Kuvuka ka vafileko — zi ta koteka hi kota ya nzhiho

A Xialakanyiso xi hi nyika lungelo ga ku ehleketa hi makatekwa ma ha tako lawa ma to nehiwa hi nzhiho, yo kota kuvuka ka vafileko. Jehova i wa nga lavi lezaku a vanhu vafa. Hi xigelo lexo, a xinwe xa zilo lezi hi rilako nguvu hi xona ku felwa hi munhu hi mu ranzako. (1 Kor 15:26) Jesu i zwile kubayisa laha a nga wona vapizani vakwe na va rila kufa ka Lazaru. (Jo 11:33-35) Kota lezi Jesu a tekeleleko khwatsi Papai wakwe, hi nga tiyiseka lezaku Jehova yenawu wa bayiseka loku a hi wona na hi rila hi ku felwa hi lava hi va ranzako. (Jo 14:7) Jehova i xuva nguvu a xikhati lexi a to vuxa malanza yakwe hi ka vafileko, niku hinawu hi fanele ku zi xuva nguvu. — Job 14:14, 15.

Kota lezi Jehova a nga Nungungulu wa nongameto, hi na ni xigelo xa ku kholwa lezaku a vafileko va ta vuxiwa hi nongameto. (1 Kor 14:33, 40) Wutshanwini ga marilo, a vanhu va nga ha tlhangana kasi ku amukela lava va vuxiwako. Wa ehleketa hi kuvuka ka vafileko, nguvunguvu xikhatini xa makhombo ke? (2 Kor 4:17, 18) Xana wa mu bonga Jehova hi kuva a hi nyikile nzhiho ni ku hi komba lomu ka mitsalo lezaku a vafileko va ta vuka? — Kol 3:15.

• Ka maxaka ya wena ni vanghana, himani u xuvako nguvu ku mu wona kambe?

• Lomu ka Biblia, himani u xuvako nguvu ku mu wona ni ku bhula naye?