Xigonzo 9

A Malanza Ya Nungungulu Ma Fanele Ma Basa Ni Ku Ma Hlazeka

Hi kuyini hi faneleko a ku hi basa ni ku hi hlazeka matlhelweni wontlhe? (1)

Zi wula kuyini a ku basa ni ku hlazeka hi tlhelo ga le moyeni? (2) hi tlhelo ga mahanyela? (3) hi tlhelo ga maalakanyo? (4) ni tlhelweni ga miri? (5)

Mabhulo muni ma nga hlazekangiko hi faneleko a ku ma potsa? (6)

1. Jehova Nungungulu i hlazekile, i basile. Yena i rinzela lezaku a vakhozeli vakwe va simama va basile hi tlhelo ga le moyeni, ga mahanyela, ga maalakanyo ni ga miri. (1 Pedro 1:16) Kasi ku hi tshama na hi hlazekile le mahlweni ya Nungungulu, ku laveka lezaku hi tikarata hakunene. Hi hanya lomu misaveni yo kala yi nga hlazekangi. Kambe hi fanele ku hilwa ni wubyekeli ga hina gi hi susumetako a ku hi maha zo biha. Hambu lezo ngha hi nga rereki.

2. Kubasa Le Moyeni: Loku hi lava ku tirela Jehova, a zi vumeleki a ku hi ti namareta ka zigonzo ni ka mikhuwo ya wukhongeli ga mawunwa. Ku laveka lezaku hi huma ka wukhongeli ga mawunwa ni ku hi nga dzuki hi gi seketela. (2 Korinte 6:14-18; Kuvululelwa 18:4) Anzhako ka loku hi gonzile a lisine xungetano hi Nungungulu, hi fanele a ku hi ti wonela kasi ku hi nga kanganyisiwi hi lava va gonzisako mawunwa. — 2 Johani 10, 11.

3. Kubasa Ka Mahanyela: Jehova i lava lezaku a vakhozeli vakwe va hanya, ka zikhati zontlhe, kota maKristu ya lisine. (1 Pedro 2:12) Yena wa zi wona zontlhe lezi hi zi mahaku, hambu loku hi hi lomu xihundleni. (Maheberu 4:13) Hi fanele ku fularela a ma tirisela yo biha ya ziro za wubeleki ni yinwani mitiro yo nyenyeza ya misava leyi. — 1 Va Le Korinte 6:9-11.

4. Kubasa Ka Maalakanyo: Loku hi tata wongo hi mapimo yo hlazeka, ya ku basa, a mahanyela ya hina nawonawu ma tava ya ku basa. (Va Le Filipi 4:⁠8) Kanilezi, loku hi simama hi ehleketa a zilo za hava, a magumo ya kona ku tava mitiro yo biha. (Mateu 15:​18-20) Ku laveka lezaku hi potsa a tixaka ta zihungatiso kutani ta mihlakano, leti ti nga dzukako ti chakisa a kupima ka hina. Hi nga zikota a ku tata wongo hi miehleketo ya ku basa, loku hi gonza a Gezu ga Nungungulu.

5. Kubasa Ka Miri: Kota vayimeli va Nungungulu, a maKristu mafanele ku khatalela a kubasa ka miri ni ka tinguwo. Ku laveka lezaku hi hlamba mandla loku hi huma hi lomu xipetsweni ni loku na hi nga se sangula kuga kutani na hi nga se sangula a ku khomakhoma zakuga. Loku laha kaya mu nga hi na xipetso xo susumeta a wufenze hi mati, a chaka gi fanelwe ku kelelwa. (Deuteronome 23:12, 13) A ku tshama miri na wu basile ku vunetela a makumela ya wutomi ginene. A muti wa muKristu wu fanele ku hlayiseka ni ku basa, hi lomu nzeni ku fana ni le handle. Ku laveka lezaku wu woneka kota xikombiso xinene xikari ka vaakelani.

6. Mabhulo Ya Ku Basa: A malanza ya Nungungulu ma fanele a ku wulawula lisine xontlhe xikhati. A vahembi va nga ta enghena Mufunweni wa Nungungulu. (Va Le Efesusi 4:25; Kuvululelwa 21:8) A maKristu a ma na mawulawulela yo soleka. A ma ingisi ge hambu ku hlawutela a mafenya kutani tikaringani ti nga hlazekangiko. Hi kota ya mabhulo yabye ya ku basa le ntirweni kutani le xikoleni, hambu xikari ka vaakelani, ma ti wonekisa kota vanhu va hlawulekako. — Va Le Efesusi 4:29, 31; 5:3.

[Mifota ka phajina 19]

A malanza ya Nungungulu ma fanele ma basa ni ku ma hlazeka hi wontlhe matlhelo