Kuvuxeta Ka Xikola Xa Wutireli Ga Nungungulu
A ziwutiso lezi zi lanzelako zi ta kambisiswa ka Xikola Xa Wutireli Ga Nungungulu ka viki gi sangulako hi 25 ka Agosto wa 2008. Hi 30 wa timeneti, a muwoneleli wa xikola i ta fambisa a kuvuxeta ku seketelwako ka timhaka ti gonzilweko ka ziavelo za maviki ya 7 ka Julho kala 25 ka Agosto wa 2008.
Matshamela Ya Wukaneli
1. Xana hi nga zi kombisisa kuyini lezaku hi na ni kuringanisela a xikhati lexi hi byelako vanwani a zinene? (Fil. 4:5, Tradução do Novo Mundo) [be p. 251 nzi. 3] Hi fanele ku alakanyela a mudawuko, ziyimo, ni kutizwa ka lava hi wulawulako navo hi tlhela hi ti yimisela a ku nga kaneti zontlhe lezi va wulako. A ku tirisana ni vanwani hi ndlela leyi zi nga va vuna lezaku va amukela lezi hi wulako a xikhati lexi hi ehleketako navo hi mitsalo.
2. Xana a xikombiso xa Paule a xikhati lexi a nga wulawula ni vaGreki le Areopagu xi nga hi vunisa kuyini loku hi nyika wukustumunyu ka lava va kalako va nga kholwi ka Biblia? (Miti. 17:22, 23) [be p. 252 tinz. 1-2] A xikhati lexi Paule a nga xumayela a vaGreki le Areopagu, a nga tekelangi ku kumbuka Mitsalo. Wutshanwini ga lezo, i sangulile ku wulawula hi zilo lezi va nga kari va zi tiva ni ku zi kholwa, a guma a tirisa a zilo lezo lezaku zi va chiketa ka ku bhula hi Muvangi zinwe ni makungo Yakwe. Kota lezi a vanhu vo tala va zi lavako nguvu a ku hanya ka matshamela ma nene, hi nga ha sangula hi ku kombisa lezaku ha khatala hi lezi zi va karatako zonake hi va komba lomu ka Biblia lezi Nungungulu a ta nga lulamisisa zona a zikarato zabye.
3. Hambu loku hi tiyiseka lezaku a mawonela ya munhu loyi hi wulawulako naye a ma lulamangi, xana hi nga zi kombisisa kuyini lezaku hi na ni kuringanisela a xikhati lexi hi bhulako naye? [be p. 253 tinz. 1-2] Ka zikhati zo kari, zi nga hava chukwana a ku bonga munhu loye hi kota ya lezi a nga hi byela a mawonela yakwe hi guma hi cica bhulo hi wulawula hi zilo lezi zi ta nga mu vuna. Hi fanele ku alakanya lezaku a xiavelo xa hina ku nyika “wukustumunyu,” na ku nga hi ku kurumeta vanwani lezaku va kholwa kota lezi hina hi kholwako. (Mat. 24:14) A vanhu va fanele ku ti hlawulela ha voce lezi va kholwako, niku hina a hi lavi ku va alela a fanelo leyo.
4. A xikhati lexi hi ti karatelako ku wulawula hi kukholwisa, zini lezi hi faneleko ku zi alakanya? [be p. 255 nzi. 3, kwadru] A vanhu va nga ta kholwa kutani ku maha lezi hi va byelako loku va nga tiyiseki lezaku lisine. A mitlhamuselo ya hina yi maha ya lisima ntsena loku yi seketelwe ka Mhaka ya Muvangi wa tilo ni misava. A mabhuku ya nanza gi tsumbekileko ni go tlhariha ma hi vuna nguvu lezaku hi nyika a tlhamuselo wo zwala wa lezi hi zi kholwako.
5. Xana hi nga ku tirisisa kuyini a kupimisisa a xikhati lexi hi lavako ku khumba mbilu ya muingiseli? (Mav. 20:5) [be p. 258 nzi. 1–p. 259 nzi. 1] A munhu a nga ni kupimisisa wa khatala nguvu hi kutizwa ni lezi zi nga lomu maalakanyweni ya muingiseli wakwe. A ku chukwatisa a wuzikoti ga hina ga kucuwukisisa zonawu zi ta hi vuna. Anzhako ka ku bhula hi mhaka yo kari, hi fanele ku pola a kucica kunwe ni kunwani loku ku wonekako nghoheni ni ka gezu kutani pfumawulo wa gezu ga muingiseli wa hina.
Xiavelo n.° 1
6. Zini lezi a vamakabye va xisati va faneleko ku zi alakanya xungetano hi mahlawulela ya mavekela ya kanelo (cena)? [be p. 44 tinz. 5-6] A xikhati lexi va hlawulako a mavekela ya kanelo, a vamakabye va xisati va maha khwatsi hi ku kambisisa a mhaka leyi va ta nga wulawula ha yona, a munhu loyi va ta nga wulawula naye, ni matshamela ya wukaneli lawa va tirelako ka wona.
7. Zini lezi a vamakabye va xinuna va faneleko ku ti karatela ku zi chikelela a xikhati lexi va kombisako a timhaka-tshinya ta kugonza ka Biblia? (Neh. 8:8, NM) [be p. 47 tinz. 2-3]A kungo ga timhaka-tshinya ta kugonza ka Biblia ku tlhamusela a Mhaka ya Nungungulu, ku yi nyika mongo, ni ku maha lezaku lezi zi gonziwako zi pimeka. Ku fanele ku khanyiswa lezi a mahungu lawo ma hi khumbisako zona inyamutlha. A vamakabye va xinuna va fanele ku khongela hi mhaka leyi. Va fanele ku tiva a zilaveko za bandla va tlhela va zi khatalela hi ku dlunyatisa a matshinya ya milayo ya Biblia lawa ma nga ka zipimo lezi va avelweko.
8. Xana a makabye wa xinuna i fanele ku wu mahisa kuyini a kanelo wa Mutlhangano wa Ntiro, lowu wu lavako a mukombiso kutani kubhulisana? [be p. 50 nzi. 1] Kota lezi a mikombiso yi nga xiwonelo lexi a bandla gi faneleko ku xi pimanyisa, yi fanele ku longiselwa khwatsi. A vamakabye lava va avelwako a zipanze zi lavako mikombiso kutani kubhulisana va fanele ku zi vuxeta ni lava va ta nga maha navo mahlweni ka siku ga mutlhangano.
9. Xana a bhuku ga Mitiro gi zi dlunyatisisa kuyini lezi a ntiro wa kuxumayela wu faneleko ku mahiswa zona ni lipimo leli wu faneleko ku mahiwa ha lona? (Miti. 20:20, 21; 28:23) [bsi08-1 p. 16 nzi. 35] Paule i nyikile xikombiso hakuva yena ‘a nga lovelangi’ a ku “gonzisa kubaseni ni lomu tindlwini.” A hloko ya mhaka ya ‘wukustumunyu go mbhelela’ yi khanyiswa bhukwini gontlhe ga Mitiro.
10. Zini lezi a mukaneli wa laha kubaseni a faneleko ku maha kasi a Biblia giva tshinya ga kanelo wakwe? (Miti. 17:2, 3) [be p. 52 nzi. 6–p. 53 nzi. 2] A makabye loyi a avelweko ku veka kanelo wa laha kubaseni a nga faneli ku alakanyela a tindlela to tlhamusela a timhaka leti ti tako laha ka phepha ga kanelo ntsena. Wutshanwini ga lezo, i fanele ku pola lezi a timhaka leto ti khegelisako zona ka Mitsalo. I fanele ku siya xikhati xa ku lera, ku tlhamusela, ku kombisa, ni ku komba a matirela ya mitsalo leyi a bohako ku yi tirisa, wutshanwini ga ku veka kupima kakwe kontlhe phepheni ga kanelo ntsena.
Kugonza Ka Biblia Ka Viki Ni Viki
11. Hikuyini a murinzeli wa paxo wa le Filipi a nga “lava ku ti daya”? (Miti. 16:25-27) [w90 15/5 p. 25, kwadru] A kutsekatseka ka misava ku wa vululile a tinyangwa ta yindlu ya paxo ku tlhela ku tlhatlha a ziboho za tiperesu. A nayo wa le Roma wu wa hi wa lezaku loku a peresu yi tsutsuma, a murinzeli wa paxo i wa fanele ku kuma a tsayiselelo wa peresu leyo yi tsutsumileko. Zi wonekisa ku khwatsi a murinzeli wa paxo i wa hlawula ku ti daya wutshanwini ga kufa hi ku xanisiwa, ku nga tsayiselelo lowu kuzilava wu nga rinzela a tiperesu to kari paxweni lego.
12. Xana Aristakusi na Gaiusi va yimisanisile kuyini ni kuxaniswa? (Miti. 19:29; 20:4. 5) [w08 15/2 p. 10 tinz. 16-17] A xikhati lexi va nga kokoviselwa va ngheniswa lomu ndlwini ya mihlakano le Efesusi hi xidlemo xo zangara lexi kuzilava xi nga hi kwalomu ka makume ya mazana, Aristakusi na Gaiusi kuzilava va wa alakanya lezaku va tafa. Hambulezo, a ku na xikombiso xi tivekisako lezaku va tshukile va mbhelelwa hi kutiya-hlana. A tihweti to kari anzhako ka lezo a vavanuna lava hi wumbiri ga vona va heleketile Paule ka lienzo lakwe la wunharu la wurumiwa hambu lezi gi nga hi pfhumba gi nga veka mhangweni a wutomi gabye.
13. Ma tlhamusela yini a magezu lawa ma nge ngalo, Saule i wa “vindla mbhanya”? (Miti. 26:14) [w03 1/10 p. 32] A magezu ku “vindla mbhanya” ma tlhamusela lezi zi mahiwako hi xihari xo kari lexi xi ti bayisako ha xoce a xikhati lexi xi khavetelako a mbhanya lowu wu nga mahelwa ku xi fambisa kutani ku xi kongomiswa. Saule i wa ti bayisa ha yece hi ku xanisa a maKristu, hakuva hi ku maha lezo yena hi lisine i walwa na Nungungulu. Saule i lanzele a magezu ya Jesu, a cica mahanyela yakwe, a guma ava mupostoli Paule a ranzekako wa muKristu. Lomu ka Mutshawuteli 12:11, a wusungukati ga Nungungulu gi ringaniswa ni tipopo [‘mimbhanya,’ NM] hakuva ga zi kota ku hi kuca ni ku hi rangela hi kufaneleko loku hi gi vumelela.
14. Xana a kuonha ku wa ta xi ‘kumisa kuyini a xikhati’ hi kota ya xileletelo xa Nungungulu ka vaIsraeli? (Rom. 7:8, 11) [w08 15/6 “A Palavra de Jeová É Viva — Destaques da carta aos romanos”] A nayo wu vunile vanhu lezaku va wona zontlhe lezi zi patsekako ka kuonha, wu tlhela wu va maha va zwisisa a xiyimo xabye xa wuonhi. Kota wuyelo ga kona, a vanhu va zi wonile lezaku vona vaonhi hi tindlela to tala, niku zi wa woneka kubaseni lezaku a vanhu vo tala vaonhi.
15. Xana hi ma ‘wungeletelisa kuyini a makhala ma vurako’ hlokweni ya nala wa hina? (Rom. 12:20) [w08 15/6 “A Palavra de Jeová É Viva — Destaques da carta aos romanos”] Xikhatini xa kutsaliwa ka Biblia, a maribye ma patseneko ni tisimbi ma wa cheliwa lomu ka nzhimbo wu nga hi ni makhala hi lehehla ni lahasi. A kuhisa ko engeteleka ka makhala lawa ma nga hi lehehla ka nzhimbo ku wa vuna nguvu a ku nyekisa maribye lawo ma patseneko ni tisimbi zonake a chaka gontlhe gi huma. Hi kufanana, hi wungeletela a makhala ma vurako hlokweni ya nala hi ku mu mahela zilo za zi nene lezaku a kunonoha kakwe ku nyeka, ku guma ku huma a matshamela ya ma nene.