A Titshomba Leto Ti Ngava Ta Wena!
1. Hikuyini u faneleko ku alakanyela a ntiro wa wuphayona ga xikhati xontlhe?
1 Xana wa zi lava kuva ni litsako la hombe ni kuxalala wutomini ga wena? Xana wa tizwa khwatsi ni ku eneliswa a xikhati lexi u vunako vanwani? Xana wa zi lava ku engetela a ntiro wa wena ka Jehova? Loku a hlamulo wa wena wu hi ina ka xinwe xa ziwutiso lezo, u fanele ku alakanyela a ntiro wa wuphayona ga xikhati xontlhe. Hi lisine, a ngango ni wutihlamuleli ginwani gi seketelwako hi Mitsalo, zinwe ni mababyi kutani kutsanzeka kunwani, zi fanele ku alakanyelwa.
2. Kumbuka a makatekwa yo kari ya moya lawa ma kumiwako hi maphayona ya xikhati xontlhe.
2 A mitsalo ya Solomoni leyi yi pimisilweko hi Nungungulu yi zwananisa a makatekwa ya Jehova ni titshomba ta nyama. (Mav. 10:22) Inyamutlha, a makatekwa ya Jehova ma neha nguvunguvu a titshomba ta moya. A titshomba leto ti maha hi ku halakela kunene ka lava va nga maphayona ya xikhati xontlhe. Hi xikombiso, vona va kuma litsako la hombe hi ku nyika vanwani, hi ku ‘xava a xikhati’ lexi va nga wa ta xi tirisela ku maha zilo zabye wutsumbu. (Kol. 4:5, Tradução do Novo Mundo; Miti. 20:35) Jehova wa wu wona niku wa wu tsakela nguvu a ntiro lowu va wu mahako hi kutikarata ni liranzo. A ‘titshomba leto ta le tilweni’ ti nga ta tshuka ti mbhelelwa hi lisima. (Mat. 6:20; Maheb. 6:10) Hi kuengetela, a xikhati lexi a maphayona ma hlayisako a ‘tihlo ga wona na gi cuwuka hi kutshonometa’ ma tlhela ma tsumba Jehova lezaku a enelisa zilaveko za wona, a kuzwanana ka wona na yena kuya mahlweni ku tiya. — Mat. 6:22, 25, 32 NM; Maheb. 13:5, 6.
3. Hi kwihi a kuhambana ku nga kona xikari ka ku ti karatela ku kuma titshomba ta moya ni ku ti karatela ku kuma a titshomba ta nyama?
3 A ku ti nyiketela titshombeni ta nyama zikhati zinyingi ku yisa “kumbilukeleni kunyingi ka wupumbu ku bayisako.” (1 Tim. 6:9, 10; Jak. 5:1-3) Lezo cima a zi maheki ka lava va kumako a zikatekiso za Jehova. Kota lezi a maphayona ya xikhati xontlhe ma mbhetako xikhati xa wona xo tala wutirelini, lezo zi ma vuna a ku veka kupima ka wona ka zilo lezi zi nga za lisima nguvu. (Fil. 1:10) A makabye wo kari i tsikile a ntiro wakwe wa wu njiniyela, lowu wu nga mu tekela xikhati xakwe xontlhe, lezaku a phayona. Yena i te ngalo: “A ntiro wa mina wa kutihanyisa wu wa nzi djudja kupima wu tlhela wu nzi mbheta ntamu. Lezo a zi maheki ka ntiro wa wuphayona. Zalezi nzi na ni lungelo go vuna vanhu nzi tlhela nzi va gonzisa a zinene. Lezo zi nzi tsakisa nguvu zi tlhela zi nzi maha nzi tizwa na nzi enelelwa.”
4. Xana a maphayona ya xikhati xontlhe ma katekisiswa kuyini a xikhati lexi ma nehako zikatekiso ka vanwani?
4 Zikatekiso Ka Vanwani: Inyamutlha, a vanhu vontlhe va yimisana ni “zikhati za zikarato.” (2 Tim. 3:1) A vanhu matshanwini wontlhe va na ni xilaveko xa xihatla xa kuva ni kutsumba. A vahuweleli va Mufumo va tsaka nguvu a xikhati lexi va vunako vanhu va kalako va nga hi na kutsumba xungetano hi wumanziko lezaku va gonza va tlhela va amukela a mahungu yo saseka. A li no ku kula a litsako leli a maphayona ya xikhati xontlhe ma li kumako hi ku mbheta a tihora to hunza 800 lembe ginwe ni ginwani ntirweni lowu wo tlhatlhisa vanhu! — 1 Tim. 4:16.
5, 6. Xini lexi xi nga ha ku vunako lezaku u kota kuva phayona ga xikhati xontlhe?
5 Xana wata na u alakanyela khwatsi xungetano hi ku tira kota phayona ga xikhati xontlhe? Lezo zi nga ha lava lezaku ‘u ti xavela a xikhati xi faneleko’ ka zilo zi nga hiko za lisima nguvu. (Efe. 5:15, 16, NM) A vanhu vo tala va mahile lezo va tlhela va hehukisa a wutomi gabye, lezi zi va vunileko a ku hungula a xikhati lexi va nga maha ntiro wabye wa kutihanyisa lezaku va tirisa xikhati xo tala zilweni za Mufumo. Xana u nga lulamisa a wutomi ga wena wutsumbu lezaku u patsana navo?
6 Kombela Jehova lezaku a ku nyika a wutlhari legi gi ta nga ku vuna ku longoloxa khwatsi a zilo za wena. (Jak. 1:5) Makatekwa muni lawa u nga rinzelako ku wuyelwa hi wona? Titshomba ta tinyingi ta moya! Jehova kambe i ta ku katekisa hi tlhelo ga nyama hi ku ku tatisela a zilaveko za wena. (Mat. 6:33) Lava va ringako Jehova hi ndlela leyi va ta amukela ‘a makatekwa yo tlhela va vumala ni wutshamu go chela kona.’ — Mala. 3:10.