Wukhumbi Le Babuloni Kala Kuaketweni Ka Makhurisi Ya Jerusalema

Laha va nga hi wukhumbini le Babuloni, a vaIsraeli vave ni ziringo zo tala za kukholwa kabye. Xadrake, Mexake na Abed-nego va lo hoxiwa nzhimbyeni wa pingo ga nzilo, kanilezi Nungungulu i lo va humesa lomo na va hanya. Loku ku hunzile xikhati, anzhako ka kuhlulwa ka Babuloni hi vaMedi ni vaPersia, Danieli i lo hoxiwa nkeleni wa tinghala, kanilezi konawu lomo Nungungulu i lo mu vikela hi ku vala a milomu ya tinghala.

Hi kugumesa, hosi Kurusi wa muPersia i lo tlhatlhisa vaIsraeli. Vona va lo tlhelela tikweni gabye loku ku hunzile a 70 wa malembe futsi anzhako ka kuve va yisilwe Babuloni kota tikhumbi. Xinwe xa zilo zo sangula ka lezi va nga zi maha xikhatini lexi va nga tlhelela Jerusalema ku wa hi ku sangula ku aka a tempeli ya Jehova. Hambulezo, na ku nga se hunza xikhati xo leha a valala va lo nyimisa a ntiro wabye. Hikwalaho a tempeli yi zile yi mbhela loku ku hunzile xipimo xa 22 wa malembe anzhako ka loku va tlhelele Jerusalema.

Hi kulanzela, hi gonza hi pfhumba ga Ezra ga kutlhelela Jerusalema lezaku a ya sasekisa a tempeli. Lezo zi mahekile a 47 wa malembe anzhako ka kumbhela ka tempeli. Makunu, loku ku hunzile a 13 wa malembe anzhako ka pfhumba ga Ezra, Nehemia i lo vunetela a ku aketa a makhurisi ya Jerusalema ma nga khungumulilwe. A Xipanze xa wuNTLHANU xi eneta a 152 wa malembe ya matimu kala xikhatini lexo.