Tiva zvontlhe zvi patsekako

Ka mhaka leyo

A kutala ka zvikhati a cihlawulela ci seketelwa ka mahungu yo kala ma nga hi lisine. Wona a zvikombiso zvi landzelako:

A vapatrawu vokari va na ni kukholwa ka hava ka lezvaku a vavasati a va na wuzvikoti ga ku maha mitiro yi lavako wutlhari ga hombe, ntamu ni wutivi.
Le Europa, a vaJudha va wa hembelwe ku va chelile vheneno ni ku hangalasile mababye. Ka mufumo wa vaNazi, a vaJhudha va wa lumbetiwile kambe. Kanilezvi ka khati legi va waku va vanga wusiwana le Alemanya. Zvontlhe lezvo zvi mahile lezvaku a vaJhudha va vengiwa, hambu nyamutlha ha wona vanhu na va vengiwa.
A kutala ka vanhu va chikelela a magumo ya hava ya lezvaku vontlhe vanhu va na ni wulima go kari.

A vanhu lava va kholwako ka mitsheketo va kuma zvilo kasi ku seketela a cihlawulela cabye. Niku va alakanya lezvaku vontlhe lava va kalako va nga yimi navo a va tivi.

Tshinya ga nayo ga Bhibhiliya

“A mixuvo yi nga hiko na kupimisisa a yi sasekangi.” — MAVINGU 19:2.

Lezvi zvi wulako zvona: Loku hi nga tivi a lisine hi nga maha zviboho zvo kala zvi nga hi zvi nene. Loku hi kholwa ka mitsheketo na ku nga hi ka lisine, hi nga lamula vanhu hi ndlela ya hava.

Lezvi a ku tiva lisine hi mhaka yo kari zvi hi vhunisako zvona

Loku hi tiva lisine xungetano hi vanhu, hi nga ta kholwa zvilo zva hava lezvi a vanhu va wulako hi vona. Niku loku hi tiva lezvaku a zvilo lezvi va wulako hi vanhu lavo a hi lisine, hi nga ta tsutsumela ku kholwa lezvi hi nga zvizwa xungetano hi vanhu lavo.

Zvikombiso zva zvilo zvi mahekileko: Jovica (Bálcãs)

Jovica loyi a kombukilweko kusanguleni ka ndzima leyi, i kulile na azwa zvilo zva hava xungetano hi ntlawa wokari wa vanhu ka vanhu va lomu tikweni gakwe hi lomu ka radhio ni televhizawu. I wula lezvi: “Ndzi no tala hi cihlawulela ni livengo hi vanhu lavo. Niku ndzi wa alakanya ku a ndlela leyi ndzi nga tizwa hi yona yi wa nga bihanga.”

“Hambulezvo, cikhatini ca yimpi, ndzi wa nga hi na ndlela ya ku hlawula ku ndzi wa ta tira na vamani, hikwalaho ndzi wa hanya ni ku tira zvin’we ni masochwa lawa ma nga kari ma chepetiwa. Ka cikhati leco, ndzi gondzile zvo tala hi vanhu lavo. Ndzi no sangula a ku gondza a lirimi labye ni ku ingisela a tisimu tabye. Ndzi no tirisana navo hi ndlela ya yi nene, niku va wona hi ndlela yo hambana. Hambu lezvo ka zvikhati zvin’wani a cihlawulela ca tshuka ci ndzi xiyelela, hikwalaho ndzi ti karatela ku potsa ku ingisela mahungu ya hava hi vanhu lavo. A ndzi sixtiri mafilmi ma kombako zvilo zva hava hi vanhu lavo hiku zvi nga maha ku a cihlawulela ci zima mitso mbilwini ya mina.”

Lezvi u nga mahako

A vanhu va nga wula lezvaku a tlawa lowu wa vanhu wu na ni matshamela yokari ya hava. Kanilezvi alakanya lezvaku a vokari va tlawa lowo a va na matshamela lawo yo biha.
Tiva lezvaku a hi zvontlhe u zvi tivako hi vanhu lavo.
Zama ku tiva lisine ka cibhuka co tsumbeka.