Le Xitsungeni Xa Maoliva

LOYI hi Jesu na a hi Xitsungeni xa maOliva. A vavanuna lava va mune hi vapostoli vakwe. Vona va ka makabye Andreu na Pedro, ni va ka makabye Jakobe na Johani. Liyani i tempeli ya Nungungulu le Jerusalema laha u zi kotako ku yi wona kwale ka pfhuka.

Ku hunzile masiku mambiri kusukela laha Jesu a ngaya Jerusalema hi ximbongolana. Makunu i siku ga Mambiri. Mahlweni ka xikhati xalexi ka galegi siku Jesu i wa hi tempeleni. Kwaseyo a vapristi va zamile ku mu khoma lezaku va mu daya. Kanilezi va wa chava ku mu maha lezo hakuva a vanhu va mu ranza Jesu.

Jesu i lo vitana a varangeli lavo va wukhongeli ku ngalo: ‘Nwina tinyoka ni vana va tinyoka!’ Jesu i te ngalo Nungungulu i wa ta va tsayisa hi kota ya zilo zontlhe zo biha lezi va mahileko. Anzhako ka lezo Jesu i lo kanziha ata Xitsungeni xa maOliva, zonake a vapostoli lava va mune va lo sangula a ku mu maha ziwutiso. Wa zi tiva lezi va mu wutisako Jesu?

A vapostoli vo wutisa zilo xungetano hi wumanziko. Va zi tiva ku ngalo Jesu i ta mbheta a wubihi gontlhe misaveni. Kanilezi vona va lava ku tiva a ku hi rini zi to maheka lezo. Hi rini a to wuya Jesu lezaku a ta fuma kota Hosi?

Jesu wa zi tiva ku ngalo a valanzeli vakwe misaveni va nga ta zi kota a ku mu wona loku a wuya. Zi maha lezo hakuva yena i tava le tilweni, niku vona va nga ta zi kota ku mu wona kwaseyo. Hikwalaho Jesu i byela vapostoli vakwe a zilo zo kari za lezi zi to humelela misaveni a xikhati lexi a to ngha a fuma kota Hosi le tilweni. Hi zihi zo kari za zilo lezo?

Jesu i ngalo ku tava ni tiyimpi ta hombe, a vanhu vo tala va ta babya ni kuva ni ndlala, a wugevenga gi ta anza nguvu, niku ku tava ni kutsekatseka ka hombe ka misava. Jesu kambe i ngalo a mahungu yo saseka xungetano hi mufumo wa Nungungulu ma ta xumayelwa misaveni yontlhe. Ha tshuka hi zi wona zilo lezo na zi maheka xikhatini xa hina? Ina! Niku hizalezo ha zi kota ku tiyiseka lezaku zalezi Jesu wa fuma le tilweni. Lokuloku yena i ta mbheta a wubihi gontlhe misaveni.