‘Ngha A Kuwonekela Ka Nwina Ku Woninga’
1. Xini hi nga ni lungelo ga ku xi hlengela ni vanwani?
1 Kusukela gica kala gi ya phuma, a kusaseka ka kuwonekela ku tisa wudumo ka Jehova Nungungulu. Hambulezo, kuve kuwonekela kunwani loku Jesu a nga byela a vapizani vakwe lezaku vava nako — ku nga “kuwonekela ka wutomi.” (Joh. 8:12) A kuva ni kuwonekela loku ka moya i lungelo go hlawuleka gi patsako kuva ni wutihlamuleli ga hombe. Jesu i leletele lezi: “Ngha na kuwonekela ka nwina ku woninga mahlweni ka vanhu,” kasi ku vuneka vanhu vanwani. (Mat. 5:16) Xikari ka munyama wa hombe wu nga kona inyamutlha hi tlhelo ga moya, a kuwonekela loku ku fanele ku hlengelwa ni vanwani, niku zezi a xilaveko lexo xa hombe nguvu! Xana hi nga tsikisa kuyini a kuwonekela ka hina ku woninga, a ku fana na Kristu?
2. Jesu i kombisile kuyini a lisima la ku hlengela a kuwonekela ka moya ni vanwani?
2 Hi Ku Xumayela: Jesu i tirisile a xikhati xakwe, ntamu, ni titshomba kasi ku a kuwonekela ka zinene ku tiviwa hi vanhu lomu mitini yabye, lomu maphangweni, le hehla ka zitsunga — ni kwihi lomu a vanhu va nga kumeka kona. Yena i wa tiva a lisima la ku nyika kuwonekela ka moya ka lisine. (Joh. 12:46) Kasi ku a kuwonekela loko ku chikelela vanhu vo tala nguvu, Jesu i lo longisela a vapizani vakwe lezaku vava “kuwonekela ka tiko.” (Mat. 5:14) Vona va lo tsika kuwonekela kabye ku woninga hi ku maha za zi nene ka vaakelani vabye ni ku hlengela a zinene za moya ni vanwani.
3. Xana hi nga kombisa kuyini kubonga ka lisine hi kuwonekela ka zinene?
3 A malanza ya Nungungulu ma khatala nguvu hi wutihlamuleli ga wona ga ku famba kota “vanana va kuwonekela,” niku hi xigelo lexo ma xumayela kwihi ni kwihi a vanhu va kumekako kona. (Efe. 5:8) Hambu ku maha a nchumu wa wu tsongwani wo kota ku gonza a Biblia kutani mabhuku manwani ya wuKristu kuwoneni ka vanhu, ntirweni kutani xikoleni zi nga vulula ndlela ya ku bhulisana hi Mitsalo. Hi ku maha lezo, a makabye wo kari wa xisati a ha hiko muswa i nyikele mabhuku a tlhela a sangula zigonzo za Biblia ni 12 wa zigonzani-kulobye!
4. Hikuyini a ku ‘tsika a kuwonekela ka hina ku woninga’ zi patsako mahanyela ma nene?
4 Hi Mitiro Yo Saseka: A ku tsika kuwonekela ka hina ku woninga zi patsa kambe a mahanyela ya hina ya siku ni siku. (Efe. 5:9) Le ntirweni, le xikoleni, ni matshanwini manwani ma nga kuwoneni ka vanhu, a mahanyela ya wuKristu ma woniwa hi vanwani ma tlhela ma vulula a malungelo ya ku hlengela zinene za Biblia ni vanwani. (1 Ped. 2:12) Hi xikombiso, a mahanyela ma nene ya mufana wa ntlhanu wa malembe ma khumbile mbilu ya mugonzisi wakwe laha ka kuza a vitana vapswali vakwe. A mugonzisi loye i te ngalo, “Cima a nzi se wona nwanana wo tiya nguvu kumaheni ka zo lulama wo khwatsi hi loyi!” Hi lisine, a wutireli ga hina ni mitiro yo saseka zi kokela vanhu ‘kuwonekeleni ka wutomi’ zi tlhela zi tisa wudumo ka Nungungulu wa hina.