Kuvuxeta Ka Xikola Xa Wutireli Ga Nungungulu
A ziwutiso lezi zi lanzelako zi ta kambisiswa ka Xikola Xa Wutireli Ga Nungungulu.
1. Xana hi gonza yini ka kubeletela ku nga ka Eksodusi 34:26? [w06 1/4 p. 31 tinz. 1-5]
A xileletelo lexi, xi kumekako kunharu Nayweni wa Mosi, xi hi vuna a ku zwisisa a wunene ga Jehova ni lezi yena a zi wonako na zi fanele. (Ekso. 23:19, Tradução do Novo Mundo; Deut. 14:21) Xona kambe xi khanyisa a kuvenga kakwe a wukhozeli ga mawunwa, kota lezi a kubhika loko ku zi kotako ku ngha ku vile mukhuwo wa wuhedeni wa ku nisa vula. A matshinya ya Nayo ma hi gonzisa a ku zwisisa a milayo yo tlakuka ya mahanyela leyi yi kombisako a matshamela ya Jehova yo hlamalisa. (Tis. 19:7-11)
2. Zini a Urim ni Tummim, niku xana zi wa tirisisiwa kuyini le Israeli wa kale? (Ekso. 28:30) [w06 15/1 p. 18; w01 1/9 p. 27]
Zi wonekisa ku khwatsi a Urim ni Tummim ti wa hi tihlolo ti basileko leti ti nga hlahluviwa loku a tiko gi yimisana ni ziyimo zo nonoha nguvu. Hi ku tirisa a Urim ni Tummim, ka zikhati zo kari Jehova i wa nyika mihlamulo yo kongoma a tlhela a vuna madota ya Israeli a ku tiyiseka lezaku a ziboho zabye zi wa yelana ni kuranza kakwe. A matimu ya xiJuda ma komba lezaku a Urim ni Tummim zi lo nyamalala kulovisweni ka tempeli hi 607 Mahlweni ka Nguva ya Hina.
3. Xana Jehova i wa wulawulisa kuyini na Mosi “na va cuwukene”? (Ekso. 33:11, 20) [w04 15/3 p. 27]
Hi kota ya lezi zi wuliwako ka Eksodusi 33:20, a magezu “na va cuwukene” ma nga ka vesi 11 ma zi kota ku ngha ma wula a kuwulawulisana ka laha kusuhani nguvu, na ku nga hi ku wonana na Jehova hi kukongoma. Mosi i wa wulawula ni muyimeli wa Nungungulu hi kukongoma a tlhela a amukela zileletelo za Jehova zi nga tiswa hi muyimeli loye. Kota lezi zi wuliwako ka Va Le Galatia 3:19, a Nayo “wu lo yimiswa hi tingelosi a canjeni ga mutlhanganyisi.”
4. Hi nga gonza yini ka minyikelo ya kuziranza ya titshomba ni ya wuzikoti leyi a vaIsraeli va nga yi maha kasi ku aka a tabernakeli? (Ekso. 35:5, 10) [w99 1/11 p. 31 tinz. 1-2]
Inyamutlha, a ntiro wa hombe nguvu wa kuxumayela a mahungu yo saseka ya Mufumo wa Nungungulu wu mahiwa hi ku tirisa a minyikelo ya kuziranza ya wuzikoti ni titshomba. A ku fana ni lezi zi nga maheka ka minyikelo ya tabernakeli, Jehova a nga gemi a ntsengo lowu a munwe ni munwani a faneleko ku nyikela. Kanilezi i lava lezaku hi mu tirela hi mbilu yontlhe. (Mar. 12:30) Ha zi kota ku tiyiseka lezaku Jehova i ta hi chachazela hi kota ya zontlhe hi zi mahako kasi ku vuvumisa a wukhozeli ga lisine.
5. Xana a xisirelo lexi xi kumbukiwako ka Eksodusi 40:28 xi yimela yini tempeleni ya hombe ya Jehova ya moya? [w00 15/1 p. 15 tinz. 7-8]
A xikhati lexi Jesu a nga bapatizwa a tlhela a totiwa hi moya wa ku basa wa Jehova hi 29 Nguveni ya Hina, i lo nghena kuzwananeni ka moya ni Dadani wakwe. A xiyimo lexi xo hlawuleka lexi Jesu a nga hi ka xona ni Dadani wakwe wa le tilweni xi wa nga zwisiswi khwatsi hi vanwani vanhu. Zi wa fana ni loku a xisirelo xi valile a mahlo yabye ya kuzwisisa, khwatsi hi lezi a xisirelo xi nga valela a wutshamu go Basa ka lava va nga hi tsenzeleni wa tabernakeli.
6. I tshamela muni ga muphahlelo wa Jesu legi hi alakanyiswako hi “munyikelo wa kuhiswa,” lowu wu nga kari wu nyikelwa wontlhe laha alatini? (Lev. 1:13) [w04 15/5 p. 21 nzi. 3]
Jesu i ti nyikele wutsumbu gakwe gontlhe. I nyikele wutomi gakwe kota munhu wa nyama hi kuziranza kota muphahlelo wa nzhiho hi wurumba, ku nga sali nchumu. (Maheb. 10:5-10)
7. Hi gonza yini mhakeni ya lezaku “a mafura wontlhe nja Jehova”? (Lev. 3:16, 17) [w04 15/5 p. 22 nzi. 2]
Kota lezi a mafura ma nga woniwa kota xipanze xa chukwana kutani xo nona nguvu ka nyama yontlhe ya xihari, a xileletelo xa lezaku ma nga giwi handle ko kanakana xi wa gonzisa a vaIsraeli lezaku a za chukwana zi wa lumba Jehova, a munyiki wa zontlhe. Lezi zi hi alakanyisa lezaku hi fanele ku nyika Jehova lezi za chukwana.
8. Zi wa tlhamusela yini a ku tota a nkhata wo kari wa hamba ya ku wumbela wupristi laha ka ndleve ya xinene, canja ga xinene, ni nkonzo wa xinene wa Aroni ni vana vakwe? (Lev. 8:23, 24) [it-1 p. 679 nzi. 7]
Lezo zi wa komba lezaku lezi Aroni ni vana vakwe va nga wa zi ingisa, a ntiro lowu va nga wu maha, ni lezi va nga hanyisa zona mayelano ni mitiro yabye ya wupristi va wa fanele ku zi maha hi wuzikoti gabye gontlhe. Jesu Kristu, a Mupristi wa Hombe ka vontlhe, i tatisile a xipanze lexi xa wuprofeti a xikhati a nga hi misaveni. Hi kufanana, a vapristi va nga hasi kakwe, ku nga vamakabye vakwe va totilweko hi moya, va fanele ku lanzela a nkonzo wakwe hi laha kusuhani. (1 Ped. 2:5, 21)
9. Kuzwisisa muni hi ku kumako ka Levi 12:8 xungetano hi vapswali va Jesu, niku xana hi nga gonza yini ka lezo? [w98 15/12 p. 6 nzi. 5]
A xikhati lexi a nga humesa a munyikelo wa kubasiswa kakwe, Maria i lo lonzowota a lulamiselo ga Nayo legi gi nga vumelela a kunyikelwa ka “patswa wa matuva, kutani mavinyani mambiri ya zipomba.” (Luka 2:24) Lezo zi komba lezaku hambu lezi va pswalilweko lixakeni la wuhosi la Davida, ne Josefa ge hambu Maria va wa nga hi vanhu vo fuma kutani vo chaveka. Jehova Nungungulu i lo hlawula a ngango wa xisiwana, na ku nga hi wo fuma, kota muti lowu a N’wana wakwe a nga wa ta wundlelwa kona. Lezo zi fanele kuva xialakanyiso xo dlunyateka ka vapswali xa lezaku a xinyikiwo xa chukwana lexi va nga xi nyikako vana vabye — xi nga xa chukwana a ku hunza a titshomba kutani zigonzo zo tlakuka — i ngango lowu wu rangisako a titshomba ta moya.
10. Xana a muphahlelo wa Jesu wa kutirula wu wa kombisiswa kuyini ka Siku ga Nzhiho ga lembe ni lembe le Israeli? (Lev. 16:11-16) [w98 15/2 p. 12 nzi. 2]
Hi Siku ga Nzhiho, a mupristi wa hombe i wa fanele ku tlhava nkuzi kota munyikelo wa kuonha zonake a neha a nkhata wa yona wutshanwini go Basabasa ‘a ti mahela nzhiho yena wutsumbu zinwe ni ngango wakwe.’ Lezi zi wa kombisa a muphahlelo wa Jesu lowu wu tiriselweko “ngango wakwe” wa vapristi va nga hasi kakwe, ku nga Israeli wa moya. Hi kulanzela, a mupristi wa hombe i wa tlhava a mhongo “leyi yi lumbako a vanhu, a maha muphahlelo wa kuonha.” (Lev. 16:15) I wa neha a nkhata wa yona wutshanwini go Basabasa, a maha nzhiho wa zionho wa 12 wa tixaka ta Israeli leti ti nga hiko ta vapristi. Hizalezo, a Mupristi wa Hombe Jesu Kristu i tirisile a nkhata wakwe kasi ku vuna vanhu lava va nga ni kutsumba ka ku hanya laha misaveni.