Xigonzo 7

Ku Tshinelela Nungungulu Hi Mukombelo

Hi kuyini zi nga za lisima a ku khongela xikhati ni xikhati ke? (1)

Hi fanele ku khongela ka mani, hi ndlela muni ke? (2, 3)

Hi wahi mahungu ma faneleko kuva mikombelweni ke? (4)

Hi xihi xikhati u faneleko ku khongela? (5, 6)

Xana Nungungulu wa ingisa mikombelo yontlhe ke? (7)

1. A kukhongela ku wulawula na Nungungulu hi ku ti tsongohata. U fanele ku xikhati ni xikhati u khongela ka Nungungulu. Hi ndlela leyi u nga tizwa na wu tshinelele ka yena khwa hi ka munghana wo ranzeka. Jehova ngwa hombe nguvu kambe i ni ntamu, kanilezi wa ingisa mikombelo ya hina! Wa khongela ka Nungungulu xikhati ni xikhati ke? — Tisimu 65:2; 1 Va Le Tesalonika 5:17.

2. A mukombelo i xipanze xa kukhozela ka hina. Hi kota ya lezo, hi fanele ku khongela ka Jehova Nungungulu ntsena. Loku Jesu na a ha hi misaveni, xontlhe xikhati i wa khongela ka Dadani wakwe, na ku nga hi ka munwani munhu. Hina hi fanele ku mahawu zalezo. (Mateu 4:10; 6:9) Kanilezi, yontlhe mikombelo ya hina yi fanele ku mahiwa hi vito ga Jesu. Hi ndlela leyi hi kombisa ku hi ni xichawo hi xiyimeko xa Jesu ni ku ha kholwa ka muphahlu wakwe lo’wu tlhatlhisako. — Johani 14:6; 1 Johani 2:1, 2.

3. Loku hi khongela, ku laveka ku hi wulawula na Nungungulu lezi zi humako mbilwini ya hina. A hi faneli ku maha mikombelo yi vekilweko hlokweni ge hambu ku yi gonza lomu bhukwini ga mikombelo. (Mateu 6:7, 8) Hi nga khongela na hi hi ka wahi ni wahi matshamela ya xichawo, ka xihi ni xihi xikhati ni ka gihi ni gihi wutshamu. Nungungulu wa zi kota ku ingisa hambu mikombelo yo kala ku zwala, yi wuliwako hi lomu mbilwini. (1 Samueli 1:12, 13) Zinene ku lava wutshamu go rula, kule ka vanwani vanhu, loku hi maha mikombelo ya hina venyi. — Marku 1:35.

4. Mahungu muni u nga wulawulako hi wona mikombelweni ke? Hi zontlhe lezi zi yelanako ni wunghana ga wena na yena. (Va Le Filipi 4:6, 7) A mukombelo wa xikombiso wu komba lezaku hi fanele ku khongela hi vito ga Jehova ni khungo gakwe. Kambe hi nga khongela hi zilaveko za hina za nyama, hi kombela ku tsetselelwa zionho za hina ni xivuno loku hi kumana ni minzhingo. (Mateu 6:9-13) A mikombelo ya hina a yi faneli ku yiva ya ku lava bhinzu ga hina ntsena. Hi fanele ntsena ku khongela hi lezi zi zwananako ni kuranza ka Nungungulu. — 1 Johani 5:14.

5. U nga khongela xontlhe xikhati a mbilu ya wena yi ku kucetelako ku bonga hambu ku dumisa Nungungulu. (1 Kronekele 29:10-13) U fanele ku khongela loku u hi ni zikarato ni loku a kukholwa ka wena ku ringwa. (Tisimu 55:22; 120:1) Zinene ku khongela na u nga se ga zakuga. (Mateu 14:19) Jehova wa hi ramba a ku hi khongela “zikhati zontlhe”. — Va Le Efesusi 6:18.

6. Ku laveka ku hi khongela nguvu-nguvu loku hi mahile xionho xa hombe. Zikhatini lezo, hi fanele ku kombela Jehova ku a hi zwela wusiwana ni ku hi tsetselela. Loku hi wulela zionho za hina ka yena, ni kambe hi ti karata nguvu lezaku hi nga zi phindi, Nungungulu i ta hi “tsetselela”. — Tisimu 86:5; Mavingu 28:13.

7. Jehova i ingisa ntsena mikombelo ya lava vo lulama. Kasi ku mikombelo ya wena yi zwiwa hi Nungungulu, kulaveka ku u zama nguvu a ku hanya hi ku yelana ni milayo yakwe. (Mavingu 15:29; 28:9) Kulaveka ku u ti tsongohata loku u khongela. (Luka 18:9-14) U fanele u ti karata hi ku yelana ni lezi u kombelako. Hizalezo u ta kombisa lezaku u ni kukholwa ni ku u wulawula na wu tiyile. Ntsena hi ndlela leyi Jehova i ta hlamula mikombelo ya wena. — Maheberu 11:6.