A madimoni ma kuca wuhluwuki ga ku lwisana na Nungungulu

Kasi hikuyini Satani ni madimoni yakwe va zamako tindlela tontlhe lezaku va khohlisa vanhu? Va maha lezo hakuva va lava a ku hinawu hi ti patsa wuhluwukeni gabye. Va lava lezaku hi khozela vona. Niku va lava a ku hi kholwa mawunwa yabye ni ku maha zilo zi nyenyiwako hi Jehova. A kutala ka zilo lezo zi patsa mikhuwo yi fambelanako ni vafileko.

A kufa ka munhu a ranzekako ka vanga kubayisa, hikwalaho a zi bihangi niku za fanela a ku kombisa kubayiseka. Laha a nga file munghana wakwe Lazaru, Jesu i lo “rila.” — Johani 11:35.

Ku nani mikhuwo yo tala yi fambelanako ni kufa, niku yona yi nani kuhambanahambana ka hombe misaveni yontlhe. A yo tala a yi lwisani ni matshinya ya milayo ya Biblia. Kanilezi yi kona leyi yi seketelwako ka maalakanyo yaku a vafileko va hanya niku va zi kota ku wona lava va hanyako. A tinkhozo ta ku rinzela mufi, a kurila ko hunzisa mpimo, ni malahlela ma patsako zilo zo tala nguvu, a tshinya ga zontlhe lezo hi kuchava a ku zangarisa mimoya ya vafileko. Kanilezi na zi tiveka ku ngalo a vafileko “a va tivi nchumu,” lava va mahako zilo lezo vo vuvumisa mawunwa ya Satani. — Mutshawuteli 9:5.

Yinwani mikhuwo kutani tinkhozo yi humelela kukholweni loku kaku a vafileko va lava ku vuniwa hi vahanyako niku loku va nga xalaliswi va ta va mahela kubiha. Ka matiko yo kari ku mahiwa mibuzo ni miphahlo loku ku tlhangana a 40 wa masiku kutani lembe anzhako ka kufa ka munhu. Va maha lezo na va alakanya lezaku vo vuna mufi a ku ‘tsemakanya’ a ya lomu ku tshamako zivangwa za moya. Wunwani mukhuwo wo toloveleka hi lowu wa ku nyika a vafileko a zakuga ni byala.

A zilo lezo zi bihile hakuva zi vuvumisa mawunwa ya Satani xungetano hi vafileko. Xana Jehova i wa ta xalala hi ku hina hi ti nghenisa ka mikhuwo yi seketelwako tigonzweni ta madimoni? Cima i wa nga ta zi vumela! — 2 Va Le Korinte 6:14-18.

A malanza ya Nungungulu wa lisine a ma hlengeli ka mikhuwo yi seketelako mawunwa ya Satani. A wutshanwini ga lezo, hi liranzo, wona ma veka kupima kuvuneni ni kutangaliseni ka vahanyako. Ma zi tiva a ku loku munhu afa, hi Jehova ntsena a zi kotako ku vuna a munhu loye. — Joba 14:14, 15.

A wungoma ga koniwa hi Nungungulu

A vanhu vo kari va ti tlhanganyisa ni madimoni hi kukongoma kutani hi ku tirisa a mungoma. Lezo zi vitwa a ku wungoma. A wuloyi, wutumbe, tihlolo ni kuwutisa tinguluve, zontlhe lezo tixaka ta wungoma.

A Biblia ga kona a zilo lezo, giku: “Ngha ku nga kumiwi ni munhu munwe ka wena . . . loyi a tirako wutumbe, kutani mungoma, ni mulori, ni noyi, ni loyi a fembako, ni loyi a vumbako, ni loyi a wutisako tinguluve. Hakuva kani hi wihi a mahako lezi zilo, xinyenyeko ka Jehova.” — Deuteronome 18:10-12.

Hikuyini Jehova a hi tlharihisako hi mawulawulela lawo yo binza xungetano hi mikhuwo leyo?

Jehova i hi tlharihisa a kuva hi ti wonela ka tixaka tontlhe ta wungoma kasi zi hi fambela khwatsi. Yena wa ranza vanhu a tlhela a va khatalela, niku wa zi tiva a ku lava va ti tlhanganyisako ni madimoni hakunene va ta xaniseka.

A munhu munwani a xanisekileko hi lezo kuve Nilda, a nga hi mungoma le Brasil. A madimoni ma lo onha a wutomi gakwe. Yena i ngalo: “A mimoya . . . yi lo nzi fumela, yi nzi yingayingisa. Nzi wa kari nzi titivala ni ku vuka, nzi tlhela nzi tshama xipitali hi kota ya mababyi ya lihlanyo. A madimoni ma lo nzi hlupha nguvu laha ko kala a hloko ya mina yi khumbeka. Nzi lonwa mimiri ya ku rulisa miehleketo nzi tlhela nzi sangula a ku tshama hi kunwa ni ku dzaha. Lezo zi lo simama hi malembe.”

Hi kufamba ka xikhati, Nilda i zi kotile ku ti tlhatlhisa ka madimoni hi ku vuniwa hi Jehova ni Timboni takwe ta laha misaveni, zonake ka xikhati lexi yena i hanya wutomi gi nene, gi tsakisako. Yena i ngalo: “Nza khongotela vontlhe lezaku cima va nga ti tlhanganyisi ni mimoya [yo biha], ge hambu hi xikhatanyana.”