Xigonzo 3

Hi Mani Jesu Kristu?

Hi kuyini Jesu a vitanwako ku i N’wana wa Nungungulu “wa matewula”? (1)

Hi kuyini a vitanwako ku i “Gezu”? (1)

Hi kuyini Jesu a tileko laha misaveni kota munhu ke? (2-4)

Hi kuyini a mahileko zihlamaliso? (5)

Xana i ta maha yini Jesu ka xikhatanyana xitako? (6)

1. Jesu i hanyile le tilweni kota munhu wa moya na a nga se ta laha misaveni. Yena xivangwa xo sangula xa Nungungulu, hikwalaho a vitaniwa ku i N’wana wa Nungungulu “wa matewula”. (Va Le Kolosi 1:15; Kuvululelwa 3:14) Jesu hi yena N’wana wa munwe loyi Nungungulu a mu vangileko ha yece. Jehova i tirisile Jesu na a nga se va munhu kota “xigogo xa mitiro” a ku vangeni ka yontlhe yinwani michumu le tilweni ni laha misaveni. (Mavingu 8:22-31; Va Le Kolosi 1:16, 17) Nungungulu i mu tirisile kambe kota muwulawuli wakwe wa hombe. Hi kota ya lezo Jesu i vitaniwa ku i “Gezu”. — Johani 1:1-3; Kuvululelwa 19:13.

2. Nungungulu i rumelile N’wana wakwe a misaveni hi ku rurisa a wutomi gakwe gi ya ka khwiri ga Maria. Hikwalaho Jesu a nga zangi a ve ni raru wa munhu. Hizalezo a nga tlulelwangi hi xionho ge hambu hi ku kala ku mbhelela. Nungungulu i rumelile Jesu a misaveni hi zigelo zinharu: (1) ku ta hi gonzisa lisine xungetano hi Nungungulu (Johani 18:37), (2) kasi ku ta komba kutsumbeka ko mbhelela, a hi nyika xikombiso hi felako ku xi lanzela (1 Pedro 2:21), ni (3) ku ta nyikela a wutomi gakwe, kasi ku hi hlanguta ka xionho ni kufa. Lezo zi wa laveka hi kuyini ke? — Mateu 20:28.

3. Hi ku nga ingisi xilayelo xa Nungungulu, a munhu wo sangula, Adamu, i mahile lezi a Biblia gi nge “xionho”. Hi kota ya lezo Nungungulu i mu tsayisile hi kufa. (Genesisi 3:17-19) Yena a wa nga ha ringani ni zileletelo za Nungungulu, hizalezo a wa nga ha mbhelelangi. Hi kutsongwani-kutsongwani i khosahele, a guma afa. Adamu i tluletile a xionho ka vontlhe vana vakwe. Hi kota ya lezo nahinawu hi khosahalako, hi babyako, hi magumo hi fako. A zi ta kotekisa kuyini ku ponisa vanhu ke? — Va Le Roma 3:23; 5:12.

4. Jesu i wa hi munhu wo mbhelela ku fana na Adamu. Ku hambana na Adamu, Jesu i ingisile Nungungulu hi ku mbhelela, hambu hasi ka nzhingo wa hombe nguvu. Hi kota ya lezo yena i zi kotile ku nyikela a wutomi gakwe go mbhelela hi xionho xa Adamu. Lezi hi zona a Biblia gi zi vitanako ku i “nziho”. Hi ndlela leyi a zi koteka ku a vana va Adamu va tlhatlheka ka tsayiso wa kufa. Vontlhe va kholwako ka Jesu va nga tsetselelwa zionho zabye va tlhela va kuma wutomi ga pinzukelwa. — 1 Timote 2:5, 6; Johani 3:16; Va Le Roma 5:18, 19.

5. A xikhati Jesu a nga hi laha misaveni, i chumile vababyi, i gisile lava va nga hi ni ndlala ni ku rulisa mabhubhutsa. A zile a vuxa ni vafi. Hi kuyini a mahileko zihlamaliso ke? (1) I wa tsetsa vanhu va nga xaniseka ni kambe i wa lava ku va vuna. (2) A zihlamaliso zakwe zi tiyisile ku i wa hi N’wana wa Nungungulu. (3) Zi kombisile lezi a to zi mahela vanhu la’va ingisako loku a fuma kota Hosi ya misava. — Mateu 14:14; Marku 2:10-12; Johani 5:28, 29.

6. Jesu i file, kambe Nungungulu i mu vuxile kota xivangwa xa moya, a guma a tlhela tilweni. (1 Pedro 3:18) Kusukela ka xikhati lexo, Nungungulu i mu mahile Hosi. Hi xikhatanyana xi tako Jesu i ta susa kubiha ni kuxaniseka kontlhe laha misaveni. — Tisimu 37:9-11; Mavingu 2:21, 22.

[Mifota ka phajina 7]

A ntiro wa Jesu wu patsile ku gonzisa, ku maha zihlamaliso ni ku nyikela wutomi gakwe hi kota ya hina