Hulda i no tatisa mixuvo yakwe

LOKU u tshukile u endzela cihlale citsongwani ca Sangir Besar le Indonésia ka malembana ma hundzileko, kuzvilava u wonile a vamakabye va hina va cisati va vanharu va tirako le bimbini. Va tiveka khwatsi cihlaleni hi ntiro wabye wa ku chumayela — va vhuna vanhu a ku zwisisa Bhibhiliya. Kanilezvi ka khati lego, va wa maha zvilo zvo hambana ni lezvi zvi nga tolovelekile.

A kusangula va no nghena lomu matini va kuma maribye yo bindza va ma humesa. A maribye yo kari ma wa ringana ni bhola. Hi kulandzela, a vavasati va wa tshama ka zvitulo zvo mahiwa hi mapulango va bandzela maribye hi hamela ma ringana ni tandza ga huku. Andzhako ka lezvo, va wa teka maribye lawo ya matsongwani va ma chela lomu ka bhaketi ga plastiko va famba nawo lomu va nga tshama kona. Hi kulandzela va chela maribye lawo ka tisakwa ta hombe ti nga ta tekiwa hi mikamiyawu kasi ma ya tirisiwa ku aka hi wona a ruwa.

A mun’we wa vamakabye lavo ku wa hi Hulda. A ciyimo cakwe ci mu vhumelele ku a mbheta cikhati co leha na a maha ntiro lowo. Hi tolovelo, i wa ta tirisa mali leyo kasi ku hakhela zvilaveko zva siku ni siku zva ngango. Kanilezvi hi khati galegi ga gin’we i wa hi ni kungo gin’wani. I wa lava a thableti lowu wu nga wa ta mu vhuna ku a kuma JW Library^®. Hulda i wa zvi tiva lezvaku a tivhidhio ni mahungu man’wani ma nga lomu ka JW Library^® zvi wa ta mu vhuna ntirweni wa kuchumayela van’wani ni ku zwisisa a Bhibhiliya.

Hulda i mbhetile hweti ni khihlanya na a tira tihora timbiri ni mixo a ku bandzela maribye ma ringanako ku tata cipangwa ca kamiyawu wa wu tsongwani. Hi magumo i no kuma mali yo enela kasi a xava thableti.

Hulda i wula lezvi: “Hambu lezvi ndzi nga karele ni kuzwa kubayisa hi ku bandzela maribye, ndzi hatlisile ndzi rivala a kubayisa ndzi nga kuzwa laha ndzi nga tirisa a thableti lowu wa wuswa, wu nga ndzi vhuna ku ndzi humelela khwatsi ntirweni wa kuchumayela ni ku zvi ndzi olovela a ku longisela mitlhangano.” A tlhela a wula lezvaku a thableti wu mu vhunile a cikhati ku nga sangula a ntungu, kota lezvi a mitiro ya bandla yi nga kala yi nga ha mahiwi hi nghohe ni nghohe. Hi tsaka zvin’we na Hulda hi kuva a tatisile mixuvo yakwe.