Lixaka Liswa La Zakuga

WA ZI kota ku wula a ku zini lezi a vanhu lava va zi rolelako lahasi? Zi fanana ni hunguva. Zilo zo basa, na zi hi zirenzelekwani za zitsongwani. Kanilezi a hi hunguva; zilo zo giwa.

Ku hunzile xipimo xa hweti ntsena na vaIsraeli va humile Gipite. Vona va le xiwuleni. Laho a ku kuli khwatsi timbewu, hikwalaho a vanhu vo vilela, vaku: ‘Ku wa hi chukwana ku ngha Jehova a hi dele le Gipite. Hi wutsongwani ga kona hi wahi ni zakuga zontlhe lezi hi nga zi lava tikweni legiya.’

Hizalezo Jehova i ngalo: ‘Nzi ta nisa zakuga hi le hehla.’ Lezo hi zona a nga maha Jehova. Ka mixo lowu wu nga lanzela a vaIsraeli va wona zilo lezi zo basa zi ngana, va wutisana: ‘Zini lezi?’

Mosi i ngalo: ‘Lezi hi zona zakuga lezi Jehova a mu nyikako a kuva muga.’ A vanhu va zi vitana a ku i MANNA. Zi nanziha a ku kota zibabana zi mahilweko hi wulombe.

Mosi i va byela ku ngalo: ‘Rolelani kota lezi a munwe ni munwani a zi kotako kuga.’ Hizalezo a mixo ni mixo vona va maha lezo. Kasike, loku a gambo gi hisa, a manna ma seleko lahasi mo nyeka.

Mosi i tlhela aku: ‘Ngha ku ngave kona munhu loyi a siyako manna kala manziko.’ Kanilezi vo kari xikari ka vona a va ingisi. Wa zi tiva lezi zi humelelako? Ni mixo wa kona a manna lawa va nga ma siya ma tele hi ziwungwani, ma tlhela ma sangula ku nuha!

Hambulezo, ku na ni siku ginwe nzeni ka viki laha Jehova a leletelako a vanhu a ku rolela tipimo timbiri ta manna hi kuengetela. Lego i siku ga wuntlhanu ni ginwe. Jehova i va byela a ku hlayisa a manna yo kari kala manziko wa kona, hakuva yena a nga ta ma nisa ka siku ga wuntlhanu ni mambiri. Loku va hlayisa a manna lawo kala ka siku ga wuntlhanu ni mambiri, a ma tali hi ziwungwani niku a ma nuhi! Lexo xihlamaliso xinwani!

Ka wontlhe malembe lawa a vaIsraeli va nga xiwuleni Jehova i va wundla hi manna.