Xana U Nga Hlengela Wutirelini Hi Tisonto?
1. Hi nga gonza yini ka mitiro ya Paule ni vanghana vakwe le Filipi?
1 Ku wa hi Sabado, a siku legi a kutala ka vaJuda va le Filipi va nga humula hi gona. Paule ni vanghana vakwe va wa kari va enzela a doropa lego ka ginwe ga maenzo yabye ya wurumiwa. A ku na munhu a nga wa ta va sola loku vonawu va wa no tshama va humula ka siku lego kota lezi va nga tirile nguvu. Hambulezo, va lo tiva lezaku a vaJuda va tlhangene le handle ka doropa kasi va khongela, hikwalaho va lo lonzowota a lungelo lego lezaku va va xumayela. Paule ni vanghana vakwe a va no ku tsaka a xikhati lexi Lidia a nga ingisa a tlhela a bapatizwa ni ngango wakwe wontlhe! (Miti. 16:13-15) Kota lezi a vanhu vo tala inyamutlha va humulako hi tiSonto, a hi chukwana ku tirisa xipanze xa siku legi kasi ku va xumayela?
2. I yimpi muni leyi a malanza ya Jehova ma nga hlula kasi ku xumayela hi Sonto na ma nga karatwi?
2 Yimpi Ya Ku Lava Ku Xumayela Hi Sonto: Hi 1927, a malanza ya Jehova ma kucilwe a ku tirisa xipanze xa tiSonto tontlhe wutirelini. Lezo zi vangile a kuvukelwa ka kwalaha ni kwalaha. Le Estados Unidos a vanyingi va lo khonwa hi ku nga ingisi a milayo ya ku hlayisa a Sabado hi Sonto, ku tsolopetela a kurula, ni ku xavisa na va nga vumelelwi. Kanilezi a malanza ya Jehova a ma nyimangi a ku xumayela. Kwalomo ka malembe ya 1930, va longisele “matsima yo avanyisela,” lawa a vahuweleli va mabandla ya wuakelwani va nga tlhangana lezaku va zi kota ku xumayela va eneta a xipanze xinwe. Ka zikhati lezi a vahuweleli va nga khonwa, ku wa hi ni votala nguvu laha ka kuza a wuhosi gi tsanzeka a ku va nyimisa ku xumayela. Xana hakunene wa bonga a kutikarata loko ku mahilweko hi vamakabye lavo lezaku hi zi kota a ku xumayela hi Sonto na hi nga karatwi?
3. Xini xi mahako lezaku a Sonto yiva siku ga gi nene ga ku hlengela wutirelini?
3 Siku Ga Gi Nene Nguvu Kasi Ku Xumayela: A vanhu vanyingi a va tiri hi Sonto. Hi tolovelo vo humula. Za koteka ku a vokari va tolovelako kuya chechini va byekelela ku bhula xungetano hi Nungungulu ka siku legi. Loku hi maha a mutlhangano wa hina hi Sonto, hi sina hi ambalisile lezi hi ambalisako zona wutirelini, hikwalaho, a hi chukwana hi ti longisela na ka ha hi mahlweni lezaku hiya ntirweni wa simu mahlweni kutani nzhako ka mutlhangano? Loku zi laveka, longisela a zakuga zo hehuka lezaku u famba nazo.
4. Litsako muni hi zi kotako a ku li kuma loku hi tirisa a xipanze xa Sonto wutirelini?
4 Loku hi tirisa a xipanze xa Sonto wutirelini, hi ta simama hiva ni xikhati xa ku humula loku ku hi fanelako. Niku a kuhumula ka hina ku ta patsa ni litsako leli hi li kumako hi ku maha a ntiro wa Jehova. (Mav. 19:23) Za koteka a ku hiva ni litsako la ku kuma a munhu wo fana na Lidia!