Dina A Wela Hlomulweni

WA VA wona a ku hi vamani lava Dina a yako a ya va wona? Yena iya a ya wona vanhanyana vo kari va hanyako tikweni ga Kanani. Xana raru wakwe Jakobe i wa ta tsaka hi lezo? Kasi ku zi kota ku hlamula xiwutiso lexo, ringa ku alakanya lezi Abrahama na Isaka va nga wa zi pimisa hi vavasati va Kanani.

Xana Abrahama i wa lava lezaku n’wana wakwe Isaka a teka nhanyana wa Kanani? Ahihi, i wa nga zi lavi. Xana Isaka na Rebeka va wa lava lezaku n’wana wabye Jakobe a teka nhanyana wa muKanani? Ahihi, va wa nga zi lavi. Wa zi tiva a ku hikuyini?

Hakuva vanhu lavo va Kanani va wa khozela vanungungulu va mawunwa. Va wa nga hi vanhu va nene va ku hanya navo kota vanuna ni vasati, niku va wa nga hi vanhu va nene a ku hanya navo kota vanghana va laha kusuhani. Hizalezo ha zi kota ku tiyiseka lezaku Jakobe i wa nga ta xalaliswa hi ku a n’wana wakwe wa nhanyana a maha wunghana ni vanhanyana lavo va maKanani.

Hakunene, Dina i lo wela hlomulweni. Wa mu wona wanuna loyi wa muKanani laha ka mufananiso a cuwukako Dina? A vito gakwe hi Xekemi. Siku go kari na Dina a huma a ku ya va wona, Xekemi i lo mu teka a mu kurumeta a ku etlela naye. Lezo zi wa bihile, hakuva ntsena vavanuna ni vavasati va tekanileko hi vona va faneleko ku etlela zinwe. Kubiha loku Xekemi a nga ku maha ka Dina ku lo yisa hlomulweni wa hombe.

Loku vamakabye va Dina va zwile lezi zi nga maheka, va lo zangara nguvu. Vambiri va vona, Simeoni na Levi, va lo zangara hi ntamu laha ko kala va teka tisupado vaya doropeni va ya kuma vavanuna na va nga va rinzelangi. Vona ni vanakulobye va lo daya Xekemi ni vontlhe vanwani vavanuna. Jakobe i lo zangara hi lezi vana vakwe va vafana va nga maha nchumu lowo wo biha.

Wu sangulisile kuyini wontlhe hlomulo lowo? Hakuva Dina i lo maha wunghana ni vanhu va nga kala va nga ingisi milayo ya Nungungulu. Hina a hi lavi ku maha wunghana lego, a hi zona?