Kuvuxeta Ka Xikola Xa Wutireli Ga Nungungulu

A ziwutiso lezi zi lanzelako zi ta kambisiswa ka Xikola Xa Wutireli Ga Nungungulu ka viki gi sangulako hi 27 ka Abril wa 2009. Hi 20 wa timeneti, a muwoneleli wa xikola i ta fambisa a kuvuxeta ku seketelwako ka timhaka ti gonzilweko ka ziavelo za maviki ya 2 ka Março kala 27 ka Abril wa 2009.

1. Xana Josefa i zi kotisile kuyini a ku hlula a xiringo lexi a nga yimisana naxo siku ni siku? (Gen. 39:7-12) [lv p. 105 nzi. 18–p. 106 nzi. 20]

Josefa i wa hi makabye wa Dina na va hambene hi vamamani. (Gen. 30:20-24) Na a ha hi nwanana, Josefa i yi wonile yena wutsumbu a mihanzu ya wupumbu ga makabye wakwe. (Gen. 34:1, 2, 7, 25, 30, 31) A kualakanyela kakwe a mihanzu yo biha ya mitiro ya Dina, zinwe ni kunavela kakwe ka ku tshama liranzweni la Nungungulu, zi vikelile Josefa a xikhati lexi a sati wa Potifare a nga kari a zama ku mu kucetela “masiku ni masiku.” Hi kufamba ka xikhati, a xiringo xa Josefa xi lo gumesa. A ku fana na Josefa, loku hi venga za kubiha, hi ranza le’zo saseka, ha zi kota ku khomelela ka xitsumbiso lexi xa Jehova: “Wa lonzowota a mihefemulo ya vabasileko vakwe, wa va ponisa mandleni ya vakubiha.” (Tis. 97:10)

2. Xana a Biblia gi komba yini xungetano hi kuhlayiswa ka masiku ya kubelekwa? (Gen. 40:20-22) [lv p. 150 nzi. 9–p. 151 nzi. 11]

A kualakanyiwa ka siku ga kubelekwa ka Faro wa le Gipite ku kombiswa hi ndlela yo soleka. Ahandle ka ku ala a mikhuwo ya ku alakanyiwa ka masiku ya kubelekwa hi kota ya kuva yi tumbulukele wuhedenini ni wungomeni ntsena, a maKristu yo sangula ma wa yi ala hi kota ya milayo yabye ya mahanyela kambe. A Nayo wu wa leletela lezaku anzhako ka kuva wasati a phulukile i wa fanele ku nyikela a munyikelo wa xionho ka Nungungulu. (Levi 12:1-8) Lexi xi wa hi xialakanyiso xa lezaku a vanhu va thapelisa xionho a vana vabye. Lezo zi wa ta vuna a vaIsraeli a kuva ni mawonela yo ringanisela xungetano hi kubelekwa ka vana vabye, hi ndlela leyo zi va tsema a hlana wa ku vumela mikhuwo ya wuhedeni ya ku alakanya masiku ya kubelekwa. (Tis. 51:5)

3. Xana Josefa xikombiso xa xi nene nguvu xa ku tsetselela lava va hi onheleko hi ndlela muni? (Gen. 45:4, 5) [w99 1/1 p. 31 tinz. 2-3]

Josefa i xanisilwe hi vamakabye vakwe, hambulezo yena xikombiso xa xi nene nguvu xa ku kombisa tipswalo. A kukhomelela nguvu a kululama ku wa ta ngha ku lavile lezaku a va tsayisa hi lezi va nga mu xavisile wukhumbini. Hi tlhelo ginwani, a kutizwa ku wa ta ngha ku mu mahile a nga cheli kota hi xihambunyeto xabye. Josefa a nga mahangi ni xinwe xa lezo. Wutshanwini ga lezo, yena i lo ringa a kutisola ka vamakabye vakwe. Zonake loku a wonile lezaku a kutisola kabye ku wa hi ka lisine, i lo va tsetselela. Ha zi kota ku pimanyisa a tipswalo ta Josefa. Loku a wo kari loyi a hi onheleko a kombisa a kucica ka lisine ka mbilu yakwe, hi fanele ku mu tsetselela. Hi ku maha lezo, hi pimanyisa Jehova, loyi a tekelako ku “tsetselela.” (Tis. 86:5)

4. Xana a magezu ya Josefa ya ku ngalo “mu ta rwala a marambu ya mina mu famba nawo” ma khumbisile kuyini a vaIsraeli? (Gen. 50:​25) [w07 1/6 p. 28 nzi. 10]

A xikhati lexi Josefa a nga hi ni 110 wa malembe, i lo laya a vana vakwe lezaku loku a vaIsraeli va huma Gipite, va wa fanele ku rwala a marambu yakwe va famba nawo. (Maheb. 11:22) A xileletelo lexo xi nyikile kutsumba ko kari ka vaIsraeli nzeni ka makume ya malembe ya wukhumbi legi va ngave ka gona anzhako ka kufa ka Josefa, na xi nyika a kutiyiseka ka lezaku va wa ta tlhatlhiswa. A xikombiso lexi xi hi alakanyisa lezaku lava va khosaheleko va nga maha mitiro yi tsongwani ya kukholwa leyi yi zi kotako ku khumba nguvu a makholwa-kulobye.

5. Xini xi nga hi tiyisako a xikhati lexi hi amukelako a xiavelo xo karata? (Ekso. 4:10, 13) [w04 15/3 p. 25 nzi. 4]

Mosi i lo komba lezaku i wa nga hi na kutiyiseka xungetano hi wuzikoti gakwe ga ku wulawula mahlweni ka Faro. Hambu anzhako ka ku tiyisekiswa lezaku Jehova i wa ta mu vuna, i lo khongotela Jehova lezaku a ruma munhu munwani. Hambulezo, Jehova i lo tirisa Mosi, a munhu wo rula, a mu nyika wutlhari ni ntamu lezi zi nga laveka kasi ku tatisa a xiavelo xakwe. (Mitse. 12:⁠3) Hikwalaho, wutshanwini ga ku yisa kupima ka kungaringanelwi ka hina, ha zi kota kuva ni kutiya loku hi khegela ka Jehova hi tlhela hi tatisa hi kutsumbeka a ntiro wa hina wa kuxumayela ni kugonzisa. (Mat. 24:​14; 28:19, 20)

6. Give gihi wuyelo ga ndlela leyi Jehova a nga yimisana ha yona na Faro, niku xana lezo zi fanele ku hi khumbisa kuyini? (Ekso. 9:13-16) [w05 15/5 p. 21 nzi. 8]

Jehova i wa lava ku kombisa a ntamu wakwe hi ndlela yi nga wa ta tira kota xikombiso ka vontlhe lava va mu phikizako, a ku patsa na Diabolus. A ku yimisana ni mhaka hi ndlela leyi zi mahile a vito ga Nungungulu gi tiveka misaveni yontlhe zi tlhela zi maha a vanhu vo hambanahambana va patsana ni vaIsraeli wukhozelini ga lisine. (Ekso. 12:37, 38; Jox. 2:10) Hi kufanana inyamutlha, a kuhuwelelwa ka vito ga Jehova ka vuna a vanhu va timiliyoni lava va nghenako wukhozelini ga lisine.

7. I tlhamuselo muni lowu Eksodusi 14:​30, 31 gi nga nawo masikwini ya hina? [w04 15/3 p. 26 nzi. 5]

A matshanza ma kucile Faro lezaku a zama ku nyimisa Jehova a ku tlhatlhisa hi ndlela yo hlamalisa a vanhu vakwe va nga hi wukhumbini. Hi kota ya lezo, Faro ni mabutho yakwe va hlulilwe hi ndlela ya tingana nguvu le Bimbini go Pswhuka. A ku fana ni lezo, ka masiku ya hina a wuprofeti ga Biblia gi komba kubaseni lezaku Satani ni vakhuzeli vakwe lava va zamako ku tsanzekisa a makungo ya Jehova va ta hluliwa le Har–Magedoni. (Ezek. 38:14-16) Hikwalaho, a Timboni ta Nungungulu ta xikhati lexi ta zi kota ku tiyiseka lezaku ti ta poniswa a “kuxaniseka ka hombe” hi woko ga ntamu-wontlhe ga Mutlhatlhisi loyi wa Hombe. (Mat. 24:21)

8. Kota lezi zi kotekako ku woniwa ka Eksodusi 16:1-3, timhango muni ti nga kona kuvileleni? [w93 15/3 p. 21 tinz. 1-3]

A mhaka ya lezaku ‘a hlengeletano yontlhe ya vanana va ka Israeli yi lo ngurangurela Mosi na Aroni le xiwuleni’ yi komba ku ngalo a kuvilela ka thapela vanwani. (Ekso. 16:​2, Tradução do Novo Mundo) A xa wumbiri hi lezaku loyi a vilelako i tala ku engetela a wuhombe ga lezi zi mu vilelisako. (Ekso. 16:⁠3) Xungetano hi kubinza ka kungurangura ku nga hiko na xigelo, Eksodusi 16:⁠8 (NM) gi ngalo: ‘A mu ngurangurelangi hina [Mosi na Aroni], mu ngurangurele Jehova.’

9. Maringano ni magezu ya Xivumelwano xa Nayo ma tsalilweko ka Eksodusi 19:5, 6, xana ku nga wuliwa lezaku Israeli i wa hi “tiko ga vapristi, a tiko gi basileko” kuya chikela kwihi? [w95 1/7 p. 16 nzi. 8]

A xikhati lexi Israeli a nga ha tsumbekile, i wa nyika lisima a wuhosi ga hombe ga Jehova wuakweni gontlhe a tlhela a mu vumela kota Hosi yabye. Hizalezo, vona va wa hi tiko kutani mufumo. Ku wa tekiwa a vavanuna va vaLevi wutshanwini ga matewula ya mingango yontlhe yi nga hiko vaLevi. Hi ndlela leyo, ku nga ha wuliwa lezaku a ngango ni ngango le Israeli wu wa hi ni muyimeli ka wupristi. A ku hunza lezo, a xikhati lexi va nga ha ingisa a Nayo wa Jehova, va wa basile, va ti hambanyisile ni matiko lawa ma nga va ranzele. Va wa hi tiko gi basileko. (Deut. 7:5, 6) Hi kumaha loko, va wa yimela Jehova mahlweni ka matiko. Hambulezo, hi mazwisisela yo mbhelela, a magezu ya Eksodusi 19:5, 6 ma tatisekile ka Israeli wa moya. (Kuv. 5:9, 10)

10. Xana a nayo wa wukhume lowu wu wulawulako hi kunavela wu hunza a milayo ya vanhu hi ndlela muni? (Ekso. 20:17) [w06 15/6 p. 23-24 nzi. 16]

A ku na munhu a nga wa ta zi kota a ku kurumeta munwani lezaku a lanzela a nayo lowo hakuva i hava a zi kotako ku wona a matshamela ya timbilu. A nayo wa wukhume wu tlakusile nguvu a Nayo wa Nungungulu laha ka kuza a kululama ka vanhu ku nga wu chikeleli wu tlhela wu khumba a mutsu wa mitiro yo tala ya kubiha. (Jak. 1:14) A ku hunza lezo, wu mahile lezaku a muIsraeli munwe ni munwani a zi tiva lezaku i wa ta ti hlamulela ka Jehova hi kukongoma, loyi a zi kotako ku wona a kubyekelela ka mbilu. (1 Sam. 16:7)