Mu ta va tiva hi mihanzu yabye — A timhaka leti ti susilwe ka Anuário das Testemunhas de Jeová de 2013
Phajina 47 tinzimana 1 ni 2 — Afrika
“A Nungungulu loyi u mu khozelako i na ni ntamu”
Caro i hanya le Uganda. Anzhako ka hweti yinwe ntsena na a sangulile ku gonza Biblia, a nuna wakwe Martin, loyi a nga hi noyi, i lo sangula ku mu vukela. I te ngalo: “A tinguluve a ta ha ngheni laha kaya hi kota ya mabhuku ya wena.” I lo mu xanisa a tlhela aku i ta mu daya loku a nga tsiki ku gonza Biblia. I lo nyima ku hlayisa ngango. Caro i lo simama a rulile, a hlayisa ngango hi simu gakwe, a tlhela a simama kukha wutivi ga lisine. Hi kufamba ka xikhati, laha zi nga woneka khwatsi lezaku a wutomi gakwe gi le mhangweni, Caro i lo tsutsuma. Zi wa mu karatela nguvu ku kuma za kutihanyisa. Hambulezo, laha a ngazwa lezaku a vana va babya, i lo teka malana leyi a nga hi nayo a va xavela mimuri.
Anzhako ka xikhati xo kari, Caro i lo fonelwa hi nuna wakwe, aku: “Nzi kombela ku u wuya kaya. Nza zi wona lezaku a Nungungulu loyi u mu khozelako i na ni ntamu niku a nga ku tsiki. Nzi kombela ku u byela lava va ku gonzisako lezaku va ta nzi gonzisawu. Nzi lava ku cica mahanyela ya mina.” Martin i wa nga hembi. Zalezi a ngango wabye wu na ni kuzwanana ni litsako. Martin na Caro va lo bapatizwa zinwe ka gotsovanyano wu mahilweko hi Agosto wa 2012.
Phajina 52 nzimana 1 kala 6
‘I lo nzi nyika zakuga zakwe ni xihuku xakwe’
Na a hi ka gotsovanyano wa muganga wa 2010 le Chile, Marcelo wa khume ga malembe i lo wona lezaku a wanuna loyi a nga tshamile reveni gakwe i wa nga hi na bhuku ne ni ginwe.
I lo hlevela mamani wakwe aku: “A wanuna loyi a nga na Biblia.”
A mamani wakwe i lo mu hlevelawu aku: “Tirisa naye legi ga wena.” Hikwalaho, Marcelo i lo tshinela a tirisa Biblia ni wanuna loye, a vitwako Victor, a lanzelela naye yontlhe a mitsalo yi nga kumbukiwa. Hi xikhati xa kuhumula, Marcelo i lo hunzuluka a byela mamani wakwe aku: “A nga na zakuga.” A mamani wakwe i lo mu kuca a ku avelana naye lezi zakwe. Hikwalaho, Marcelo i lo mu nyika pawa ya ximanyisa ni kopo ya caya. Laha Victor a nga kari aga, Marcelo i lo mu komba a mavesi wontlhe ya Biblia lawa a nga hi nawo lomu hlokweni.
Ni gambo, va lo sangula kuswa hi mumu. Marcelo i lo hunzuluka kambe aku ngalo ka mamani wakwe: “A nga na xihuku.”
A mamani wakwe i lo hlamula aku: “Mu nyike lexi xa wena.” I lo mu nyika. A xikhati lexi a longoloko wu nga mbhela, Marcelo na Victor va lo salisana.
Ka gotsovanyano wa lembe gi nga lanzela, Marcelo i lo lavetela Victor kasi ku wona lezaku i tile ke. A nga no ku tsaka a xikhati a nga mu wona, lezo na a bohile thayi! A xikhati lexi Victor a nga wona Marcelo, i lo kanyuluka aku: “Nzi laha nyamutlha hi kota ya mufana loyi. A lembe gi nga hunza, nzi nyikilwe xirambo xa gotsovanyano, nzita. A mufana loyi i lo tirisa na mina a Biblia gakwe a tlhela a nzi nyika zakuga zakwe ni xihuku xakwe. Zalezi nzi kari nzi gonza Biblia!” Victor muhuweleli a nga bapatizwangiko makunu.