Xigonzo 5

Hi Gihi Khungo Ga Nungungulu Xungetano Ni Misava?

Jehova i vangele yini misava ke? (1, 2)

Hi kuyini inyamuthla a misava yi nga hiko paradise ke? (3)

Ku ta humelela yini ka lava vo biha ke? (4)

Xikhatini xitako i ta maha yini Jesu hi vababyi, hi lava va khosaheleko ni vafileko ke? (5, 6)

Zini u faneleko ku maha kasi ku u kuma makatekwa ma tako ke? (7)

1. Jehova i vangile misava leyi lezaku vanhu va tsakela wutomi ga pinzukelwa ka yona. I wa xuvile ku xontlhe xikhati a misava yi akiwa hi vanhu vo lulama ni va ku tsaka. (Tisimu 115:16; Isaya 45:18) A misava yi nga ta dzuka yi lobyisiwa; yi ta simama kala kupinzuka. — Tisimu 104:5; Mutshawuteli 1:4.

2. Na a nga se vanga munhu, Nungungulu i lo langa wutshamunyana go kari laha misaveni a gi hunzulusa giva paradise go saseka. I gi vitanile ku i simu ga Edeni. Hi kwa laho a vekileko kona a wanuna ni wasati vo sangula, Adamu na Eva. A kuhi khungo ga Nungungulu ku va pswala vana ni ku va tata misava yontlhe. Hi kutsongwani-kutsongwani, na va hunzulusile misava yontlhe yiva paradise. — Genesisi 1:28; 2:8, 15.

3. Adamu na Eva va onhile hi ku tsova nayo wa Nungungulu ha womu. Hikwalaho Jehova i va hlongolile le sinwini ga Edeni. A paradise gi lahlekisile zalezo. (Genesisi 3:1-6, 23) Kanilezi Jehova a nga rivalangi a khungo gakwe go sangula xungetano ni misava leyi. I tsumbisile ku yi hunzulusa yiva paradise laha vanhu va to hanya kala kupinzuka. I ta zi mahisa kuyini lezo ke? — Tisimu 37:29.

4. Mahlweni kaku a misava yiva paradise, kulaveka ku fuvisa vanhu vo biha. (Tisimu 37:38) Lezi zi ta humelela ka Har–Magedoni, ku nga yimpi ya Nungungulu ya ku mbheta hi yona a kubiha. Hi kulanzela, Satani a ta valelwa xikari ka 1.000 wa malembe. Lezi zi wula ku ku nga ta sala ge hambu munwe wo biha a to xakela misava. Ntsena vanhu va Nungungulu hi vona va to pona. — Kuvululelwa 16:14, 16; 20:1-3.

5. Anzhako ka lezo Jesu Kristu i ta fuma misava kota Hosi hi 1.000 wa malembe. (Kuvululelwa 20:6) Hi kutsongwani-kutsongwani i ta fuvisa xionho ka maalakanyo ya hina ni ka miri wa hina. Hina hi tava vanhu vo mbhelela, ku fanana na Adamu na Eva na va nga se onha. Kutani ku nga ha ta va kona kambe mababyi, ku khosahala ni kufa. A vababyi va ta hanyisiwa ni lava va khosaheleko va ta tlhela va maha vaswa. — Joba 33:25; Isaya 33:24; Kuvululelwa 21:3, 4.

6. A xikhatini xa Wuhosi ga Jesu ga 1.000 wa malembe, vanhu vo tsumbeka va ta tira kasi ku hunzulusa misava yiva paradise. (Luka 23:43) Ni makhulukhulu ya vafileko ma ta vuxiwa ma tlheliselwa wutomini laha misaveni. (Mitiro 24:15) Loku va maha lezi Nungungulu a zi lavako ka vona, va ta simama va hanya laha misaveni hi pinzukelwa. Loku ku nga hi lezo, va ta lobyiswa hi magumo. — Johani 5:28, 29; Kuvululelwa 20:11-15.

7. Hi ndlela leyi ku ta mahiwa a khungo ga Nungungulu go sangula xungetano ni misava. Xana wa navela ku buza makatekwa lawo matako ke? Loku ku hi lezo, u fanele kuya mahlweni hi ku gonza zo kari xungetano hi Jehova ni ku ingisa zileletelo zakwe. A kuya mitlhanganweni a Salawu ya Mufumo ya Timboni ta Jehova lomu wutshanwini ga nwina ku ta ku vuna ku maha lezo. — Isaya 11:9; Maheberu 10:24, 25.

[Mufota ka phajina 10]

Paradise gi lahlekileko

[Mufota ka phajina 11]

Anzhako ka Har–Magedoni, a misava yi ta hunzuluswa yiva paradise