Xipimo Xa Wukhume Ni Ntlhanu Ni Mune
Simama Ku Kanela Mhaka Ya Nungungulu Hi Kutiya
1. (a) Mahungu muni yo saseka lawa a vapizani va Jesu va ma huweleleko, kanilezi xana a vaJuda vo kari va hlamulisile kuyini? (b) Ziwutiso muni lezi hi zi kotako ku ti wutisa?
A XIPIMO xa 2.000 wa malembe nzhako, a N’wana wa Nungungulu, Jesu Kristu, i lo totiwa kota Hosi leyi yi nga wa ta fumela misava yontlhe xikhatini xi tako. Jesu i lo dawa hi kota ya kukucetela ka valala vakwe va wukhongeli, kanilezi Jehova i lo mu vuxa hi ka vafileko. Ha Jesu, a wutomi ga pinzukelwa gi wa koteka makunu. Hambulezo, a xikhati lexi a vapizani va Jesu va nga huwelela a mahungu yo saseka, va lo sangula a ku xaniswa. A vo kari va vona va lo khotselwa paxweni, hambu ku biwa va tlhela va layiwa lezaku va nyima a ku kanela ha Jesu. (Mitiro 4:1-3, 17; 5:17, 18, 40) Xana va wa ta maha yini? Wena ke, xana u wa tava u mahile yini? Xana u wa tava u simamile a ku kustumunya hi kutiya?
2. (a) Hi wahi a mahungu yo tsakisa lawa ma faneleko ku huwelelwa masikwini ya hina? (b) Himani a nga ni wutihlamuleli ga ku xumayela a mahungu yo saseka?
2 Hi 1914, Jesu Kristu, a Hosi ya Mufumo wa Nungungulu, i lo yimiswa xitshanwini xa wuhosi le tilweni lezaku a ‘fuma xikari ka valala vakwe.’ (Tisimu 110:2) Hi kulanzela, Satani ni madimoni yakwe va lo hoxwa misaveni. (Kuvululelwa 12:1-5, 7-12) A masiku ya kugumesa ya mafambisela lawa yo biha ma lo sangula. A xikhati lexi a masiku lawo ma to gumesa, Nungungulu i ta lovisa a mafambisela wontlhe ya zilo ya Satani. (Danieli 2:44; Mateu 24:21) Lava va to pona va tava ni kutsumba ka ku hanya kala kupinzuka laha misaveni leyi yi ta nga maha paradise. Loku wena u vumelile a mahungu lawo yo saseka, u ta lava a ku ma bhulela vanwani. (Mateu 24:14) Kanilezi hi wihi a hlamulo lowu u nga wu rinzelako?
3. (a) Xana a vanhu va hlamulisa kuyini a mahungu ya Mufumo? (b) I mhaka muni leyi hi faneleko ku yimisana nayo?
3 A xikhati lexi u huwelelako a mahungu yo saseka ya Mufumo, a vanhu vo kari va zi kota ku ma amukela, kanilezi a wunyingi ga vona va nga ta khatala ha wona. (Mateu 24:37-39) A vo kari va zi kota a ku ku tseketsela kutani ku ku kaneta. Jesu i nyikile xitlharihiso xa lezaku za koteka a ku u kanetwa hi maxaka ya wena futsi. (Luka 21:16-19) Wa zi kota ku kanetwa kambe le ntirweni kutani le xikoleni. A matshanwini yo kari ya misava, a Timboni ta Jehova ta tlhela ti beletelwa hi mufumo. Loku u tlhangana ni matshamela lawo, xana u ta simama a ku kanela a mhaka ya Nungungulu hi kutiya u tlhela u yima ‘u ku nde kukholweni’? — 1 Va Le Korinte 16:13.
A Hi Tsumbi A Ntamu Wa Hina Wutsumbu
4. (a) Xini xi nga xa lisima lezaku hiva malanza yo tsumbeka ya Nungungulu? (b) Hikuyini a mitlhangano ya wuKristu yi hi ya lisima nguvu?
4 A xa lisima kasi kuva nanza ga Jehova gi tsumbekileko ku khomelela ka malulamiselo yakwe. A ginwe ga malulamiselo lawo mitlhangano ya bandla. A Mitsalo ya hi kuca lezaku hi nga tsiki ku khatala ha yona. (Maheberu 10:23-25) Lava va simamako a kuva Timboni ta Jehova to tsumbeka va ti karata lezaku vava kona mitlhanganwini ni vakhozeli-kulobye hi kukhanzakanya. Ka mitlhangano leyo a wutivi ga hina xungetano hi Mitsalo ga engetelwa. Kambe, a kuzwisisa ka hina a zinene zi tiviwako khwatsi kaya mahlweni, niku a kutiva ka hina a tindlela ta ku zi tirisa ka anziswa. Ha tshinetwa ka vamakabye va hina va maKristu wukhozelini ginwe niku ha tiyiswa lezaku hi maha kuranza ka Nungungulu. A moya wa Jehova wu nyika wurangeli hi ku tirisa a bandla, niku hi moya lowo, Jesu i kona xikari ka hina. — Mateu 18:20; Kuvululelwa 3:6.
5. A xikhati lexi a Timboni ta Jehova ti kumekako na ti beletelwa, zini zi mahiwako xungetano hi mitlhangano?
5 Xana waya mitlhanganwini yontlhe hi kukhanzakanya, niku xana wa zi tirisa wutomini ga wena lezi u zi zwako na zi wulawuliwa kwaseyo? A zikhati zo kari, loku a Timboni ta Jehova ti kari ti beletelwa, ku laveka lezaku a mitlhangano yi mahiwa hi mitlawa yi tsongwani lomu mitini. A matshamu ni zikhati za kona zi nga ha hambana niku za koteka a ku zi ngavi lezi zi hi tsakisako, ni lezaku a mitlhangano yo kari yi nga ha mahiwa xikari ka wusiku. Kanilezi, hambulezi zi nga tsakisiko kutani zi zi kotako ku neha timhango, a vamakabye va xinuna ni va xisati vo tsumbeka va ti karata hi mbilu yontlhe lezaku vava kona ka tlhangano wunwe ni wunwani.
6. Xana hi kombisa kuyini a kukhomelela ka hina ka Jehova, niku xana ku nga hi vunisa kuyini a ku simama hi kanela hi kutiya?
6 A ku khomelela ka Jehova ku tiyiswa hi ku khongela ka yena hi kukhanzakanya, na hi tiva lezaku ha lava a xivuno xa Nungungulu. Xana wa maha lezo? Jesu i khongelile hi kuphindaphinda wutirelini gakwe ga laha misaveni. (Luka 3:21; 6:12, 13; 22:39-44) Niku ka wusiku ga mahlweni ka kubelelwa kakwe, i lo khongotela a vapizani vakwe aku: ‘[‘Tshamani na mu,’ NM] rinzele, mu khongela, kasi mu nga engheni kuringweni.’ (Marku 14:38) Loku hi kuma vanhu va nga khataliko hi mahungu ya Mufumo, hi nga ringwa lezaku hi loloha wutirelini ga hina. Loku a vanhu va hi tseketsela, hi nga tizwa na hi ringwa lezaku hi miyela a ku xumayela kasi hi potsa zikarato. Kanilezi loku hi khongelela a moya wa Nungungulu hi mbilu yontlhe lezaku wu hi vuna ku simama hi kanela hi kutiya, hi ta vikelwa a kuva hi nga hluliwi hi ziringo lezo. — Luka 11:13; Va Le Efesusi 6:18-20.
Matimu Ya Ku Kustumunya Hi Kutiya
7. (a) Hikuyini a tlhatlhambuto lowu wu nga lomu bhukwini ga Mitiro wu nga ni lisima la hombe nguvu ka hina? (b) Hlamula a ziwutiso lezi zi nga magumo ka nzimana leyi, u tlhela u khanyisa lezi a mahungu lawo ma zi kotako ku ku vunisa zona.
7 A tlhatlhambuto wu nga lomu bhukwini ga Mitiro wu na ni lisima la hombe nguvu ka hina hontlhe. Wona wu hi byela lezi a vapostoli ni vapizani vo sangula — va nga hi vanhu va nga hi ni kutizwa ko fana ni loku ka hina — va hlulisileko zona a zihingakanyiso va tlhela va ti komba na va hi vakustumunyu vo tiya ni vo tsumbeka va Jehova. A hi kambisiseni a xipanze xa tlhatlhambuto lowo hi ku vuniwa hi ziwutiso lezi zi lanzelako zinwe ni mitsalo leyi yi kumbukilweko ka zona. A xikhati lexi hi mahako lezo, zama ku wona a ndlela leyi wena wutsumbu u zi kotako ku vuneka ha yona hi lezi u zi gonzako.
Xana a vapostoli va wa hi vanhu va gonzileko nguvu? Xana vona hi ntumbuluko va wa hi vanhu vo tiya-hlana, na ku nga khataliseki lezi zi humelelako? (Johani 18:17, 25-27; 20:19; Mitiro 4:13)
Zini zi vunileko Pedro lezaku a wulawula hi kutiya mahlweni ka hubye ya vaJuda leyi yi nga konile a N’wana wa Nungungulu? (Mateu 10:19, 20; Mitiro 4:8)
Zini lezi a vapostoli va nga kari va zi maha nzeni ka maviki ya mahlweni ka kunehiwa kabye Hubyeni? (Mitiro 1:14; 2:1, 42)
A xikhati lexi a vafumeli va layileko a vapostoli lezaku va tsika ku xumayela vitweni ga Jesu, xana Pedro na Johani va hlamulisile kuyini? (Mitiro 4:19, 20)
Anzhako ka kutlhatlhiwa kabye, xana a vapostoli va tlhelile va kombela xivuno ka mani? Xana va khongelele lezaku a kuxaniswa ku nyima, kutani va khongelele yini? (Mitiro 4:24-31)
Xana Jehova i kumekisile kuyini xivuno a xikhati lexi a vakaneti va nga zama a ku nyimisa a ntiro wa kuxumayela? (Mitiro 5:17-20)
Xana a vapostoli va kombisile kuyini lezaku va wa xi tiva a xigelo xa kutlhatlhiwa kabye? (Mitiro 5:21, 41, 42)
Hambu ka xikhati lexi a vapizani vo tala va nga hangalakile hi kota ya tixanisa, zini lezi va simamileko va zi maha? (Mitiro 8:3, 4; 11:19-21)
8. Hi wahi mabhinzu yo tsakisa lawa ma kumilweko ka wutireli ga vapizani va kusangula, niku xana hina hi kalile hi patsekisa kuyini ka gona?
8 A ntiro wa ku xumayela mahungu yo saseka i ntiro wo nyawula. A kuringana 3.000 wa vapizani va bapatizilwe hi Pentekosta wa 33 Nguveni ya Hina. “Lava va nga kholwa ka Hosi va lo engetelwa nguvu, a wunyingi ga vavanuna ni vavasati.” (Mitiro 2:41; 4:4; 5:14) Hi kufamba ka xikhati, hambu muxanisi wa tihanyi wa vanhu va Nungungulu, Saule wa le Tarsusi, i lo maha muKristu a tlhela a sangula a ku kustumunya a zinene hi kutiya. Yena i lo kala a tibyiwa kota mupostoli Paule. (Va Le Galatia 1:22-24) A ntiro lowu wu nga sangula ka zana ga malembe ga kusangula a wu se nyima. Wona wu kumile ntamu masikwini lawa ya kugumesa wu tlhela wu chikela matshanwini wontlhe ya misava. Hi na ni lungelo ga ku hlengela ka wona, niku a xikhati lexi hi mahako lezo, ha zi kota ku gonza hi ka xikombiso xi vekilweko hi vakustumunyu va kutsumbeka lava va tirileko mahlweni ka xikhati xa hina.
9. (a) Zikhati muni lezi Paule a zi tirisileko lezaku a kustumunya? (b) Xana wena u hangalasa a mahungu ya Mufumo ka vanwani hi tindlela muni?
9 A xikhati lexi Paule a gonzileko a zinene xungetano hi Jesu Kristu, zini a nga maha? “Zalezo i loba hungu hi Jesu . . . lezaku i N’wana wa Nungungulu.” (Mitiro 9:20) Yena i lo bonga a wuxinji ga Nungungulu ka yena, niku i wa zi tiva lezaku a vanhu vontlhe va na ni xilaveko xa ku amukela a mahungu yo saseka lawa yena a nga ma amukele. Paule i wa hi muJuda, niku hi kuya hi mukhuwo wa masiku lawo, yena i loya masinagogeni lezaku a ya nyika wukustumunyu. Yena kambe i lo xumayela hi muti-ni-muti a tlhela a wulawula ni vanhu laha bazarini. Niku i wa xuva kuya xumayela mahungu yo saseka ka matshamu manwani. — Mitiro 17:17; 20:20; Va Le Roma 15:23, 24.
10. (a) Xana Paule i kombisile kuyini lezaku hambu lezi a nga tiyile-hlana i wa hi ni kuxiyelela ka ndlela leyi a nga kustumunya ha yona? (b) Xana hi nga kombisa kuyini a matshamela ya Paule a xikhati lexi hi kustumunyako ka maxaka, ka vatiri-kulori, kutani ka zigonzani-kulori?
10 Paule i wa tiyile-hlana kanilezi i wa hi ni kuxiyelela, a ku fana ni lezi hi faneleko kuva zona. A ka vaJuda i wa wulawula hi zitsumbiso lezi Nungungulu a nga mahele vakoko vabye. A ka vaGreki i lo wulawula hi zilo lezi va nga zi tolovele. Ka zikhati zo kari i wa tirisa matshango ya yena nwinyi ya lezi a gonzisileko zona a zinene kota ndlela ya ku nyika wukustumunyu. Yena i te ngalo: “Nzi maha zontlhe lezo hi kota ya ivangeli, kasi nzi fela ku kuma xiavelo ka yona zinwe navo.” — 1 Va Le Korinte 9:20-23; Mitiro 22:3-21.
11. (a) Zini lezi Paule a zi mahileko kasi ku potsa a ku phikizana hi kuphindaphinda ni vakaneti? (b) Hi rini hi faneleko a ku pimanyisa a xikombiso xa Paule hi wutlhari, niku xana hi nga zi maha hi ndlela muni? (c) Xana a ntamu wa ku simama hi kanela hi kutiya wuta hi kwihi?
11 A xikhati lexi a kukanetwa ku mahileko lezaku Paule a zi wona na zi hi chukwana a ku ya xumayela ka wutshamu ginwani hi xikhati xo kari, yena i lo maha lezo wutshanwini ga ku simama a phikizana hi kuphindaphinda ni vakaneti. (Mitiro 14:5-7; 18:5-7; Va Le Roma 12:18) Kanilezi yena i wa nga tshuki a va ni tingana hi mahungu yo saseka. (Va Le Roma 1:16) Hambulezi Paule a nga karateka hi kota ya lezi a vakaneti va nga kari va mu khoma hi ndlela yo kala xichawo — hambu ni ya tihanyi — yena i lo “tiya-hlana ka Nungungulu wa hina” lezaku a simama ku xumayela. Yena i te ngalo: “A Hosi yi lo nzi yimela, yi nzi tiyisa, kasi a mhaka ya fela ku biwa hungu hi mina matlhelweni wontlhe.” (1 Va Le Tesalonika 2:2; 2 Timote 4:17) Jesu, a Hloko ya bandla ga wuKristu, wa ha simama a ku hi nyika a ntamu hi wu lavako kasi ku maha a ntiro lowu a wu wulileko na ka ha hi mahlweni xungetano hi masiku ya hina. — Marku 13:10.
12. Xini xi kombisako a kutiya ka maKristu, niku hi xihi a xiseketelo xa kona?
12 Hi na ni xigelo xa hombe xa lezaku hi simama hi kanela a mhaka ya Nungungulu hi kutiya, khwatsi hi lezi Jesu ni malanza manwani ya Jehova ma mahileko ka zana ga malembe ga kusangula. Lezo a zi wuli a ku nga khatali kutani a ku zama ku kurumeta vanhu lava va nga ma laviko mahungu lawo. Kanilezi a hi tsiki ku kanela hi kota ya lezi a vanhu va nga khataliko, ge hambu ku miyetwa hi kukanetiwa. A ku fana na Jesu, hi xumayela a Mufumo wa Nungungulu kota mufumo wu nga ni fanelo ya ku fumela misava yontlhe. Hi kanela hi kutiya hakuva hi yimela Jehova, a Hosi ya Hombe Wuakweni Gontlhe, ni lezaku a mahungu lawa hi ma huwelelako a hi ya hina kanilezi yakwe. Niku a liranzo la hina ka Jehova li fanele kuva xigelo xa kutiya nguvu xa ku mu dumisa. — Va Le Filipi 1:27, 28; 1 Va Le Tesalonika 2:13.
Ziwutiso Za Kuvuxeta
• Hikuyini zi nga za lisima a ku hlengela a mahungu ya Mufumo ni vanhu vontlhe hi laha zi kotekako ha kona, kanilezi mihlamulo muni leyi hi zi kotako ku yi rinzela?
• Xana hi nga kombisa kuyini lezaku a hi tsumbi a ntamu wa hina wutsumbu kasi ku tirela Jehova?
• Zigonzo muni za lisima lezi hi zi kumako lomu bhukwini ga Mitiro?
[Mifota ka phajina 173]
A ku fana ni kale, a malanza ya Jehova inyamutlha ma kanela a mhaka ya Nungungulu hi kutiya