Papilo Ga Hubye Yi Fumako

Malanza-kulori ma ranzekako:

Hi mu tsalela a papilo legi hi kutsaka ka hombe nguvu kusanguleni ka lembe legi ga lisima nguvu! Kala kumbheleni ka 2014, ku ta ngha ku hunzile a zana ga malembe kusukela loku Jesu Kristu, a Hosi ya hina yo ranzeka, a sangulile ku fuma xikari ka valala vakwe. — Tis. 110:1, 2.

Kusanguleni ka lembe legi ga ntiro, ka mutlhangano wa lembe wa Sociedade Torre de Vigia de Bíblias e Tratados de Pensilvânia, a Kometi ya Wuhunzuluseli ga Misava Yiswa ga Biblia yi humesile a wuhunzuluseli ga gi nene nguvu ga Biblia ga xiNgiza gi chukwatisilweko gi nga ha kumiwako hi ni wihi munhu. Jehova i tirisile a vana wakwe va totilweko lezaku va humesa a Tradução do Novo Mundo. (Rom. 8:15, 16) A wu kholwi lezaku a mhaka leyi ntsena yi maha lezaku a wuhunzuluseli legi giva go hlawuleka ke?

Hi malembe yo hlaya, a Kometi ya Kutsala ya Hubye yi Fumako yi rangisa a kuhunzuluselwa ka Biblia. Inyamutlha, a Tradução do Novo Mundo ga kumeka gontlhe kutani hi xipanze hi 121 wa tirimi. Hi ku kuca lezaku u komba Jehova lezi u bongisako zona a Biblia legi. Gi gonze u tlhela u ehleketa hi gona siku ni siku. Hi ku maha loko, u taya u tshinela nguvu ka Muvangi wa gona, Jehova Nungungulu. — Jak. 4:8.

Ha xukuvala a xikhati lexi hi zwako minzhingo leyi a vamakabye va hina vo ranzeka va xinuna ni va xisati va kumanako nayo. Hi ku zwisisekako, ka zikhati zo kari zi nga ha va karatela a kuva va tsaka ni vamakabye vabye. Hi xikombiso, zalezanyana a ngango wo kari le Asia wu lo nghena hlomulweni wa hombe laha a mamani wa muti a nga kumana ni mababyi ya hombe hi xitshuketi. Hi kota ya kuva ma nga zwisiseki, a vadokodela a va zi kotangi ku cica xiyimo xakwe xa mababyi. A hi kuswara ka zona! Zalezi a nuna wakwe i mu khatalela a 24 wa tihora ta siku. A mufana wabye ni vanhanyana vabye va vambiri va nyika xikombiso xi nene kota maKristu hi ku seketela vapswali vabye hi liranzo. A ngango lowu zinwe na nwina nwentlhe mu hlulako a minzhingo yo hambanahambana mu ngazwa litsako li tako hi kutimisela a kuringwa ka kukholwa ka nwina. (Jak. 1:2-4) Jehova i tiyisa vatotilweko vakwe ni tiyivu tinwani lezaku hi ta tsaka hi ku simama hi hlula minzhingo, hakuva i ta hi katekisa hi ku hi nyika a wutomi ga pinzukelwa! — Jak. 1:12.

Ka Xialakanyiso xa kufa ka Jesu, xa nwecemu ku wa hi ni 19.241.252 wa vanhu. Hi nga wona lezi zi tiyisisako zona hlana a ku wona a vanhu vo tala na va dumisa Jehova na Jesu Kristu hi kuva kona ka mutlhangano wa lisima wa lembe wa vanhu va Nungungulu! Xikhatini xa nguva ya Xialakanyiso, ku vile ni ku kanyuluka ka magezu ya ku dumisa ya timiliyoni ta vahuweleli ti tirileko kota maphayona yo vunetela hi Março ni Abril. A hi kutiyisa ka zona hlana! Niku a wu tsaki hi ku tiva lezaku lava va tirako kota maphayona yo vunetela ka maenzo ya muwoneleli wa xipanze va nga ha ti buza hi mutlhangano wontlhe wa maphayona, hambu loku a lienzo lakwe li nga hi nzeni ka tihweti ta Março ni Abril ke? Lava va tlharihileko hi tlhelo ga moya va zwisisa lisima la kuva va tshama va khomekile ntirweni wa ku xumayela ni wa bandla. A ku tshama hi khomekile zi hi vuna a ku simama hi tiyile hi nga tsekatseki, hi hlula a minzhingo ya Diabolus ya ku daya kukholwa ka hina ni ya ku hi hambukisa. — 1 Kor. 15:58.

Hi nga wona lezi zi tiyisisako zona a ku tiva lezaku nzeni ka lembe ga ntiro gi hunzileko, a 277.344 wa vanhu va kombisile a kutihendleleta kabye hi ku bapatizwa hi mati, lava zalezi va nga ndleleni ya wutomi zinwe ni vamakabye vabye misaveni yontlhe! (Mat. 7:13, 14) A vanhu lava va vaswa va lava ku vuniwa hi hina lezaku va “tiyiswa kukholweni.” (Kol. 2:7) Ngha hi simama ku tiyisana lezaku hi timisela kala magumo. (Mat. 24:13) ‘Hi tiyisa-hlana lava va timbilu ti rerekileko, hi vuna lava va nga ni gome, hi hi ni lihlaza-mbilu ka vanhu vontlhe.’ (1 Tes. 5:14) Hi kugumesa, ngha a munwe ni munwani wa hina ‘a khongela a nga tsiki’ aku: “A wute mufumo wa wena.” — 1 Tes. 5:17; Mat. 6:10.

Tivani lezaku ha mu ranza nwina nwentlhe varanzi va Jehova!

Vamakabye va nwina,

Hubye yi Fumako ya Timboni ta Jehova