A Jaha Gi Nga Etlela

HI NGA wona! Zini zi mahekako laha ke? Gi ngava gi bayisilwe nguvu a jaha legi gi etleleko lahasi? Cuwuka! A munwe wa vavanuna lava va humako hi lomu ndlwini hi Paule! Wa mu wonawu Timote kwalaho? Xana i lowa a mufana loye hi laha njhaneleni?

Ina, hi zona lezo zi nga maheka. Paule i wa kari a veka a kanelo ka vapizani laha Troasi. Yena i wa zi tiva ku ngalo i wa nga ta va wona kambe hi xikhati xo leha hakuva i wa fanele ku suka hi taru hi manziko wa kona. Hikwalaho yena i lo simama a ku wulawula kala xikari ka wusiku.

Makunu, a jaha legi gi vitwako Etikusi gi wa tshamile laha njhaneleni, zonake gi etlela. Gi lo wela handle ka njhanela, kusukela ka xitezi xa wunharu kala hasi! Hizalezo wa zi kota ku zi wona a ku hikuyini vanhu lava va karatekako. Laha a vavanuna va tlakulako a jaha, ku humelele lezi va zi chavako. Gi file!

Laha Paule a wonako lezaku a jaha gi file, yena i gi etlelela a gi angarela. Zonake aku ngalo: ‘Mu nga karateki. Gona gi khwatsi!’ Futsi gi khwatsi! Lexo xihlamaliso! Paule i gi vuxile gi hanya! A xidlemo xi khonwa hi kutsaka ka hombe.

Vona vontlhe va tlhela vaya le hehla va yaga. Paule i simama ku wulawula kala gica. Kanilezi u nga tiyiseka lezaku Etikusi a nga tlheli a etlela! Makunu Paule, Timote ni lava va enzako zinwe navo va enghena tarwini. Wa ku tiva lomu va yako kona?

Paule zalezo o gumesa a pfhumba gakwe ga wunharu ga kuxumayela, zonake i le ndleleni ya ku tlhelela kaya. Lomu pfhumbeni gakwe Paule i wa tshamile malembe manharu le doropeni ga Efesusi ntsena. Hikwalaho legi i pfhumba ga hombe nguvu a ku hunza legi ga wumbiri.

Anzhako ka kuva gi sukile Troasi, a taru gi nyima a xikhatanyana le Miletu. Kota lezi Efesusi ku nga tikilometro titsongwani ntsena hi laho, Paule i vitanisa madota ya bandla lego lezaku mata Miletu na a fela ku ta wulawula nawo hi khati go gumesa. Anzhako ka xikhati, laha xi chikelako xikhati xa ku a taru gi suka, a hi kubayiseka loku va nga nako hi ku wona Paule na a famba!

Hi kugumesa a taru gi wuya Kesaria. Na Paule a kari a tshama laho le mutini wa mupizani Filipu, muprofeti Agabusi i nyika xitiviso ka Paule. Yena i ngalo Paule i ta mahiwa peresu loku aya Jerusalema. Niku hi lisine la kona, lezo hi zona zi mahekako. Makunu, anzhako ka kuva a tshamile paxweni hi malembe mambiri le Kesaria, Paule i rumelwa Roma lezaku a ya lamulwa hi Kesari a mufumeli wa Roma. A hi woneni lezi zi mahekako lomu ndleleni ya kuya Roma.