Pimanyisa a xikombiso xa vaprofeti — Hosea
1. Xiwutiso muni lexi kuzilava u tshukileko u ti wutisa?
1 ‘Xana nzi ti yimisele ku ti karata kala kwihi ntirweni wa Jehova?’ Kuzilava wa tshuka u ti maha xiwutiso lexi loku u ehleketa hi wunene ga Jehova ga hombe ni wuxinji gakwe. (Tis. 103:2-4; 116:12) Hosea i mahile hi matsenya lezi Jehova a nga mu rumile ku maha, hambu lezi zi nga lava kutikarata ko kari. Makunu-ke, hi nga mu pimanyisisa kuyini Hosea?
2. Hi nga xi pimanyisisa kuyini a xikombiso xa Hosea xa ku timisela ntirweni wa kuxumayela?
2 Xumayela xikhatini xa zikarato: A mahungu ya Hosea ma waya nguvunguvu ka mufumo wa khume ga tixaka wa Israeli, laha a wukhozeli ga lisine gi nga wonekisa ku khwatsi gi lovisilwe. Hosi Jeroboamu wa wumbiri i lo maha zilo zi bihileko mahlweni ka Jehova a tlhela a yisa mahlweni a wukhozeli ga marole legi gi nga sangulisilwe hi Jeroboamu wo sangula. (2 Tih. 14:23, 24) A tihosi leti ti lanzeleko tonawu ti loya mahlweni ni wukhozeli ga hava legi gi nga mahiwa le mufunweni wa khume ga tixaka kala kuza a tiko legi gi hahlulwa hi 740 Mahlweni ka Nguva ya Hina. Hambu lezi a wukhozeli ga mawunwa gi nga vuvumile, Hosea i tirile 59 wa malembe hi kutsumbeka kota muprofeti hi wutsongwani ga kona. A ku fana na Hosea, xana hinawu hi ti yimisele ku xumayela lembe ni lembe, hambu loku hi wona lezaku a vanhu a va khatali kutani ku hi xanisa ke? — 2 Tim. 4:2.
3. Xana lezi zi humeleleko Hosea zi kombisa kuyini a wuxinji ga Jehova?
3 Khanyisa a wuxinji ga Jehova: Jehova i lo laya Hosea lezaku a teka “sati wa wubhayi.” (Hos. 1:2) Hambu lezi a sati wakwe, Gomera, a nga mu pswalela a n’wana wa mufana, zi wonekisa ku khwatsi hi nzhaku ka xikhati i lo pswala a vana vambiri hi wubhayi. A kuva Hosea a ti yimiselile ku tsetselela a sati wakwe zi kombile a wuxinji ga Jehova ga hombe ka vaIsraeli vo biha a xikhati lexi va nga hunzuluka. (Hos. 3:1; Rom. 9:22-26) Xana hi ti yimisele ku ti tsona zilo zo kari hi zi ranzako kasi hi zi kota ku va tivisa wuxinji ga Jehova a vanhu va tixaka tontlhe ke? — 1 Kor. 9:19-23.
4. Kutikarata muni loku hi nga tshukako hi ku maha ntirweni wa Jehova?
4 A malanza yo kari ya Jehova ma tsikile mitiro yi holelako mali yo tala nguvu kasi ma zi kota ku maha zo tala wutirelini. A vanwani va simama na va hi magwenza kutani ku nga pswali vana kasi va rangisa Mufumo. Loku hi ehleketa hi lezi zi humeleleko wutomini ga Hosea, hi nga tshuka hi ti byela lezi: ‘Nzi wa nga ta tshuka nzi zi kota ku maha lezi a zi mahileko.’ Hambulezo, laha hi yako hi gi nyika nguvu lisima a wunene ga Jehova gi nga hi faneliko, hi khegela ka moya wakwe wa ku basa kasi hi kuma ntamu, a nga tshuka a hi tirisa hi ndlela ya ku cima hi wa nga zangi hi yi rinzela — khwatsi hi lezi zi mahekeleko Hosea. — Mat. 19:26; Fil. 2:13.