Afrika

A liranzo la hi tivekisa A mahungu lawa ma susilwe ka Anuário das Testemunhas de Jeová de 2014

Phajina 48 nzimana 1 kala phajina 49 nzimana 2

“Jehova ni tingelosi va tava vanghana va mina”

Mary wa 70 wa malembe le Kenya i wa lumba chechi ya Presbiteriano wutomi gakwe gontlhe. I wa vunetela chechi leyo lezaku yi kuma minyikelo niku i vunetele kuakeni ka chechi ya lomu a nga hanya kona. A xikhati lexi munwe wa vana vakwe a nga maha Mboni, Mary a nga tsakangi. A n’wana wakwe i wa mu ramba lezaku aya mitlhanganweni ya bandla, kanilezi Mary i wa ala aku i lava kuzwa mahungu ya Biblia hi lirimi lakwe la mabeleko la xiKikuyu, a nga lavi ku mazwa hi xiSwahili. Hi magumo, Mary i lo vumela xirambo xa kuya ka gotsovanyano wa muganga wu nga wa ta mahiwa hi xiKikuyu. Le gotsovanyanweni i lo ya tshama ka xipanze xa vakhosaheleko. I lo khumbiwa nguvu hi ndlela yi nene ni ya liranzo leyi va nga mu khoma hi yona. Mary i lo wula lezaku i wa nga se tshuka a wona liranzo lelo chechini yakwe. I lo demba khwatsi ndleve ka tikanelo tontlhe a tlhela a tsaka hi zontlhe a nga zizwa. A xikhati va nga mu bhulela hi xigonzo xa Biblia hi ku tirisa a broxura Ingisa Nungungulu, i lo tekela ku vumela.

Anzhako ka ku gonza tihweti ti tsongwani ntsena, Mary i lo boha kuva Mboni ya Jehova, hikwalaho i lo huma chechini yakwe. A varangeli va wukhongeli va lo zangara. Va lo vitana mufundisa wa le tsinza ka kona le Nairobi lezaku a ta wulawula naye. A mufundisa loye i lo zama ku mu khongotela lezaku a nga tsiki chechi leyo. I te ngalo: “U ta va kuma kwihi vanghana loku u tsika chechi? U na ni vanghana vo tala ni vaakelane va nga ka chechi leyi.”

Mary i lo hlamula aku: “Jehova ni tingelosi va tava vanghana va mina. A Timboni tonawu ti tava vanghana va mina.”

Laha zi nga tsanza, a mufundisa loye i lo tlhela. Mary i simama a kula xigonzweni xakwe xa Biblia niku waya mitlhanganweni yontlhe ya wuKristu, hambu lezi a hanyako kule ni laha yi mahelwako kona. Ka siku go kari a nga vumala mova wa xapa kasi kuya mitlhanganweni, i lo famba tihora timbiri hi mikonzo na a nelwa hi vula kasi ku chikela seyo. Hambu lezi a vaakelane vakwe va mu vukelako, Mary i ti yimisele ku chikelela kungo gakwe ga ku bapatizwa.

Phajina 69 nzimana 1, kala phajina 70 nzimana 2

“A wu no lahleka?”

A wasati wo kari wa muSomali le Sudão i lo rambiwa ku ta wona mitlhangano Salawini ya Mufumo, zonake a boha kuya. Kanilezi a zi mu fambelangi khwatsi. A nga kona a nga mu hoyozela; vanhu vontlhe va wo mu cuwuka. I lowa tingana. A wokari loyi kuzilava a mu wonileko lezaku a nga tlhatlheki i lo mu wutisa lezi: “A wu no lahleka?”

I lo hlamula aku: “Ina, ko khwatsi nzi lahlekile futsi!” A se khaga a ti fambela. Laha a nga kumana ni Timboni leti ti nga mu rambile, a wasati loyi i lo va byela hi ku khunguvanyeka lezaku a nga ta ha famba kambe. Va lo ti wutisa a ku zini zi nga humelela, hakuva a va mu wonangi Salawini ya Mufumo. Anzhako ka ku kokanyana bhulo, va lo zi zwisisa lezaku i no phazama a ya nghena ka chechi yo kari!

A Timboni leto ti lo mu kuca a ku tlhela a ringisa kuya Salawini ya Mufumo. I lo vumela, kanilezi i lo va byela lezaku a nga taza a hunzisa a khume ga timeneti loku zi nga mu khomi khwatsi. Kanilezi a xikhati a nga nghena lomu Salawini ya Mufumo, vontlhe lomu bandleni va lo mu hoyozela hi liranzo! I lo xalala nguvu hi kuva leyo laha ka kuza ava yena wo gumesa ku huma anzhako ka mutlhangano. Kusukela kwalaho, iya mitlhanganweni yontlhe niku zalezi muhuweleli a bapatizilweko.

[Tlhamuselo wa mifota ka phajina 4]

Europa

[Tlhamuselo wa mifota ka phajina 4]

MATIKO

47

VAHANYI

741.892.871

VAHUWELELI

1.601.915

ZIGONZO ZA BIBLIA

862.555