Kwadru Ga Ziwutiso

◼ Xana a vapswali hi wumbiri gabye va fanele ku bika a xikhati lexi va xi mbhetako xigonzweni xa ngango xo khanzakanya?

Hambu lezi ku nga vadadani va nga ni wutihlamuleli go ranga ga ku wundla a vana vabye “hi kululeka ni kulaya ka Hosi,” a vapswali hi wumbiri gabye va hlengela kugonziseni ka vana. (Efe. 6:4) A Biblia gi kuca lezi ka vana: “Nwananga, zwana gonziselelo ya dadani wa wena, u nga tsiki a nayo wa nyine wa wena.” (Mav. 1:8) A xipanze xinwe xa lisima xa gonziselelo ya vapswali xigonzo xa Biblia xa ngango.

Xikhatini xi hunzileko, ntsena a mupswali loyi a fambisako a xigonzo xa ngango wu nga ni vana va nga bapatizwangiko hi yena a nga fanele ku bika a xikhati, hambu loku a vapswali hi wumbiri gabye va hlengela kugonziseni. Hambulezo, a mhaka leyo ya ciciwa. Loku ku hi lezaku kufambeni ka xigonzo xa ngango a vapswali hi wumbiri gabye va hlengela kugonziseni ka vana, hi wumbiri gabye va nga ha hlaya a xikhati xi nga hunziko hora hi viki kota ntiro wa simu. Lisine lezaku hi tolovelo a vapswali va mbheta a xikhati xo hunza nguvu a hora hi viki na va gonzisa a vana vabye. A ku gonzisa vana zi lava mizamo ya xikhati xontlhe ka vapswali hi wumbiri gabye. (Deut. 6:6-9) Kanilezi, a mubiko wa ntiro wa simu wa hweti ni hweti wu fanele ku kombisa nguvunguvu lezi zi mahiwako sinwini. Hikwalaho, a ku faneli ku hlayiwa xikhati xo hunza hora hi viki, hambu loku a xigonzo xi hunzisa a hora, xi fambisiwa makhati yo hlaya hi viki, kutani loku a vana va gonziswa hi kuhambanyiswa. Mupswali munwe ntsena a faneleko ku bika a xigonzo xa Biblia xa ngango ni lienzo linwe lo wuyela viki ni viki legi a xigonzo xi fambiswako.