Nungungulu A Vuna Hosi Hezekia

WA ZI tiva a ku hikuyini a wanuna loyi a khongelako ka Jehova? Hikuyini a andleleko mapapilo lawa mahlweni ka alati ya Jehova? A wanuna loyi hi Hezekia. Hi yena hosi ya tixaka timbiri ta ka Israeli ta le dzonga. Zalezi yena i lomu zikaratweni za hombe. Hikuyini?

Zi tano hakuva a mabutho ya vaAsiria ma sina ma lovisile a tixaka ta 10 ta le nwalungu. Jehova i vumelisile ku lezo zi maheka hakuva a vanhu lavo va wa bihile nguvu. Niku zalezi a mabutho ya vaAsiria ma tile a ku talwa ni mufumo wa tixaka timbiri.

A hosi ya Asiria ya ha hi ku rumelela mapapilo Hosi Hezekia. A mapapilo lawo hi walawa Hezekia a ma vekileko mahlweni ka Nungungulu. A mapapilo lawo ma kanyisa Jehova, ma tlhela ma byela Hezekia lezaku a tsika kulwa. Hizalezo zi mahako lezaku Hezekia a khongela aku: ‘O Jehova, hi ponise mandleni ya hosi ya Asiria. Zonake a matiko wontlhe ma ta zi tiva lezaku hi wena wece u nga Nungungulu.’ Ina Jehova i ta ingisa Hezekia ke?

Hezekia i hosi ya yi nene. A nga fanani ni tihosi to biha ta mufumo wa Israeli wa tixaka ta 10, kutani raru wakwe wo biha Hosi Ahaza. Hezekia i sina a ti wonela a ku ingisa milayo yontlhe ya Jehova. Makunu, anzhako ka ku Hezekia a mbhetile ku khongela, muprofeti Isaya i mu rumelela gezu gi tako hi ka Jehova gi nge ngalo: ‘A hosi ya Asiria yi nga ta nghena Jerusalema. Hambu ni munwe wa masochwa yakwe a nga ta tshinela kusuhani na gona. Va nga ta phanda ligalala ni linwe lomu doropeni.’

Cuwuka a mufananiso lowu ka phajina leyi. Wa zi tiva a ku hi vamani a masochwa wontlhe lawa ma fileko ke? Masochwa ya maAsiria. Jehova i lo rumela a ngelosi yakwe, zonake hi wusiku ginwe yona yi lo daya a 185.000 wa masochwa ya vaAsiria. Hizalezo a hosi ya Asiria yi tsika kulwa yi tlhelela kaya.

A mufumo wa tixaka timbiri wu ponisilwe, ni vanhu va kuma kurula hi xikhati xo kari. Kanilezi anzhako ka kufa ka Hezekia a n’wana wakwe Manasa i maha hosi. Manasa ni n’wana wakwe Amoni, loyi a nga mu lanzela, tihosi to biha nguvu hi wumbiri ga tona. Hikwalaho a tiko gi tlhela gi tala hi wugevenga ni timholova. Laha Hosi Amoni a dawako hi malanza ya yena wutsumbu, a n’wana wakwe Josia i mahiwa hosi ya mufumo wa tixaka timbiri.