Tsakela a ntiro wa wena
1. Xini lexi xi nga hi mahako hi hola wutirelini?
1 A munhu i mahelwe kuva a “tsakela ntiro wakwe.” (Mutsh. 2:24) Kanilezi, loku hi nga woni mihanzu yi nene wutirelini ga hina, hi nga ha mbhela ntamu zonake hi luza litsako hi tlhela hi nga ha hiseki. Xini xi to hi vuna ku simama hi tsakela a ntiro wa hina?
2. Hikuyini hi nga faneliko ku rinzela zilo zo hunza mpimo wutirelini ga hina?
2 U nga rinzeli zilo zo hunza mpimo: Alakanya lezaku hambu lezi a vanhu lava va amukeleko a mahungu ya Jesu va nga hi vatsongwani, a wutireli gakwe gi bhinzulile nguvu. (Joh. 17:4) Ka mufananiso wakwe xungetano hi muxwanyi, Jesu i profetile lezaku a timbilu ta vanhu vo tala ti wa nga ta vumela a mahungu ya Mufumo lawa ma fanako ni mbewu. (Mat. 13:3-8, 18-22) Hambulezo, a kutikarata ka hina ku wa ta bhinzula nguvu.
3. Hi nga ‘pswalisa kuyini mihanzu’ hambu loku a vanhu va nga tali ku vumela a mahungu lawa hi ma xumayelako?
3 Lezi hi pswalisako zona mihanzu yo tala: Hi kuya hi mufananiso wa Jesu, lava va vumelako a mahungu lawo va wa ta “pswala mihanzu.” (Mat. 13:23) A xikhati lexi a lihlanga la tirigo li rumbukako, a li pswali zihlangana zinwani za tirigo ntsena, kanilezi li pswala timbewu tiswa kambe. Hikwalaho a mbhanzu wa maKristu ma bhinzulako a hi vapizani vaswa ntsena, kanilezi kuhangalaka ka mbewu ya Mufumo kambe — ku nga timhaka leti hi ti xumayelako xungetano hi Mufumo. Lezo zi na ni wuyelo ga hombe nguvu legi gi hi nyikako litsako, hambu loku a vanhu va nga vumeli a mahungu ya hina. Hi ku maha lezo, hi maha lezaku a vito ga Jehova gi basiswa. (Isa. 43:10-12; Mat. 6:9) Hi kuma lungelo ga kuva zitiri-kulobye na Nungungulu. (1 Kor. 3:9) Niku a ‘mbhanzu lowo wa milomu’ wa mu tsakisa nguvu Jehova. — Maheb. 13:15, 16.
4. Xana a wutireli ga hina gi ngava ni wuyelo muni na hi nga zi tivi?
4 Tlhatakumbiri, kuzilava a ntiro wa hina wa kutikarata wa bhinzula na hi nga zi tivi. Za koteka ku a vokari va zwileko Jesu na a xumayela va nga tekelangi ku maha vapizani vakwe kala loku a wutireli gakwe ga laha misaveni gi chikele magumo. Hi kufanana, a mbewu ya Mufumo leyi hi yi byalako yi nga ha hlwela ku zima mitsu yi tlhela yi kula mbilwini ya munhu, zonake a munhu loye a ta nghena lisineni na hi nga zi tivi. Kunene, a wutireli ga hina ga bhinzula nguvu. Hikwalaho, ngha hi simama ku “pswala mihanzu yo tala” zonake hi ti komba kuva vapizani va Jesu. — Joh. 15:8.