U nga ranga hi ku hlota kurula ni makabye wa wena hi ndlela muni?

Ti alakanyele na u hanya Galileya masikwini ya Jesu. U endzele Jerusalema kasi ku ya maha Mubuzo wa Mixaxa. A dhoropa gi tele hi vakhozeli-kuloni va tako hi ka matshamu yo hambanahambana. U lava ku nyikela muphahlo ka Jehovha. Na u hi ni mbuti ya wena, u suka u famba hi ndlela yi hundzako hi lomu cikari ka vanhu vo tala lomu dhoropeni na u kongoma tempeleni. Laha u chikelako, a tempeli yi tele hi vanhu lava vonawu va lavako ku nyikela miphahlo. Zvezvi i khati ga wena ga ku nyikela mbuti ya wena ka mupristi. Ka cikhati caleco u lavako ku nyikela u alakanya ku a makabye wa wena, loyi kuzvilava a nga cikari ka citshungu kutani lomu dhoropeni, i na ni mhaka yo kari na wena. Jesu i tlhamusela lezvi u faneleko ku maha. (Gondza Matewu 5:24.) Na mu landzela wusungukati ga Jesu, mu nga vhuxetisa kuyini kurula wena ni makabye wa wena a khunguvanyekileko? Ka xaxamelo wun’we ni wun’wani wu nga lahasi, chela certo laha ku nga ni cimaho ci faneleko.

U FANELE KU . . . 

• bhulisana ni makabye wa wena ntsena loku u alakanya lezvaku i na ni cigelo co zwala ca ku kwata

• zama ku lulamisa maalakanyo ya makabye wa wena loku u alakanya ku ova ni cizangazangani kutani loku yenawu a hi ni nandzu ka mhaka leyo

• mu ingisela hi lihlazva-mbilu laha a ti phofulako, niku hambu loku u nga mu zwisisi khwatsi kombela rivalelo hi mbilu yontlhe hi lezvi a khunguvanyekileko kutani hi kota ya wuyelo ga kuphazama ka wena

A MAKABYE WA WENA I FANELE KU . . .

• hlota ku vhuniwa hi van’wani lomu bandleni hi ku va byela lezvi u nga mu gohelisa zvona

• ku bhongela, a wulawula hi zvontlhe zvi mu khunguvanyesileko, a tlhela a lava ku u vhumela nandzu

• wona kutikoramisa ni kutiya-hlana loku ku ku mahileko u mu tshinelela, a tlhela a ku tsetselela hi mbilu yontlhe

Hambu lezvi a wukhozeli ga hina inyamutlha gi kalako gi nga ha patsi miphahlo ya zvihari, zvini lezvi Jesu a gondzisileko hi kuyelana ku nga kona cikari ka kuva ni kurula ni makabye ni wukhozeli gi amukelekako ka Nungungulu?