteli lezaku va siya a wutshamu ga gotsovanyano na gi basile siku ni siku. — 1 Kor. 14:40.