Cini stress?

A stress hi lezvi zvi humelelako lomu mirini loku hi kumana ni ciyimo co bindza. A wongo gi humesa ma hormônio yo tala ma hangalaka lomu mirini wontlhe. Lezvi zvi mahako ku a mbilu yiba hi kuhatlisa nguvhu, a matsutsumela ya nkhata lomu mirini ma cica, u hefemuteka ku tlhela ku gwimbeka misiha. Na u nga se zvi pola a ku zvini zvi mahekako, a miri wu sina wu longile ku maha cokari. Loku a stress ci hundza, a miri wo rula wu tlhela ka ciyimo co toloveleka.

STRESS CA CI NENE NI CA HAVA

A stress hi lezvi a miri wu mahako kasi wu zvi kota kulwa ni zviyimo zvo karata kutani zva mhango. A zvilo lezvo zvi sukela lomu ka wongo. A stress leci ca ci nene ci ku vhuna ku u maha co kari hi kuhatlisa. Ci nga ku vhuna ku chikelela a makungo ya wena kutani ku maha khwatsi a zvilo zvo kari. Kuzvilava ci nga ku maha u zvi kota ku maha khwatsi a exame, ku kambelwa ku kuma ntiro, kutani ka zvibelabela.

Hambulezvo, a stress ca hombe, co teka cikhati co leha kutani co kala ci nga hundzi ci nga ku vangela mhango. Loku u tshamela a kuva ni stress, u nga sangula a ku xaniseka hi tlhelo ga miri, ga kutizwa ni ga mapimo. A mahanyela ya wena ni lezvi u va khomisako zvona van’wani zvi nga cica. A stress co kala ci nga hundzi ci nga maha munhu a sangula kunwa nguvhu byala, a tirisa madroga, a tirisa mimuri hi ndlela ya hava, aga zvo hundza mpimo, a dzaha, ni zvin’wani zvilo zvo biha. Ci nga tlhela ci maha ku a karateka nguvhu, a mbhela ntamu hambu ku alakanya ku ti daya.

A stress a ci khumbi vanhu hi ndlela yo fana, hambulezvo ci maha lezvaku kuva ni mababyi yo hambanahambana. Niku ci nga khumba a miri wontlhe.