Xigonzo 14

Ndlela Leyi Timboni Ta Jehova Ti Nga Xaxametwa Hi Yona

Xana a Timboni ta Jehova ti sangulile rini a ntiro wa tona ka nguva leyi? (1)

Xana yi fambisisiwa kuyini a mitlhangano ya Timboni ta Jehova? (2)

Xana Ti rihisiwa kuyini a timali ti lavekako? (3)

Hi vamani lava va rangelako a mabandla? (4)

Hi yihi mitlhangano ya hombe yi mahiwako kada lembe? (5)

I ntiro muni wu mahiwako le Zinza ni lomu maraveni ya tona? (6)

1. A Timboni ta Jehova ti sangulile a ntiro wa tona ka nguva leyi lomu ka malembe ya 1870. A kusanguleni, ti wa vitaniwa kota Zigonzani za Biblia. Kanilezi hi 1931 ti amukelile a vito ga lomu ka Biblia ga Timboni ta Jehova. (Isaya 43:10) A kusukela ka masangulo yo kala ku nyawula, a hlengeletano yi zi kotile a ku anza kala kuza yi tsombanyisa a timiliyoni ta Timboni, ti hisekako hi ku xumayela lomu ka ku hunza 230 wa matiko.

2. A wunyingi ga mabandla ya Timboni ta Jehova ma nani mitlhangano makhati manharu hi viki. Hi ramba wena a ku u ya wona munwe wa kona. (Maheberu 10:24, 25) A Biblia gi wumba xiseketelo xa lezi zi gonzisiwako. A mitlhangano yi sanguliwa yi guma yi valiwa hi mukombelo. Kambe a ka wunyingi ga mitlhangano ka yimbeleliwa a ‘tisimu ta moya’ hi mbilu. (Va Le Efesusi 5:18, 19) A kuenghena mahala, kambe a ku mahiwe mihlengo. — Mateu 10:8.

3. A wunyingi ga mabandla ma maha mitlhangano lomu ka Salawu ya Mufumo. Leyo yi tolovela kuva yindlu ya hombe, yo hehuka, yo akiwa hi Timboni to tira hi ku ranza ka tona. Lomu Salawini ya Mufumo a ku woneki a zifananiso, ge hambu zihambano kutani zilo zakunghaho. A timali ti lavekako ti rihiwa hi minyikelo yo mahiwa hi ku ranza ka vanhu. Ku nani xibhokisana xa minyikelo xi longiselweko loyi a zilavako a ku maha munyikelo. — 2 Va Le Korinte 9:7.

4. Kada bandla gi nani madota kutani vawoneleli. Hi wona ma rangelako lomu kugonziseni ka bandla. (1 Timote 3:1-7; 5:17) Ma vuniwa hi malanza ya wutireli. (1 Timote 3:8-10, 12, 13) A va vanuna lavo a va woniwe kota va ku tlakuka a ku hunza ziro zinwani za bandla. (2 Va Le Korinte 1:24) A va chuliwe zikhundla zo hlawuleka. (Mateu 23:8-10) A va na maambalela yo hambana ni ya vanwani. Kambe a va holi hi ntiro wabye. A madota, hi ku ranza ka wona, ma khatalela a zilaveko za moya za bandla. Ma zi kota a ku tangalisa ni ku tlharihisa xikhatini xa zikarato. — Jakobe 5:14-16; 1 Pedro 5:2, 3.

5. Kambe, kada lembe a Timboni ta Jehova ta maha a migotsovanyano kutani mitlhangano ya hombe nguvu. A ka zikhati lezo, ku tlhanganyisiwa mabandla manyingi ka longoloko wo hlawuleka wa zigonzo za Biblia. A kubapatizwa ka vapizani vaswa xipanze xi nga vumalekiko ka longoloko wa yontlhe migotsovanyano kutani mitlhangano ya hombe nguvu. — Mateu 3:13-17; 28:19, 20.

6. A Zinza ga misava yontlhe ga Timboni ta Jehova gi kumeka le Nova York, EUA. Leyo ku tshama a Hubye yi Fumako, ku nga ntlawa-tshinya wa madota yo buva nguvu ma wonelelako a bandla ga misava yontlhe. Kambe ku nani ku hunza 100 wa zikritori ni maravi misaveni yontlhe. A ka tindawu leto, ku nani vanhu va vunetelako a ku gandla ni ku posa a mabhuku yo seketelwa hi Biblia, hi ku ranza kabye. Ku kombisiwa kambe a tindlela ta maxaxametela ya ntiro wa ku xumayela. Hi ramba wena a ku u ya wona a xikritori kutani ravi gi kumekako kusuhani.