Xipimo Xa Wukhume
A Mufumo “Wu To Kala Wu Nga Lobyiswi”
1. Hi yihi a mhaka yi dlunyatisiwako hi zilo lezi zi humelelako matinwini ya vanhu?
A ZILO zi humelelako misaveni siku ni siku zi dlunyatisa a mhaka yaku a vanhu a va li kumi litsako hi ku ala a wuhosi ga Jehova ni ku zama a ku ti fumela ha voce. Ku hava fambisela ni ginwe ga mufumo wa vanhu gi nehileko a zivuno ka vanhu handle ka xihlawulela. Hambulezi a vanhu va anzileko hi tlhelo ga wutivi ga hombe nguvu ga siensia, a va zi koti ku hlula wubabyi kutani ku mbheta kufa, ge hambu ka munhu munwe ntsena. A mufumo wa vanhu a wu zi koti ku mbheta yimpi, timholova, wugevenga, kubiha, kutani wusiwana. A mifumo ya tihanyi ya simama a ku fumela vanhu matikweni yo tala. (Mutshawuteli 8:9) A wutivi go anza ga mamahela ya zilo, makangwa, ni kungativi za patsana kasi ku chakisa misava, mati, ni moya. A mafambisela ya hava ya mabhinzu hi varangeli ma maha zi karatela vo tala lezaku va kuma za ku ti hanyisa. Makume ya mazana ya malembe ya kufuma ka munhu ma mahile lezaku a mhaka leyi yiva kubaseni: “A ndlela ya munhu a yi le ntanwini wakwe, kambe a munhu a nga zi koti ku lulamisa mazambo yakwe.” — Jeremia 10:23.
2. Hi yihi ndlela yi nga yona yoce yi zi kotako ku tlhatlha zikarato?
2 Hi yihi ndlela ya ku tlhatlha zikarato lezo? Mufumo wa Nungungulu, lowu Jesu a gonzisileko a valanzeli vakwe lezaku va wu khongelela: “A wute mufumo wa wena. Kuranza ka wena a ku mahiwe misaveni, kota lezi ku mahiwako le tilweni.” (Mateu 6:9, 10) A Mufumo wa le tilweni wa Nungungulu wu tlhamuselwe ka 2 Pedro 3:13 kota “matilo maswa” lawa ma ta nga fumela a “misava yiswa,” ku nga vanhu va kululama. A Mufumo wa le tilweni wa Nungungulu ngwa lisima nguvu laha ka kuza Jesu a wu maha a hloko ya mhaka-tshinya ya kuxumayela kakwe. (Mateu 4:17) Yena i kombile lexi xi faneleko a kuva xo ranga wutomini ga hina, hi ku tlharihisa aku: “A kuranga lavani mufumo wakwe, ni kululama kakwe.” — Mateu 6:33.
3. Hikuyini a ku gonza xungetano hi Mufumo wa Nungungulu ku hi ka xihatla nguvu zalezi?
3 A ku gonza xungetano hi Mufumo wa Nungungulu za xihatla nguvu zalezi, kota lezi lokuloku a Mufumo lowo wu ta nga cica a mafumela ya misava leyi kala kupinzuka. A bhuku ga Danieli 2:44 ga wula na ka ha hi mahlweni: “A masikwini ya tihosi leto [a mifumo ya vanhu leyi yi fumako zalezi], Nungungulu wa le tilweni i ta vuxa a mufumo [le tilweni] wu to kala wu nga lobyiswi, ni wuhosi ga wona cima gi nga ta nyikelwa ka ginwani tiko [a vanhu va nga ta ha tshuka va fumela misava kambe]. Wu ta panza wu lovisa yontlhe mifumo leyi, wona wu ku tsonzoma kala kupinzuka.” Hizalezo, a Mufumo wu ta neha magumo ya masiku lawa ya kugumesa hi ku lovisa a mafambisela wontlhe ya kubiha ya zilo. Hikwalaho, loku a Mufumo wa le tilweni wu fuma misava wu nga ta ha bangiwa. Hi fanele kuva ni kutsaka ka hombe hi kota ya lezi a kutlhatlhiswa ku nga laha kusuhani nguvu makunu!
4. Mayelano ni Mufumo, zini zi mahekileko le tilweni hi 1914, niku hikuyini lezo zi hi za lisima ka hina?
4 Hi 1914, Kristu Jesu i vekilwe kota Hosi a tlhela a vumelelwa a ku ‘fuma xikari ka valala [vakwe].’ (Tisimu 110:1, 2) Ka lembe galego kambe, ‘a masiku ya kugumesa’ ya mafambisela lawa ya kubiha ya zilo ma lo sangula. (2 Timote 3:1-5, 13) A ka xikhati xalexo, a zilo lezi Danieli a zi wonileko muwonisweni wakwe wa wuprofeti zi lo humelela le tilweni. A “wakale hi masiku,” Jehova Nungungulu, i nyikile a N’wana wa munhu, Jesu Kristu, a “kufuma, ni wukosi, ni mufumo, kasi a va matiko wontlhe ni tixaka ni tirimi va fela ku mu tirela.” Na a wulawula hi muwoniso lowo, Danieli i lo tsala: “A kufuma kakwe ka simasima, ku nga ta hunza, ni mufumo wakwe cima wu nga ta mbhetiswa.” (Danieli 7:13, 14) Hi ku tirisa a Mufumo wa le tilweni wu nga mandleni ya Kristu, Nungungulu i ta maha lezaku a varanzi va kululama va ti buza hi zilo za zi nene za tsanza-vahlayi lezi zi nga hi khungo gakwe a xikhati lexi a nga veka a vapswali va hina va kusangula Paradiseni.
5. Hi wahi a mahungu yo engeteleka xungetano ni Mufumo lawa hi navelako ku ma tiva hi mbilu yontlhe, niku hikuyini?
5 Xana loko hi kona a kuxuva ka wena lezaku uva mufumelwi wo tsumbeka wa Mufumo? Loku zi hi tano, u ta navela ku tiva hi mbilu yontlhe a matshamela ni matirela ya wukosi lego ga le tilweni. U ta lava ku tiva lezi a mufumo lowo wu zi mahako zalezi, lezi wu ta nga zi tatisa xikhatini xi tako, ni lezi wu zi lavako ka wena. A xikhati lexi u kambisisako a Mufumo hi laha kusuhani, a ku wu tsakela ka wena ku fanele ku anza. Loku u amukela a kufuma ka wona, u tava u ringanelwa khwatsi a ku byela vanwani xungetano hi zilo zo hlamalisa lezi a Mufumo wa Nungungulu wu to zi mahela vanhu va ingisako. — Tisimu 48:12, 13.
A Vafumeli Va Mufumo Wa Nungungulu
6. (a) Xana a Mitsalo yi kombisa kuyini a ku wuhosi ga mani legi gi kombiwako hi Mufumo wa wuMessia? (b) Xana hi fanele ku khumbisiwa kuyini hi lezi hi zi gonzako xungetano hi Mufumo?
6 A xinwe xa zilo lezo zo sangula xi kombisiwako hi kukambisisa loko hi lezaku a Mufumo wa wuMessia xikombiso xa wuhosi ga Jehova wutsumbu. Hi Jehova loyi a nyikileko a “kufuma ni wukosi ni mufumo” ka N’wana wakwe. Anzhako ka kuva a N’wana wa Nungungulu a nyikilwe ntamu wa ku fuma kota Hosi, ku lo zwala magezu le tilweni na ma tivisa hi kufaneleko maku: “Makunu a mufumo wa misava wu lumba a Hosi ya hina [Jehova Nungungulu], na Kristu wa yona; yena i ta fuma kala kupinzuka ni kupinzuka.” (Kuvululelwa 11:15) Hikwalaho, zontlhe zilo lezi hi zi wonako xungetano hi Mufumo ni lezi wu zi mahako zi nga hi tshineta ka Jehova. Lezi hi zi gonzako zi fanele ku hi maha hi navela ku ti veka hasi ka wuhosi gakwe kala kupinzuka.
7. Hikuyini zi nga za lisima ka hina a ku tiva lezaku Jesu Kristu Mufumeli wa Wumbiri wa Jehova?
7 Wona kambe lezaku Jehova i yimisile Jesu Kristu xitshanwini xa wuhosi kota Mufumeli wakwe wa Wumbiri. Kota Xigogo xa Mitiro lexi Nungungulu a xi tirisileko kuvangeni ka misava ni vanhu, Jesu wa zi tiva khwatsi a zilaveko za hina a ku hunza hina venyi. A ku hunza lezo, kusukela kusanguleni ka kuvakona ka vanhu, yena i kombisile ‘kutsaka ni vana va vanhu.’ (Mavingu 8:30, 31; Va Le Kolosi 1:15-17) A liranzo lakwe ka vanhu la hombe nguvu laha ka ku kala yena wutsumbu ata misaveni a ta nyikela wutomi gakwe kota nzhiho wa ku hi tirula. (Johani 3:16) Hi ku maha lezo yena i hi vululele ndlela ya ku tlhatlheka hi ka xionho ni kufa zinwe ni lungelo ga kuva hi kuma wutomi ga pinzukelwa. — Mateu 20:28.
8. (a) A kuhambana ni wufumeli ga vanhu, hikuyini a mufumo wa Nungungulu wu to simama? (b) Hi kwihi kuzwanana ku nga kona xikari ka “nanza gi tsumbekileko ni go tlhariha” ni mufumo wa le tilweni?
8 A Mufumo wa Nungungulu mufumo wo tiya ni wa simasima. A kusimama ka wona ku tiyisiwa hi mhaka yaku Jehova a ngafi. (Tisimu 146:3-5, 10) A kuhambana ni tihosi ta misava, Jesu Kristu, loyi Nungungulu a mu nyikileko wuhosi, yenawu a ngafi. (Va Le Roma 6:9; 1 Timote 6:15, 16) A vanwani va tova zinwe na Kristu zitshanwini za wuhosi za le tilweni va tava 144.000, va nga malanza yo tsumbeka ya Nungungulu va humako ka “tixaka tontlhe . . . , ni tirimi, ni mufumo, ni matiko.” Lava kambe va nyikiwa wutomi gi nga fiko. (Kuvululelwa 5:9, 10; 14:1-4; 1 Va Le Korinte 15:42-44, 53) A wunyingi ga vona se va le tilweni, niku a misalela yabye leyi ya ha hiko misaveni yi wumba a “nanza gi tsumbekileko ni go tlhariha” ga nyamutlha, legi gi seketelako hi kutsumbeka a timhaka ti yelanako ni Mufumo laha misaveni. — Mateu 24:45-47.
9, 10. (a) I kucetelo muni wu vangako kuhambana, ni kubiha lowu a Mufumo wu ta nga wu fuvisa? (b) Loku hi nga lavi ku maha valala va Mufumo wa Nungungulu, zilo muni hi faneleko a ku zi potsa?
9 Lokuloku, a ka xikhati xakwe xi yimisilweko, Jehova i ta rumela a mabutho yakwe lezaku ma ta basisa a misava. Ma ta lovisela magumo a vanhu lava hi kutihlawulela va alako ku amukela a wuhosi gakwe ni lava va tseketselako a malulamiselo ya liranzo lawa a ma mahako hi ku tirisa Jesu Kristu. (2 Va Le Tesalonika 1:6-9) Lego gi tava siku ga Jehova, xi nga xikhati xi rinzelwako kusukela kale xa lezaku a tiyiswa kota Hosi ya Hombe Wuakweni Gontlhe. “Langutani, a siku ga Jehova gata, ga hlomulo wa khulo ni zanga yi chavekako; a ku ta . . . lovisa vaonhi va nga ka gona.” (Isaya 13:9) “Lego siku i siku ga khulo, i siku ga zikarato ni hlokiselelo, a siku ga kuhahlula ni kuhangalaka, a siku ga munyama ni dzuvi, a siku ga marefu ni kuphuma.” — Zefania 1:15.
10 A wukhongeli gontlhe ga mawunwa ni mifumo yontlhe ya vanhu ni mabutho yabye, lezi zi tirisiwako hi mufumeli wa kubiha a nga wonekiko wa tiko legi, zi ta loviselwa magumo. Vontlhe lava va ti patsako ni tiko legi hi ku lanzela a mahanyela ya makangwa, ya kungatsumbeki, ma nga hlazekangiko va ta loviswa. Satani zinwe ni madimoni yakwe va ta hoxiwa nkeleni wa lieswila lezaku va nga ha kumani ni vahanyi va misava hi 1.000 wa malembe. Zonake a Mufumo wa Nungungulu wu ta wonelela hi kumbhelela a timhaka ta misava. A hi kuhumula ku tova ni lava va ranzako kululama! — Kuvululelwa 18:21, 24; 19:11-16, 19-21; 20:1, 2.
A Makungo Ya Mufumo — Ma Nga Kumiswa Kuyini
11. (a) Xana a Mufumo wa wuMessia wu ta tatisisa kuyini a khungo ga Jehova xungetano hi misava? (b) Xana a kufuma ka Mufumo ku ta wula yini ka vanhu lava va to ngha va hanya misaveni xikhatini lexo?
11 A Mufumo wa wuMessia wu ta tatisa hi kumbhelela a khungo go sangula ga Nungungulu xungetano hi misava. (Genesisi 1:28; 2:8, 9, 15) Kala nyamutlha, a vanhu a va seketeli a khungo lego. Hambulezo, “a tiko legi gi tako” gi ta fumelwa hi N’wana wa munhu, Jesu Kristu. Vontlhe lava va to pona a kulamula loku Jehova a to nehela a mafambisela lawa ya kale va ta tira hi wumunwe na va fumelwa hi Hosi Kristu, va maha zontlhe lezi yena a to va leletela, kasi a misava yontlhe yiva paradise. (Maheberu 2:5-9) A vanhu vontlhe va ta tsakiswa hi ntiro wa mandla yabye va tlhela va vuneka hi kumbhelela hi kutala ka pfuno wa misava. — Tisimu 72:1, 7, 8, 16-19; Isaya 65:21, 22.
12. Xana a kumbhelela ka mapimo ni ka miri ku ta nehiswa kuyini ka vafumelwi va Mufumo?
12 A xikhati lexi Adamu na Eva va nga vangiwa, va wa mbhelele, niku ku wa hi khungo ga Nungungulu lezaku a misava yi tala hi pswalo wabye, vontlhe na va mbhelele mapinwini ni mirini. A khungo lego gi tava lisine lo hlamalisa kufumeni ka Mufumo. Lezo zi lava lezaku ku susiwa a mitiro yontlhe ya kuonha, niku kasi ku maha lezo, Kristu a nga tiri kota Hosi ntsena kanilezi i tira kambe kota Mupristi wa Hombe. Hi lihlaza-mbilu, yena i ta vuna a vafumelwi vakwe va ingisako lezaku va vuneka hi lisima li tirulako la muphahlo wa wutomi gakwe kota munhu.
13. Hi wahi mabhinzu ya xiviri ma ta nga kumiwa kufumeni ka Mufumo?
13 A kufumeni ka Mufumo, a vahanyi va misava va ta kuma mabhinzu yo hlamalisa hi tlhelo ga miri. “Zonake a mahlo ya zikhumu ma ta vululiwa, ni tindleve ta ziwiri ti ta vululeka. A zilema zi ta tlula khwatsi i hlangu, ni tirimi ta timbeveve ti ta yimbelela.” (Isaya 35:5, 6) A nyama yi khanyeneko hi kota ya kukhosahala kutani hi mababyi yi tava yiswa ku hunza ya xihlangi, ni ziro zi nga hiko na ntamu zi tava zi tiyile nguvu. “A miri wakwe wu tava wuswa ku hunza wa xihlangi; i ta tlhelela masikwini ya wuswa gakwe.” (Joba 33:25) A siku gi tata laha ku to kala ku nga hi kona ni munwe a ta ngava ni xigelo xa ku wula lezaku, “nza babya!” Hikuyini? Hakuva a vanhu lava va chavako Nungungulu va ta humutwa ka nzhwalo wa xionho ni ka mitiro ya xona yo bayisa. (Isaya 33:24; Luka 13:11-13) Ina, Nungungulu “i ta kulula mihloti yontlhe mahlweni yabye. Ku nga ha ta va kona kufa, hambu ni hlomulo, kutani kurila ni kubayisa; hakuva a zilo zo sangula zi hunzile.” — Kuvululelwa 21:4.
14. Xana a ku kuma kumbhelela zi patsa yini?
14 Kanilezi, a ku kuma kumbhelela ku patsa zo tala a ku hunza kuva ni miri zinwe ni mapimo zo mbhelela. Kona ku patsa a ku kombisa hi kufaneleko a matshamela ya Jehova, kota lezi hi mahilweko ‘hi mufananiso wa Nungungulu, hi fanana na yena.’ (Genesisi 1:26) Kasi zi koteka lezo, ku ta laveka a gonziselelo ya hombe. A misaveni yiswa, ‘a kululama ku ta tshama kona.’ Hikwalaho, kota lezi Isaya a nga zi wula na ka ha hi mahlweni, ‘a vaaki va misava va ta gonza kululama.’ (2 Pedro 3:13; Isaya 26:9) A tshamela lego gi vanga kurula — xikari ka vanhu va tixaka tontlhe, xikari ka vanhu va toloveleneko, laha ngangweni, niku hehla ka zontlhe, gi vanga kurula na Nungungulu wutsumbu. (Tisimu 85:10-13; Isaya 32:17) Lava va gonzako kululama va ta gonzisiwa lezi zi nga kuranza ka Nungungulu xungetano hi vona hi ndlela yo anza. Laha a liranzo ka Jehova li to ya li aka khwatsi timbilwini tabye, vona va ta lanzela a tindlela takwe timhakeni tontlhe ta wutomi ga vona. Vona va ta zi kota ku wula a ku fana na Jesu lezaku, ‘xontlhe xikhati nzi maha lezi zi xalalisako Dadani.’ (Johani 8:29) A wutomi gi tava legi gi tsakisako nguvu a xikhati lexi a vanhu va to telwa hi makatekwa lawo!
A Zimaho Lezi Makunu Zi Wonekako
15. Hi ku tirisa a ziwutiso zi nga ka nzimana leyi, khanyisa a zimaho za Mufumo u tlhela u komba lezi hi faneleko ku ngha hi zi maha zalezi.
15 A zimaho zo hlamalisa za Mufumo wa Nungungulu ni vafumelwi va wona se za woneka. A ziwutiso ni mitsalo lezi zi lanzelako zi ta ku alakanyisa a zo kari za zimaho lezo, zinwe ni zilo lezi a vafumelwi vontlhe va Mufumo va faneleko ku ngha va zi maha zalezi.
Xana a Mufumo wu lwile na mani kusangula, niku lezo zi gumesile hi yini? (Kuvululelwa 12:7-10, 12)
Kusukela kuyimisweni ka Kristu xitshanwini xa wuhosi, kuhlengeletwa ka misalela ya ntlawa muni loku ku khatalelwako makunu? (Kuvululelwa 14:1-3)
I ntiro muni lowu Jesu a wu wulileko na ka ha hi mahlweni lezaku i wa ta wu maha anzhako ka kusangula ka kuxaniseka ka hombe, kota lezi zi tsalilweko ka Mateu 25:31-33?
I ntiro muni wa lisima nguvu wu mahiwako inyamutlha? Hi vamani va hlengelako ntirweni lowo? (Tisimu 110:3; Mateu 24:14; Kuvululelwa 14:6, 7)
Hikuyini a varangeli va wupolitika ni va wukhongeli lava va vukelako a ntiro wa kuxumayela va nga zi kotiko a ku wu nyimisa? (Zakaria 4:6; Mitiro 5:38, 39)
Hi kwihi a kucica ku humelelako mahanyeleni ya lava va ti vekako hasi ka kufuma ka Mufumo? (Isaya 2:4; 1 Va Le Korinte 6:9-11)
A Mufumo Wa 1.000 Wa Malembe
16. (a) Xana Kristu i ta fuma xikhati xa ku chikela kwihi? (b) Hi zihi a zilo zo hlamalisa zi ta nga mahiwa nzeni ni nzhako ka xikhati lexo?
16 Anzhako ka kuhoxiwa ka Satani ni madimoni yakwe nkeleni wa lieswila, Jesu Kristu zinwe ni ziga-tshomba kulobye za 144.000, va ta fuma kota tihosi ni vapristi hi 1.000 wa malembe. (Kuvululelwa 20:6) Nzeni ka xikhati lexo, a vanhu va ta mbheleliswa, a xionho ni kufa zi tako hi ka Adamu zi fuviselwa magumo. A kugumeseni ka Kufuma ka 1.000 wa malembe, na a mahile a ntiro wakwe kota Hosi tlhelo Mupristi wa Hombe wa wuMessia, Jesu i “tlhelisela a mufumo” ka Dadani wakwe, “lezaku kasi Nungungulu ava zontlhe ka vontlhe.” (1 Va Le Korinte 15:24-28) A ka xikhati lexo kambe, Satani i ta tlhatlhiwa hi xikhatanyana lezaku a ringa a vanhu va tirulweko hi kota ya kuseketela kabye a wuhosi ga Jehova ga wuako gontlhe. Anzhako ka loku a kuringwa loko ko gumesa ku mbhelile, Jehova i ta lovisa Satani ni vahluwuki lava va yimileko tlhelweni gakwe. (Kuvululelwa 20:7-10) Lava va seketeleko a wuhosi ga Jehova — a fanelo yakwe ya ku fuma — va tava va kombisile khwatsi a kutsumbeka kabye ko tiya. Makunu va ta nehiwa kuzwananeni ku faneleko na Jehova, va amukeleka ka yena kota vana vakwe va xinuna ni va xisati, lava Nungungulu a va wonako na va fanelekile ku kuma wutomi ga pinzukelwa. — Va Le Roma 8:21.
17. (a) Zini zi to humelela Mufumo a kugumeseni ka 1.000 wa malembe? (b) Xana a Mufumo “cima wu nga ta mbhetiswa” hi ndlela muni?
17 Hikwalaho, a ntiro wa Jesu zinwe ni lowu wa va 144.000 xungetano hi misava wu ta cica. Wu tava wihi a ntiro wabye anzhako ka lezo? A Biblia a gi wuli. Kanilezi loku hi seketela a wuhosi ga Jehova hi kutsumbeka, hi ta ngha hi hanya kugumeseni ka Mufumo wa 1.000 wa malembe kasi ku tiva lezi Jehova a va vekeleko zinwe ni lezi a zi vekeleko a wuako gakwe gontlhe go hlamalisa. Hambulezo, a kufuma ka Kristu ka 1.000 wa malembe ku tava “ka simasima” niku a Mufumo wakwe “cima wu nga ta mbhetiswa.” (Danieli 7:14) Hi ndlela muni? Hi lezaku a ntamu wa ku fuma wu nga ta hunza wu ya mandleni ya vanwani lava va nga ni makungo yo hambana ni lawa ya Jehova kota Mufumeli. Kambe, a Mufumo ‘wu nga ta lobyiswa’ hakuva a zimaho za wona zi ta simama kala kupinzuka. (Danieli 2:44) Niku a Hosi tlhelo Mupristi wa wuMessia ni tihosi tlhelo vapristi-kulobye va ta dzunziwa kala kupinzuka hi kota ya ntiro wabye wo tsumbeka ka Jehova.
Ziwutiso Za Kuvuxeta
• Hikuyini a Mufumo wa Nungungulu wu nga wona woce wu zi kotako ku tlhatlha a zikarato za vanhu? Hi rini a Mufumo wa Nungungulu wu sangulileko ku fuma?
• Xini xi ku tsakisako nguvu xungetano hi Mufumo wa Nungungulu niku zini wu ta nga zi tatisa?
• Hi zihi a zimaho za Mufumo wa Nungungulu lezi hi zi kotako a ku zi wona zalezi, niku hi xihi xipanze hi nga naxo ka lezo?
[Mufota ka phajina 92, 93]
A Mufunweni wa Nungungulu, a vanhu vontlhe va ta gonza kululama