Mianmar

Kwadru ka maphajina 108-109

LEMBE GA KUPSWALIWA 1933 LEMBE GA KUBAPATIZWA 1949

MATIMU I mbhetile 50 wa malembe ni kuhunza ntirweni wa xikhati xontlhe le Mianmar, lawa a kutala ka wona ma hunzako na a tira kota muwoneleli wa ravi. Wa ha tira Hofiseni ya Ravi.a

Hi 1988, ku’ve ni xitereka xa hombe nguvu le tikweni ga Yangon, laha a vanhu vo tala nguvu va nga tata zitarato na va khala lezaku kuva ni kucica timhakeni ta politika. Lezi a tiko gi nga hi khombyeni, a masochwa ma lo wutla wuhosi, ku sangula ku fuma masochwa tikweni gontlhe. A kutala ka lava va nga maha xitereka va lo dawa.

Ka hweti yaleyo hi wa lava ku rumela a mubiko wa hina wa lembe le Nova York, a tsinza ga hina ga misava yontlhe, kanilezi a tindlela tontlhe ta ku rumela zilo ti wa valilwe, niku hi wa nga woni ndlela yinwani ya ku rumela a mubiko wa hina. Nzi lo tiva lezaku a Embaixada ya Estados Unidos yi wa lava ku rumela mahungu ya ntiro wabye maya handle ka tiko hi xithandamoya. Na nzi alakanya lezaku va nga tshuka va vumela ku patsa mubiko wa hina, nzi lo boha a fato ya mina ya yi nene ka tontlhe zonake nziya Embaixada.

Laha nzi nga kari nzi fambisa mova lomu ruweni gi nga tsakamile hi vula, nzi lo wona lezaku a doropa gi wa rulile. Na ku nga se hunza xikhati xo leha, a ruwa gi lo valiwa hi xighodo xa hombe, hikwalaho nzi lo siya mova nzi famba hi milenge a pfhuka lowu wu nga sele.

Kusuhani ni nyangwa ya Embaixada, nzi lo wona vanhu vo tala na va vanga guwa hi ku lava ku nghena, kanilezi a masochwa ma wa valile nyangwa. Nzi lo nyima nzi khongela hi lomu mbilwini. A wanuna wo kari i lo wona lezaku nzi wa ambalile khwatsi zonake a kanyuluka aku: “A wanuna loyi munwe wa vatiri va kwalaha hofisa.” Ka xikhati lexo, nzi lo kunyulula hi lomu ka vanhu. A xikhati lexi nzi nga chikela laha nyangweni ya hofisa yi nga khotsilwe, a musochwa wo kari wa hombe i lo nzi cuwuka na a nzi kanakanela.

I lo nzi wutisa hi gezu ga ntamu aku: “Hi wena mani, na u lava yini?”

Nzi lo mu hlamula nziku: “Nzi lava ku wonana na embaixador. Nzi na ni mahungu ya lisima nguvu nzi lavako ku ma rumela America.”

I lo nzi cuwuka nguvu na a kombisa kuzangara. Hi xitshuketi i lo vulula nyangwa, a nzi koka nzi nghena, zonake a vala nyangwa hi xihatla lezaku a xidlemo xi nga ngheni.

Aku ngalo hi gezu ga kubhonga: “A hi fambe.”

A xikhati nzi nga hi laha nyangweni ya hofisa, a musochwa loye i lo nzi nyikela ka yinwe ya tihosana leyi yi nga nzi wutisa ku nzi lava yini.

Nzi lo mu hlamula nziku, “Nzita hi laha hofisa ya Sociedade Torre de Vigia. Niku nzi na ni mubiko wa lisima nguvu wu faneleko ku chikela le tsinza ka hina le Nova York hweti yaleyi. U nga nzi mahela wuxinji u wu rumela zinwe ni mahungu ya ntiro wa nwina ke?” Laha nzi nga kari nzi mu nyika a vilope ya mina ya lisima, nzi lo engeta nziku: “Nzi tsetselele, a nzi na xifungo.”

I lo nzi maha ziwutiso zo kari na a hlamalanyana. A gumesa a nzi tiyisekisa lezaku i wa ta rumela a mubiko wa hina. Hi nzhako ka xikhati, nzi lo tiva lezaku wu chikelile le tsinza hi xikhati.

[Tlhamuselo wa lahasi]

[Tlhamuselo wa mifota ka phajina 8]

Jehova i lo vulula ndlela

[Tlhamuselo wa mifota ka phajina 8]

MAURICE RAJ

[Tlhamuselo wa mifota ka phajina 8]

Laha nzi nga kari nzi mu nyika a vilope ya mina ya lisima, nzi lo engeta nziku: “Nzi tsetselele, a nzi na xifungo”