Xipimo Xa Wukhume Ni Zimbiri
Lezi A Kubapatizwa Ka Wena Ku Wulako Zona
1. Hikuyini a munwe ni munwani wa hina a faneleko ku khatala hi kubapatizwa hi mati?
HI LEMBE ga 29 Nguveni ya Hina, Jesu i lo bapatizwa, a nyupetwa Congweni wa Jordani hi Johani Mubapatizi. Jehova wutsumbu i wa zi wona a tlhela a kombisa kuxalala. (Mateu 3:16, 17) Hizalezo Jesu i lo nyika xikombiso lexi a vapizani vakwe vontlhe va faneleko ku xi lanzela. Anzhako ka malembe manharu ni khihlanya, Jesu i lo nyika a zileletelo lezi ka vapizani vakwe: “Wu nyikilwe ka mina a ntamu wontlhe a tilweni ni laha misaveni; hikwalaho fambani, mu va maha vapizani a matiko wontlhe, mu va bapatiza hi vito ga Dadani ni ga N’wana ni ga Moya wa ku Basa.” (Mateu 28:18, 19) Xana u bapatizilwe hi kuzwanana ni lezi Jesu a zi leleteleko? Loku zi nga hi tano, xana wa ti longisela kasi ku maha lezo?
2. Xungetano hi kubapatizwa, ziwutiso zihi lezi zi faneleko ku hlamuliwa?
2 Kani u bapatizilwe kutani wa ha ti longisela ku bapatizwa, a kuzwisisa khwatsi a tlhamuselo wa kubapatizwa ka lisima ka vontlhe lava va lavako ku tirela Jehova ni ku hanya misaveni yakwe ya yiswa ya kululama. Ku na ni ziwutiso zi faneleko ku hlamuliwa, zo kota lezi: Xana a kubapatizwa ka wuKristu inyamutlha ku na ni tlhamuselo wo fanana ni lowu wa kubapatizwa ka Jesu? Zi wula yini a ku bapatizwa “hi vito ga Dadani ni ga N’wana ni ga Moya wa ku Basa”? Xana zi patsa yini a ku hanya hi kuyelana ni lezi a kubapatizwa ka wuKristu hi mati ku wulako zona?
Kubapatiza Ku Mahilweko Hi Johani
3. Xana a kubapatiza ka Johani ku wa lumba mani ntsena?
3 A xipimo xa ntlhanu wa tihweti ni yinwe mahlweni ka kubapatizwa ka Jesu, Johani Mubapatizi i wa xumayela le xiwuleni xa Judia, aku: “Hunzulukani, hakuva mufumo wa tilo wu tshinele.” (Mateu 3:1, 2) A vanhu va lozwa lezi Johani a nga zi wula va tlhela va zi lanzela. Vona va lo wulela zionho zabye laha kubaseni, va ti sola ka zona, zonake vata ka Johani lezaku va ta bapatizwa hi yena le Congweni wa Jordani. A kubapatizwa loko ku wa hi ka vaJuda ntsena. — Luka 1:13-16; Mitiro 13:23, 24.
4. Hikuyini a vaJuda va zana go sangula ga malembe va nga fanele ku ti sola hi xihatla?
4 A vaJuda lavo va wa fanele ku ti sola hi xihatla. Hi lembe ga 1513 Mahlweni ka Nguva ya Hina, le Xitsungeni xa Sinai, a vakoko vabye va lo maha xivumelwano kota tiko — ku nga kuzwanana ko tiya — na Jehova Nungungulu. Kanilezi hi kota ya zionho zabye zo biha nguvu, a va hanyangi hi kuyelana ni wutihlamuleli gabye xungetano hi xivumelwano lexo, hikwalaho va lo koniwa hi xona. A masikwini ya Jesu a xiyimo xabye xi wa bihile nguvu. “A siku ga Jehova, le’ga hombe gi chavisekako” gi nga wulilwe hi Malaki na ka ha hi mahlweni gi wa tshinele. Hi lembe ga 70 Nguveni ya Hina, a “siku” lego gi tile a xikhati lexi a mabutho ya vaRoma ma nga lovisa Jerusalema, ni tempeli ya gona, zinwe ni ku hunza a miliyoni yinwe ya vaJuda. Johani Mubapatizi, loyi a nga pinyamela a wukhozeli ga lisine, i rumelwe mahlweni ka kuloviswa loko, lezaku a ta “longisela Hosi a vanhu va longiselweko yona.” Vona va wa fanele va ti sola zionhweni zabye xungetano hi xivumelwano xa Nayo wa Mosi ni ku ti longisela lezaku va vumela a N’wana wa Nungungulu, Jesu, loyi Jehova a nga kari a va rumelela. — Malaki 4:4-6; Luka 1:17; Mitiro 19:4.
5. (a) A xikhati lexi Jesu a nga tela ku ta bapatizwa, hikuyini Johani a nga kanakana hi lezo? (b) Xana a kubapatizwa ka Jesu ku wa kombisa yini?
5 A xikari ka lava va tileko ka Johani lezaku va ta bapatizwa ku wa hi na Jesu. Kanilezi hikuyini? Na a tiva lezaku Jesu i wa nga hi na zionho za ku zi wulela, Johani i te ngalo: “Hi mina nzi faneleko ku bapatizwa hi wena, kasi wena uta ka mina!” Kanilezi a kubapatizwa ka Jesu ku wa yimela zinwani. Hikwalaho Jesu i lo hlamula aku: “Lezi a zive tano; hakuva zinghaho hi fanele ku tatisa kululama kontlhe.” (Mateu 3:13-15) Kota lezi Jesu a nga hi hava xionho, a kubapatizwa kakwe ku wa nga hi xikombiso xa kutisola hi kota ya xionho; niku yena kambe i wa nga faneli ku ti hendleleta ka Nungungulu, hakuva yena i wa hi xiro xa tiko gi nga sina gi ti hendleletile ka Jehova. A wutshanwini ga lezo, a kubapatizwa kakwe na a hi tangeni ya 30 wa malembe kuve ka yena yece, niku ku wa kombisa a kutinyikela kakwe ka Dadani wakwe wa le tilweni lezaku a maha kuranza Kakwe.
6. Xana Jesu i wa nyika a lisima muni a kumaha kuranza ka Nungungulu xungetano hi yena?
6 A kuranza ka Nungungulu xungetano hi Kristu Jesu ku wa patsa a ntiro wu yelanako ni Mufumo. (Luka 8:1) Kona kambe ku wa patsa a muphahlo wa wutomi gakwe go mbhelela kota munhu lezaku ava nzhiho ni xiseketelo xa xivumelwano xiswa. (Mateu 20:28; 26:26-28; Maheberu 10:5-10) Jesu i wonile a xikombiso xa kubapatizwa kakwe hi mati kota xa lisima nguvu. Yena a nga vumelangi lezaku a kupima kakwe ku hambukiselwa ka zinwani zilo. Kala magumo ya wutomi gakwe laha misaveni, yena i lo khomelela kumaheni ka kuranza ka Nungungulu, a maha lezaku a kuxumayela ka Mufumo wa Nungungulu kuva ntiro wo ranga. — Johani 4:34.
A Kubapatizwa Hi Mati Ka Vapizani Va Wukristu
7. A kusukela hi Pentekosta wa lembe ga 33 Nguveni ya Hina, zini lezi a maKristu ma byelilweko a ku maha xungetano hi kubapatiza?
7 A vapizani va kusangula va Jesu va bapatizilwe lomu matini hi Johani zonake va kongomiswa ka Jesu kota lava va nga wa tava ziro za Mufumo wa le tilweni. (Johani 3:25-30) Na va rangelwa hi Jesu a vapizani lavo va bapatizile kutsongwani, laha a kubapatiza loko ku nga fanana ni loku ku mahilweko hi Johani. (Johani 4:1, 2) Hambulezo, a kusukela hi Pentekosta wa lembe ga 33 Nguveni ya Hina, va lo sangula a ku tatisa ntiro lowu va nga nyikilwe wa ku bapatiza “hi vito ga Dadani ni ga N’wana ni ga Moya wa ku Basa.” (Mateu 28:19) U ta vuneka nguvu hi ku vuxeta a ku zi wula yini lezo.
8. Zi wula yini a ku bapatizwa “hi vito ga Dadani”?
8 Zi wula yini a ku bapatizwa “hi vito ga Dadani”? Zi wula a ku vumela a vito gakwe, a xikhundla xakwe, a wuhosi gakwe, a khungo gakwe, ni milayo yakwe. Wona lezi zi patsekako mhakeni leyo. (1) Xungetano hi vito gakwe, a bhuku ga Tisimu 83:18 gi ngalo: “Hi wena wece u nga ni vito ga Jehova, loyi a Hunzeleleko Kutlakuka misaveni yontlhe.” (2) Xungetano hi xikhundla xakwe, a bhuku ga Jeremia 10:10 gi ngalo: “Jehova i Nungungulu wa zinene.” (3) Na gi wulawula hi wuhosi gakwe, a bhuku ga Kuvululelwa 4:11 gi hi byela lezi: “Wena u fanele ku amukela kukhesiwa ni kudumiswa ni ntamu; hakuva hi wena u nga vanga zilo zontlhe, hi kota ya kuranza ka wena zi kona, zi vangilwe.” (4) Kambe hi fanele ku tiva lezaku Jehova hi yena a Munyiki wa Wutomi, loyi a nga ni khungo ga ku hi hanyisa ka xionho ni kufa: “A kuhanyisa kuta hi ka Jehova.” (Tisimu 3:8; 36:9) (5) Hi fanele kambe a ku vumela lezaku Jehova hi Munyiki wa Hombe wa Nayo: “Jehova hi mulamuli wa hina, Jehova munyiki wa nayo wa hina, Jehova i Hosi ya hina.” (Isaya 33:22) Hi kota ya lezi yena a nga zontlhe lezo, ha khongotelwa: “U ta ranza Hosi Nungungulu wa wena hi mbilu ya wena yontlhe, ni muhefemulo wa wena wontlhe, ni kupima ka wena kontlhe.” — Mateu 22:37.
9. Zi wula yini a ku bapatizwa “hi vito . . . ga N’wana”?
9 Zi wula yini a ku bapatizwa “hi vito . . . ga N’wana”? Zi wula a ku tiva a vito, xikhundla, ni wuhosi ga Jesu Kristu. A vito gakwe, Jesu, gi wula lezaku “Jehova Kuhanyisa.” Yena i kuma a xikhundla xakwe hi lezi a nga N’wana a belekilweko yece wa Nungungulu, a matewula ya zivangwa za Nungungulu. (Mateu 16:16; Va Le Kolosi 1:15, 16) Xungetano hi N’wana loye, a bhuku ga Johani 3:16 gi hi byela lezi: “Nungungulu i lo ranza tiko [a vanhu va tirulekako] kota lezi, a kala a nyikela a N’wana wakwe a belekilweko yece, kasi ni wihi loyi a kholwako kakwe a nga lovi, kanilezi ave ni wutomi ga pinzukelwa.” Hi kota ya lezi Jesu a fileko na a tsumbekile, Nungungulu i lo mu vuxa hi ka vafileko a mu nyika wuhosi giswa. Maringano na mupostoli Paule, Nungungulu “i lo mu tlakusa nguvu [Jesu]” lomu wuakweni, a maha wa wumbiri ka Jehova ntsena. Hikwalaho, “hi vito ga Jesu a madzolo ya vontlhe . . . ma ta mu khizamela, kasi a tirimi tontlhe ti fela ku wulela lezaku Jesu Kristu i Hosi, a dumiswa Nungungulu Dadani.” (Va Le Filipi 2:9-11) Lezo zi wula a ku lanzela a zileletelo za Jesu, lezi zi tako hi ka Jehova wutsumbu. — Johani 15:10.
10. Zi wula yini a ku bapatizwa “hi vito . . . ga Moya wa ku Basa”?
10 Zi wula yini a ku bapatizwa “hi vito . . . ga Moya wa ku Basa”? Zi wula a ku vumela a ntiro ni zimaho za moya wa ku basa. Xana xini a moya wa ku basa? I ntamu wu tiriswako hi Jehova, lowu a tatisako ha wona a makungo yakwe. Jesu i lo byela a valanzeli vakwe aku: “Nzi ta kombela ka Dadani, i ta mu nyika munwani Muyimeli, kasi a tshama na nwina kala kupinzuka, wu nga Moya wa zinene.” (Johani 14:16, 17) Xana wona wu wa ta va vuna ku maha yini? Jesu i lo engeta aku kabye: “Mu ta nyikiwa a ntamu, loku wu tile hehla ka nwina a Moya wa ku Basa; zonake mu ta maha vakustumunyu va mina laha Jerusalema, ni le Judia gontlhe, ni le Samaria, ku kala le magemeta-musi ya misava.” (Mitiro 1:8) Hi ku tirisa a moya wa ku basa, Jehova kambe i lo pimisela a kutsaliwa ka Biblia: “A ku na kuprofeta loku ku tileko hi kuranza ka munhu; kanilezi vanhu na va susumetilwe hi Moya wa ku Basa va lo kanela lezi zi nyikilweko vona hi Nungungulu.” (2 Pedro 1:21) Hikwalaho ha vumela a ntiro wa moya wa ku basa a xikhati lexi hi gonzako a Biblia. A ndlela yinwani ya ku vumela a moya wa ku basa hi ku kombela Jehova lezaku a hi vuna ku pswala “a mihanzu ya moya,” leyi yi nga “liranzo, ni kutsaka, ni kurula, ni kutimisela, a wunene, ni kusasa, ni kutsumbeka [“kukholwa,” NM], ni kuolova, ni kutikhoma.” — Va Le Galatia 5:22, 23.
11. (a) Hi wihi a tlhamuselo wa lisine wa kubapatiza masikwini ya hina? (b) Xana a kubapatizwa ku fana ni kufa ni kuvuxiwa hi ndlela muni?
11 A vo sangula ku bapatizwa hi kuyelana ni zileletelo za Jesu kuve vaJuda zinwe ni makholwa ya xiJuda, kusukela a lembe ga 33 Nguveni ya Hina. Xikhatanyana nzhako ka lezo, a lungelo ga kuva vapizani va wuKristu gi lo yiselwa vaSamaria. Makunu, hi lembe ga 36 Nguveni ya Hina, a xirambo lexo xi lo anziswa lezaku xi patsa ni Vamatiko va makhuna. Na va nga se bapatizwa, a vaSamaria ni Vamatiko va wa fanele ku ti hendleleta ka Jehova lezaku va mu tirela kota vapizani va N’wana wakwe. Lowo wa ha hi wona a tlhamuselo wa kubapatizwa ka wuKristu hi mati kala masikwini ya hina. A ku nyupetwa matini hi kumbhelela xikombiso xi faneleko xa kutihendleleta loko, kota lezi a kubapatizwa ku nga kulahliwa ko fananisela. A kunyupetwa ka wena matini a xikhati lexi u bapatizwako ku yimela a kufa ka wena mahanyeleni ya wena ya kale. A kuhumeswa hi lomu matini ku yimela a kuhanya luswa kasi ku maha kuranza ka Nungungulu. A “kubapatiza kunwe” loko ku tira ka vontlhe lava va mahako maKristu ya lisine. Laha kubapatizweni vona va maha Timboni ta Jehova ta wuKristu, a vatireli va Nungungulu va ambexilweko. — Va Le Efesusi 4:5; 2 Va Le Korinte 6:3, 4.
12. Xana a kubapatiza ka wuKristu hi mati ku yelana ni yini, niku hi ndlela muni?
12 A kubapatiza loko ku na ni lisima la hombe la kuhanyisa mahlweni ka Nungungulu. Hi xikombiso, anzhako ka kuva a kumbukile a kuakiwa ka taru hi Noa, lomu yena ni ngango wakwe va nga poniselwa kona ka Ntalo, mupostoli Pedro i tsalile: “A ku fanana ni mati lawa ma mu hanyisako makunu hi kubapatizwa, na ku nga hi ku susa a chaka ga miri, kanilezi hi ku kombela a livalo li nene ka Nungungulu, hi kuvuka ka Jesu Kristu.” (1 Pedro 3:21) A taru gi wa hi xikombiso xi wonekako xa lezaku Noa i wa mahile a ntiro lowu a nga nyikilwe hi Nungungulu hi kutsumbeka. Anzhako ka kuva a mbhetile a ntiro wa ku aka a taru, “a misava leyi yi nga hi kona hi lexo xikhati yi lo khulungelwa hi mati lawa, yi lova.” (2 Pedro 3:6) Kanilezi ‘ku lo hanyiswa matini a ntlhanu wa vanhu ni vanharu ntsena,’ Noa ni ngango wakwe. — 1 Pedro 3:20.
13. Xana a muKristu i poniswa ka yini hi ku bapatizwa hi mati?
13 Inyamutlha, lava va ti hendleletako ka Jehova xiseketelweni xa kukholwa ka Kristu loyi a vuxilweko va bapatizwa kota xikombiso xa kutihendleleta loko. Vona va maha kuranza ka Nungungulu xungetano hi masiku ya hina va tlhela va pona ka tiko legi go biha. (Va Le Galatia 1:3, 4) Va nga ta ha loviswa zinwe ni mafambisela lawa ya kubiha ya zilo. Va ta pona ka kuloviswa loko va tlhela va nyikwa livalo li nene hi Nungungulu. Mupostoli Johani i tiyisa a malanza ya Nungungulu aku: “A tiko ga hunza, ni kunavela ka gona; kanilezi loyi a mahako kuranza ka Nungungulu i ta tshama kala kupinzuka.” — 1 Johani 2:17.
Ngha Hi Hanya Hi Kuyelana Ni Wutihlamuleli Ga Hina
14. Hikuyini a kubapatizwa koce ku nga hiko xitiyisekiso xa lezaku se hi hanyisilwe?
14 Zi wa tava xihoxo a ku alakanya lezaku a kubapatizwa koce xitiyisekiso xa lezaku se hi hanyisilwe. A kubapatizwa ku na ni lisima ntsena loku munhu a ti hendleletile hi lisine ka Jehova ha Jesu Kristu zonake a maha kuranza ka Nungungulu, a tlhela a tsumbeka kala kugumesa. “Loyi a timiselako kala kugumesa, yaloye i ta hanyiswa.” — Mateu 24:13.
15. (a) Hi kwihi a kuranza ka Nungungulu inyamutlha xungetano hi maKristu ma bapatizilweko? (b) Xana a kuva mupizani wa wuKristu zi fanele ku nyikwa lisima muni wutomini ga hina?
15 A kuranza ka Nungungulu xungetano hi Jesu ku wa patsa lezi a nga tirisisa zona a wutomi gakwe kota munhu. A wutomi gakwe gi wa fanele ku nyikelwa kufeni kota muphahlo. Xungetano hi hina, a mimiri ya hina yi fanele ku nyikelwa ka Nungungulu, niku a kuhanya ka hina ku fanele ku hi ka ku ti nyiketela kumaheni ka kuranza ka Nungungulu. (Va Le Roma 12:1, 2) Hakunene hi wa nga tava hi maha kuranza ka Nungungulu loku ha womu hi dzuka hi hanya hi kufanana ni tiko legi gi hi ranzeleko kutani loku a mahanyela ya hina ma hi ya makangwa, na hi tirela Nungungulu kasi ku tatisa nayo ntsena. (1 Pedro 4:1-3; 1 Johani 2:15, 16) A xikhati lexi a muJuda wo kari a nga wutisa lezi a faneleko ku zi maha kasi a kuma a wutomi ga pinzukelwa, Jesu i vumelile lezaku a kuva ni mahanyela ma basileko za lisima. Kanilezi i tlhelile a komba a nchumu wa lisima nguvu a ku hunza lezo: a xilaveko xa kuva mupizani wa wuKristu, a mulanzeli wa Jesu. Lezo zi fanele kuva nchumu wo ranga wutomini. A zi faneli kuva nzhako ka mitiro ya za nyama. — Mateu 19:16-21.
16. (a) Wutihlamuleli muni legi a maKristu wontlhe ma nga nago xungetano hi Mufumo? (b) Kota lezi zi kombiwako hi mifananiso lomu ka maphajina 116 ni 117, hi tihi a tindlela to kari ta ti nene ta ku maha hi tona a ntiro wa Mufumo? (c) Xana a kuhlengela ka hina hi mbilu yontlhe ntirweni wa ku kustumunya ku komba yini?
16 Ku fanele ku khanyiswa kambe lezaku a kuranza ka Nungungulu xungetano hi Jesu ku wa patsa a ntiro wa lisima wu yelanako ni Mufumo wa Nungungulu. Jesu wutsumbu i wa totilwe lezaku ava Hosi. Kanilezi a xikhati lexi a nga hi misaveni, yenawu i nyikile wukustumunyu hi kuchivirika xungetano hi Mufumo. Hinawu hi na ni ntiro wo fana wa ku kustumunya, niku hi na ni xigelo xa hombe xa ku wu maha hi mbilu yontlhe. Hi ku maha lezo, hi kombisa a kubonga ka hina a wuhosi ga Jehova zinwe ni liranzo la hina ka vanhu-kulori. (Mateu 22:36-40) Hi komba kambe lezaku hi na ni wumunwe ni vakhozeli-kulori va misava yontlhe, lava vontlhe va nga vahuweleli va Mufumo. Hina hontlheni, hi wumunwe ga hina ga misava yontlhe, hi komama wutomini ga pinzukelwa xipanzeni xa laha misaveni xa Mufumo lowo.
Ziwutiso Za Kuvuxeta
• Kufanana muni niku kuhambana muni ku nga kona xikari ka kubapatizwa ka Jesu ni kubapatizwa hi mati ka nyamutlha?
• Zi wula yini a ku bapatizwa “hi vito ga Dadani ni ga N’wana ni ga Moya wa ku Basa”?
• Xana a ku hanya hi kuyelana ni wutihlamuleli ga kubapatizwa ka wuKristu hi mati zi patsa yini?
[Mifota ka phajina 116, 117]
TINDLELA TO KARI TA KU HUWELELA A MUFUMO
Hi ku tlhela hi enzela vatsakeli
Ka maxaka
Ka vatiri-kulori
Ka zigonzani-kulori
Lomu maruweni
Hi muti-ni-muti
Zigonzweni za Biblia za lomu mitini