Kuvuxeta Ka Xikola Xa Wutireli Ga Nungungulu
A ziwutiso lezi zi lanzelako zi ta kambisiswa ka Xikola Xa Wutireli Ga Nungungulu ka viki gi sangulako hi 27 ka Outubro wa 2008. Hi 30 wa timeneti, a muwoneleli wa xikola i ta fambisa a kuvuxeta ku seketelwako ka timhaka ti gonzilweko ka ziavelo za maviki ya 1 ka Setembro kala 27 ka Outubro wa 2008.
MATSHAMELA YA WUKANELI
1. Xana hi nga xi tivisa kuyini lexi xi mahako a vanhu vanwani va kholwa ka mhaka yo kari? [be p. 259 tinz. 2, 3] A ku tiva lezi zi nga mbilwini ya munhu munwani zi lava xikhati niku a zi faneli ku mahiwa hi matloti. A ziwutiso za vuna. Hi nga ha mu wutisa: “Xana u ti zwisa kuyini hi . . . ?” “Xini xi ku kholwisako lezaku . . . ?” kutani “Zini u nga wa ta maha loku . . . ?” Na hi nga se ringeta ku lulamisa a mawonela yakwe ma nga lulamangiko, hi fanele ku zama ku zwisisa lexi xi mu mahako a tizwa hi ndlela yo kari. Loku a vaingiseli va hina va zi wona lezaku ha va zwisisa, va ta byekelela nguvu ku nyika lisima lezi hi va byelako.
2. Xana hi nga vunisa kuyini a munhu lezaku a susa xihlawulela ni livengo lomu mbilwini yakwe? [be p. 260 nzi. 2] A munhu a nga ni xihlawulela ni livengo i fanele ku gonza ku wona vanwani, a ku patsa na yena wutsumbu, kota lezi Jehova a va wonisako zona. Loku makunu a zwisisa lezi Jehova a khatalelisako zona vanhu vontlhe na ku nga khataliseki a mudawuko, tiko, kutani lixaka labye, yena i tava ni xiseketelo xi tiyileko xa lomu Mitsalweni xa ku hanyisana ni vanwani hi kurula. (Miti. 10:34, 35)
3. Xana hi nga zi vunisa kuyini a zigonzani za hina lezaku zi kambela a timbilu ta zona wutsumbu kasi ku simama zi kula hi tlhelo ga moya? [be p. 261 nzi. 3] Hi fanele ku kuca a zigonzani za hina lezaku zi tshama na zi alakanya ku a Biblia gi komba lezi Jehova a hi wonisako zona. (Mav. 17:3) Hi fanele ku va khongotela lezaku va wona a kugonza Biblia kota ndlela yi ta nga va vuna a ku wona a “maalakanyo ni mixuvo” ya timbilu tabye kota lezi Jehova a yi wonisako zona, kasi va kota ku ingisa Nungungulu, va lulamisa laha ku lavekako. (Maheb. 4:12)
4. Xini hi faneleko ku tshama na hi xi alakanya a xikhati lexi hi ti karatelako ku khumba a mbilu ya vaingiseli va hina? [be p. 262 nzi. 5] Zi nene a ku alakanya lezaku a xikhati lexi hi gonzisako vanwani hi tirisana na Jehova. (1 Kor. 3:9) Hi Jehova loyi a pimako timbilu a tlhela a koka vanhu lezaku vava ni kuzwanana naye. (Mav. 21:2; Joh. 6:44) Yena a nga kurumeti ne ni munwe lezaku a amukela zinene, kanilezi a xikhati lexi hi tirisako Mitsalo, Nungungulu a nga ha maha vanhu va wona a ku lezi va zi zwako i hlamulo wa zikombelo kutani mikhongelo yabye.
5. Hikuyini hi faneleko ku khatalela ku hlayisa xikhati lomu mitlhanganweni ya bandla? [be p. 263 tinz. 1, 3, kwadru] Loku hi chela kota hi xikhati lexi hi nyikilweko, hi maha lezaku a “zilo zontlhe zi mahiwa hi fanelo ni nayo.” (1 Kor. 14:40) A timhaka-tshinya tontlhe ta gonziselelo ti fanele ku nyikiwa xikhati xi ringanako. Hi kuengetela, a mitlhangano ya hina yi longoloxilwe a kuva yi sangula ni ku gumesa hi xikhati, na ku nga khataliseki a zihena za lomu hi tshamako kona kutani kuranza ka munhu.
XIAVELO N.° 1
6. Xini xi kucileko Paule lezaku a tsala a papilo gakwe go sangula ka va le Korinte? [bsi08-1 p. 20 nzi. 3] Zi wonekisa ku khwatsi Paule i wa sina a amukele a papilo gi ngata hi ka bandla giswa ga le Korinte, niku gi wa lava hlamulo. Ahandle ka lezo, Paule i wa zwile mibiko yo khunguvanyisa. (1 Kor. 1:11; 5:1; 11:18) A mibiko leyo yi mu khunguvanyisile nguvu Paule laha ka kuza a nga kumbuki a papilo gabye ga xiwutiso kala ka vesi go ranga ga xipimo 7 xa papilo gakwe.
7. Zive zihi zigelo zo kari zi mahileko Paule a tsala a papilo gakwe ga wumbiri ka va le Korinte? [bsi08-1 p. 22 tinz. 1-2] Titusi i wa wuyile hi le Korinte niku i wa bikele Paule a hlamulo wa bandla xungetano hi papilo gakwe go ranga, legi gi nga wa va kucile a kuva va ti sola. Hambulezo, a kutshamiseka ka moya ka bandla lego ku wa hi mhangweni hi kota ya “vapostoli lava va hombe,” lava Paule a tlhelileko a va vitana ku “mbapostoli va mawunwa,” ni “zitiri zi khohlisako.” (2 Kor. 11:5, 13, 14) A fanelo ya Paule kota mupostoli yi wa vukelwa. Hikwalaho, a papilo gakwe ga wumbiri ka maKristu ya le Korinte gi tatisile a xilaveko xa hombe.
8. Xana a maKristu ma fanele ku gi wonisa kuyini a wutireli? [bsi08-1 p. 23 nzi. 18] A maKristu ma fanele kuva ni mawonela yo fana ni lawa Paule a ma kombisileko papilweni gakwe ga wumbiri ka va le Korinte, ku nga kubonga. A mutireli wa muKristu loyi a amukelekako khwatsi mahlweni ka Nungungulu a hi muxavisi a fambafambako wa mhaka kanilezi i tira na zi sukela mbilwini. Lezi zi mu mahako a ringanelwa, a hi papilo go kari gi tsalilweko, kanilezi mihanzu leyi a yi pswalako. Hambu lezi a wutireli ga hina gi dzunzekako, a hi gi woni kota xigelo xa kuva hi ti kulisa. A kuhambana ni lezo, a wutireli ga hina gi tatiswa ntsena hi ntamu wa Jehova. (2 Kor. 2:16, 17; 3:1-5; 4:7)
9. Xana hi nga zi kotisa kuyini inyamutlha a ku amukeleka mahlweni ka Nungungulu hi tlhela hiva kutsaka ka vamakabye va hina, a ku fana ni vamakabye va le Filipi? [bsi08-1 p. 12 nzi. 12] Ha zi kota ku pimanyisa a vaFilipi hi kuva ni wuhana ni ku vuna a vamakabye va hina loku va hi zikaratweni. (Fil. 1:3-6) Ha amukeleka mahlweni ka Nungungulu a xikhati lexi hi ‘yimako hi ku nde moyeni munwe, na hi lwela a kukholwa ka ivangeli hi mbilu yinwe,’ hi woninga kota “kuwonekela” tikweni legi go biha. Laha hi mahako a zilo lezo, hi nga hava kutsaka ka vamakabye va hina. (Fil. 1:27; 2:15; 4:1)
10. I kucetelo muni wa wu nene lowu Paule ni vatireli-kulobye va vileko wona ka bandla ga le Tesalonika? [bsi08-2 p. 4 nzi. 13] Paule i wulile lezaku yena wutsumbu zinwe ni vatireli kulobye a va nyikangi a mahungu yo saseka ya Nungungulu ntsena kanilezi ni mihefemulo yabye wutsumbu kasi ku vuna vamakabye vabye vo ranzeka le Tesalonika. Paule i khongelele lezaku a vaTesalonika va “anza liranzweni la kuranzana.” A liranzo leli li kombiswako hi kuziranza la aka li tlhela li hambanyisa a maKristu ni tiko legi gi nga hiko na liranzo, gi nga hlazekangiko, ni gi bihileko. (1 Tes. 2:8; 3:12; 4:1-9)
KUGONZA KA BIBLIA KA VIKI NI VIKI
11. Zi wula kuyini a ku ‘nyikela a [munhu wa kubiha] ka Satani, kasi a nyama yakwe yi mbhetiswa, lezaku a moya wu fela ku hanyiswa’? (1 Kor. 5:5) [w08 15/7 “A Palavra de Jeová É Viva — Destaques das cartas aos coríntios”] A xikhati lexi a munhu a susiwako lomu bandleni, i tlhela kambe a ya maha xipanze xa tiko ga Satani. (1 Joh. 5:19) Hi xikhati lexo, ku wuliwa lezaku o nyikelwa ka Satani. A kuhlongolwa kakwe ku susa a kucetelo wakwe wo biha lomu bandleni ku tlhela ku maha lezaku a “moya” wu xalalisako Nungungulu, kutani matshamela ya gona ya ma nene ma simama lomu bandleni. (2 Tim. 4:22)
12. Xana a kufa ka Jesu ku fanele ku alakanyiwa hi “xikhanzakanya” muni, niku “kala” rini? (1 Kor. 11:26) [w08 15/7 “A Palavra de Jeová É Viva — Destaques das cartas aos coríntios”] A gezu ga xiGreki legi gi tiriselwako ka “hi xikhanzakanya xa” gi wula “khati ginwe ni ginwani” kutani “xontlhe xikhati.” Hikwalaho, Paule i wa wula lezaku xontlhe xikhati a maKristu ma totilweko ma gako a zikombiso za Xialakanyiso, ma wa tava na ‘maba hungu hi kufa ka Hosi.’ Ma wa ta maha lezo “kala yi wuya,” kutani ku ma amukela tilweni kuvuxiweni ka wona hi xikhati xa ‘kuvakona’ kakwe. (1 Tes. 4:14-17, Tradução do Novo Mundo)
13. Muwoniso muni wu kumbukiwako ka 2 Va Le Korinte 12:2-4, niku hi mani loyi kuzilava a wu wonileko? [w04 15/10 p. 8 nzi. 4; p. 10 nzi. 9] A muwoniso lowo wu wa komba a xiyimo xi tlakukileko xa wukhozeli ga lisine, ku nga paradise ya moya, leyi a vanhu va Jehova va ti buzako ha yona “xikhatini xa magumo.” (Dan. 12:4) Zi wonekisa ku khwatsi a muwoniso lowu wu wonilwe hi Paule, hakuva a mutsalo lowu wu kumeka anzhako ka mavesi lawa Paule a vikelako a fanelo yakwe ya kuva mupostoli.
14. Hikuyini Paule a nga fananisa a Nayo wa Mosi ni “mugonzisi wa hina wa ku hi yisa ka Kristu”? (Gal. 3:24) [w08 1/3 pp. 18-21] Paule i wa khanyisa lezaku a nayo wu wa tira kota xivikelo niku wu wa hi wa xikhatanyana. Hi tolovelo, a mugonzisi i wa hi nanza go tsumbeka, legi a ntiro wa gona wu nga hi ku vikela a nwanana ka timhango ni ku mu vuna a ku wona a lisima la mahanyela ma nene. Hi kufanana, a Nayo wa Mosi wu mahelwe ku vikela a vaIsraeli ka mahanyela ni zimaho zo nyenyeza za matiko lawa ma nga wa va ranzele. Hi kuengetela, a xikhati lexi a nwanana a nga chikela ka tanga ya wujaha kutani wunhwana, makunu i wa nga ha simami kuva hasi ka wufumeli ga mugonzisi wakwe. Hi kufanana, a Nayo wu wa hi wa xikhatanyana hakuva zalezo wu nga chiketa a maJuda ma nga chava Nungungulu ka Kristu, a ntiro wa wona kota mugonzisi wu lo mbhela.
15. Xana Paule i wa wula yini a xikhati lexi a nga khongela lezaku ‘a moya ni muhefemulo ni miri zi hlayiswa zontlhe’? (1 Tes. 5:23) [w08 15/9 “A Palavra de Jeová É Viva — Destaques das cartas aos tessalonicenses e a Timóteo”] Paule i wa wula a bandla gontlhe ga wuKristu. I khongelele lezaku ku hlayiswa a “moya” wa gona, kutani xiyimo xa gona xa maalakanyo. I khongelele kambe a “muhefemulo” wa gona, ku nga wutomi, kutani kuvakona ka gona, ni “miri” — ku nga ntlawa wu nga wumbiwa hi makristu ma totilweko. (1 Kor. 12:12, 13) Hi kupimanyisa a mikhongelo ya Paule yi nga kombisa a kukarateka kakwe ka hombe hi bandla, a mikhongelo ya hinawu yi fanele ku kombisa a kukhatala ka hina ko eta hi vamakabye misaveni yontlhe.