Xipimo Xa Wumakume Mambiri
Tshama Na U Langutele A Siku Ga Jehova
1. A xikhati lexi u nga sangula ku gonza lezaku a kutlhatlhiswa hi ka kuxaniseka ka mafambisela lawa ya kale ku tshinele, xana u ti zwisile kuyini?
A XINWE xa zilo zo ranga lezi u zi gonzileko lomu ka Biblia hi lezaku a khungo ga Jehova xungetano hi misava yontlhe hi kuva yiva paradise. A misaveni leyo ya yiswa, a yimpi, wugevenga, wusiwana, mababyi, kuxaniseka, ni kufa zi nga ta hava kona. Hambu a vafileko va ta tlhela va hanya. A hi kutsakisa ka zona! A kutshinela ka zontlhe lezo ku dlunyatiswa hi xikombiso xa lezaku a kuvakona ka Kristu ku nga wonekiko kota Hosi yi fumako ku sangulile hi 1914 niku a kusukela ka xikhati lexo hi le masikwini ya kugumesa ya tiko legi ga kubiha. A kumbheleni ka masiku lawa ya kugumesa, Jehova i ta lovisa a mafambisela lawa ya zilo a tlhela a neha a misava yiswa leyi yi tsumbisilweko.
2. Xini a ‘siku ga Jehova’?
2 A Biblia gi vita a xikhati lexo xa kulovisa kota “siku ga Hosi [“Jehova,” NM].” (2 Pedro 3:10) I ‘siku ga zanga ya Jehova’ na a vukela a tiko gontlhe ga Satani. (Zefania 2:3) Gona gi chikela magumo ya gona ‘kulweni ka siku lego ga hombe ga Nungungulu wa Ntamu-wontlhe . . . legi hi xiHeberu va nge i Har–Magedoni,’ laha a ‘tihosi ta misava yontlhe’ ti ta nga loviswa. (Kuvululelwa 16:14, 16) Xana a mahanyela ya wena ma komba lezaku wa tiyiseka ku ngalo a ‘siku legi ga Jehova’ gi tshinele? — Zefania 1:14-18; Jeremia 25:33.
3. (a) Xana a siku ga Jehova gi tata rini? (b) Xana a kuva Jehova a nga wulangi a ‘siku kutani xikhati’ zi ti komba zi hi xivuno hi ndlela muni?
3 A Biblia a gi hi byeli a siku go kongoma legi Jesu Kristu a ta ngata ha gona kota Mulamuli wa Jehova kasi ku ta lovisa a mafambisela ya zilo ya Satani. Jesu i te ngalo: “Lego siku kutani lexo xikhati, a nga kona ni munwe a zi tivako, hambu ni tingelosi ta le tilweni, hambu ni N’wana, sine Dadani yece.” (Marku 13:32) Loku a vanhu vo kari va nga ranzi Jehova hi lisine, va ta byekelela ku thinda a siku gakwe mapinwini yabye zonake va tlhelela mitirweni yabye ya za nyama. Kanilezi lava hakunene va ranzako Jehova va ta mu tirela hi muhefemulo wontlhe, na ku nga khataliseki a xikhati lexi a magumo ya mafambisela lawa yo biha ma ta ngata ha xona. — Tisimu 37:4; 1 Johani 5:3.
4. Zini lezi Jesu a zi wulileko kota xitlharihiso?
4 Kota xitlharihiso ka lava va ranzako Jehova, Jesu i ngalo: “Tlharihani, mu rinzela . . . ; hakuva a mu zi tivi lezaku xi tava xikhati muni.” (Marku 13:33-37) Yena i hi khongotela lezaku hi nga vumeleli a kuga ni kunwa kutani “kukaratekela ka loku kuhanya” lezaku zi koka a kupima ka hina hi ndlela ya kuza hi nga woni a xihatla xa masiku lawa. — Luka 21:34-36; Mateu 24:37-42.
5. Kota lezi Pedro a zi tlhamuseleko, zini lezi a siku ga Jehova gi ta nga zi neha?
5 Hi kufanana, Pedro wa hi khongotela lezaku hi tshama na hi langutele ‘a kuvakona ka siku ga Jehova, legi a matilo ma ta nga hiswa ha gona ma nyunguluka, ni lezi zi ma wumbako zi ta nga nyeka hi kuhisa ka hombe.’ A mifumo yontlhe ya vanhu — ‘a matilo’ — yi ta loviswa, a ku fana ni vanhu vontlhe va kubiha — ‘a misava’ — ni ‘lezi zi yi wumbako,’ ku nga maalakanyo ni mitiro ya tiko legi go biha, yo kota a moya wa kutihambanyisa na Nungungulu zinwe ni mahanyela ma nga hlazekangiko ni ya ku lanzelela zilo zi wonekako. A zilo lezo zi ta valetwa hi ‘matilo maswa [a Mufumo wa le tilweni wa Nungungulu] ni misava yiswa [a wuhlengeli giswa ga vanhu], lomu a kululama ku ta nga tshama kona.’ (2 Pedro 3:10-13, NM) A zimaho lezo zi to tsekatsekisa tiko zi ta sangula hi xitshuketi ni ka siku ni xikhati zi kalako zi nga rinzeliwangi. — Mateu 24:44.
Tshama Na U Langutele A Xikombiso
6. (a) Xana a hlamulo wa Jesu ka xiwutiso xa vapizani vakwe xungetano hi kugumesa ka mafambisela ya xiJuda wu tatisekile hi mpimo muni? (b) Hi zihi zipanze za hlamulo wa Jesu lezi zi yisako kupima ka zimaho ni matshamela kusukela 1914 ni kuya mahlweni?
6 Hi kota ya xikhati lexi hi hanyako ka xona, hi fanele ku tiva khwatsi zontlhe lezi zi patsekako ka xikombiso xi wumbiwako hi zinwani zikombiso, lexi xi tivekisako a masiku yo gumesa — “kugumesa ka tiko [“mafambisela ya zilo,” NM].” Tiva lezaku a xikhati lexi Jesu a nga hlamula a xiwutiso xa vapizani vakwe, xi tsalilweko lomu ka Mateu 24:3, a zo kari za lezi a zi tlhamuseleko ka mavesi 4 kala ka 22 zi tatisekile hi mpimo wutsongwani mafambiseleni ya xiJuda nzeni ka malembe ya kusukela 33 kala 70 Nguveni ya Hina. Kanilezi a xiprofeto lexi xi na ni kutatiseka ka hombe xikhatini xa kusukela 1914, ku nga xikhati xa kuvakona “ka Kristu ni kugumesa ka tiko [“mafambisela ya zilo,” NM].” A bhuku ga Mateu 24:23-28 gi wula lezi zi nga wa ta maheka kusukela a lembe ga 70 Nguveni ya Hina kala xikhatini xa kuvakona ka Kristu. Lezi zi tsalilweko lomu ka Mateu 24:29–25:46 zi maheka xikhatini xa kugumesa.
7. (a) Hikuyini hina wutsumbu hi faneleko ku tshama na hi langutele a matshamela lawa zalezi ma tatisako a xikombiso xa masiku yo gumesa? (b) Hlamula a ziwutiso lezi zi nga magumo ka nzimana leyi, na u komba lezi a xikombiso xa masiku yo gumesa xi tatisekisako zona kusukela 1914.
7 Hina wutsumbu hi fanele ku xiyelela a zimaho ni matshamela lawa ma tatisako a xikombiso xa masiku yo gumesa. A ku zwananisa a zilo lezo ni wuprofeti ga Biblia zi ta hi vuna a ku tshama na hi langutele a siku ga Jehova. Zona kambe zi ta hi vuna a ku wulawula hi ndlela yi kucako a xikhati lexi hi tlharihisako vanwani xungetano hi kutshinela ka siku lego. (Isaya 61:1, 2) Na hi alakanyela a makungo lawo, a hi vuxeteni a ziwutiso lezi zi lanzelako, ku nga lezi zi dlunyatisako a zipanze za xikombiso, kota lezi zi tsalilweko lomu ka Mateu 24:7 ni ka Luka 21:10, 11.
Xana kutatiseka muni ka hombe nguvu ku ngava ni xiprofeto xa ku ‘a tiko gi vukela ginwani tiko, ni mufumo wu vukela munwani mufumo’ kusukela 1914? Xungetano hi tiyimpi, zini zi mahekako kusukela lembe lego?
Hi 1918, i ntungu muni lowu wu deleko nguvu vanhu a ku hunza a Yimpi yo Sangula ya Misava? (Wona a bhuku Vutivi Lebyi Yisaka eVuton’wini Lebyi Nga Heriki, xipimo 11, nzimana 7.) Hambulezi a vanhu va tivako tindlela to tala ta ku chuma mababyi, hi wahi a mababyi lawa ma ha dayako timiliyoni ta vanhu?
Hambu lezi ku wonekileko kuanza ka hombe xungetano hi siensia ka zana ga malembe gi hunzileko, xana a tindlala ti khumba a mpimo muni wa vanhu misaveni?
Zini zi ku kholwisako lezaku a bhuku ga 2 Timote 3:1-5, 13 a gi wulawuli hi lezi a wutomi gi nga tshamisile zona kale, kanilezi gi wulawula hi lezi a matshamela lawo yo biha ma anzisako zona ka xikhati lexi hi kongomako kumbheleni ka masiku yo gumesa?
Kuhambanyiswa Ka Vanhu
8. (a) Xini kambe, xi tsalilweko lomu ka Mateu 13:24-30, 36-43, lexi Jesu a xi zwananisileko ni kugumesa ka mafambisela ya zilo? (b) Xana a mufananiso wa Jesu wu wula yini?
8 Ku na ni zinwani zimaho za lisima lezi Jesu a zi zwananisileko ni kugumesa ka mafambisela ya zilo. A xinwe xa zona kuhambanyiswa ka “vana va mufumo” hi ka “vana va loyi wa kubiha.” Jesu i wulawulile hi zona lomu ka mufananiso wa simu ga mavele legi a nala wo kari a xwanyeleko nyasavari hehla ka timbewu ta gona. A “mavele” ya mufananiso lowo ma yimela a maKristu ya lisine lawa ma totilweko. A “nyasavari” hi lava va ti wulako lezaku maKristu kanilezi na va ti komba kuva “vana va loyi wa kubiha” hakuva va namarela ka tiko legi Diyabu a nga mufumeli wa gona. Lavo va hambanyiswa hi ka “vana va mufumo [wa Nungungulu]” va tlhela va vekwa zifungo kasi va loviswa. (Mateu 13:24-30, 36-43) Xana a kuhambanyiswa loko ku mahekile hakunene?
9. (a) Anzhako ka Yimpi yo Sangula ya Misava, hi kwihi kuhambanyiswa ka hombe ka vanhu vontlhe lava va ti wulako maKristu loku ku mahekileko? (b) Xana a maKristu ma totilweko ma nyikisile kuyini xikombiso xa lezaku wona ma wa hi malanza ya lisine ya Mufumo?
9 Anzhako ka Yimpi yo Sangula ya Misava, kuve ni kuhambanyiswa ka vanhu lava va ti wulako maKristu hi mitlawa yimbiri: (1) A varangeli va Wukristu ga mawunwa ni valanzeli vabye, lava va ti kombileko na va hi vayimeli vo tiya va Zwanano wa Matiko (zalezi ku nga Tlhangano wa Matiko) na va simama kuva vo tsumbeka ka matiko, ni (2) maKristu ya lisine ya xikhati xa nzhako ka yimpi leyo, lawa ma seketeleko a Mufumo wa wuMessia hi kumbhelela, ku nga hi mifumo ya tiko legi. (Johani 17:16) Lavo va ti kombile kota malanza ya lisine ya Mufumo wa Nungungulu hi ku xumayela “a ivangeli leyi ya mufumo” misaveni yontlhe. (Mateu 24:14) Ku vile yihi mihanzu ya kona?
10. Kuve wihi a hanzu wo ranga wa ntiro wa kuxumayelwa ka Mufumo?
10 A kuranga, ku vile ni kutsombanyiswa ka misalela ya lava va totilweko hi moya wa Nungungulu, lava va nga ni kutsumba ka kuva zinwe na Kristu kota xipanze xa Mufumo wa le tilweni. Hambulezi a vatotilweko lavo va nga hangalakile xikari ka matiko, vona va lo tlhanganyiswa vava hlengeletano yi nga ni wumunwe. A kuvekwa ka zifungo ko gumesa ka vatotilweko lavo ka tshinela. — Kuvululelwa 7:3, 4.
11. Hi wihi a ntiro wa kuhlengeleta lowu wu simamako, niku wu yelana ni xiprofeto xihi?
11 Hi kulanzela, ku lo sangula a kuhlengeletwa ka “xidlemo xa tsanza-vahlayi, xa matiko wontlhe, ni tixaka, ni mifumo, ni tirimi,” na ku rangelwa hi Kristu. Lavo va wumba a ntlawa wa “tiyivu tinwani” leti ti to pona “kuxanisekeni ka hombe” lezaku ti nghena misaveni yiswa ya Nungungulu. (Kuvululelwa 7:9, 14; Johani 10:16) A ntiro lowu wa ku xumayela Mufumo wa Nungungulu na ku nga se chikela kugumesa wa ha simama kala xikhatini lexi. Hi kutsumbeka, a xidlemo xa tsanza-vahlayi xa tiyivu tinwani, lexi zalezi xi nga ka ntsengo wa timiliyoni, xi vunetela a misalela ya lava va totilweko lezaku va huwelela a mahungu ya lisima ya Mufumo. A mahungu lawa ma zwiwa matikweni wontlhe.
Zini Zi To Maheka Xikhatini Xi Tako?
12. Xana hi fanele ku xumayela kala kwihi na gi nga se chikela a siku ga Jehova?
12 Zontlhe lezi hi zi wonileko lehehla zi komba lezaku ha tshinela kumbheleni ka masiku ya kugumesa niku a siku ga Jehova gi laha kusuhani nguvu. Kanilezi, xana ka ha hi ni ziprofeto zi faneleko ku tatiseka mahlweni ka kusangula ka siku lego go chavisa? Ina. A xo ranga hi lezaku a kuhambanyiswa ka vanhu xungetano hi mhaka ya Mufumo a ku se gumesa. Ka matshamu yo kari lawa ku ngave ni kukanetwa ka hombe hi malembe yo hlaya, ka woneka a kuengetela ka vapizani vaswa makunu. Hambu lomu a vanhu va alako a mahungu yo saseka, a tipswalo ta Jehova ta ha kombiswa hi lezi hina hi nyikako wukustumunyu. Hikwalaho, simama u tira! Jesu wa hi tiyisa lezaku a xikhati lexi a ntiro wu to gumesa, a magumo ma tata.
13. Kota lezi zi tsalilweko lomu ka 1 Va Le Tesalonika 5:2, 3, hi xihi a ximaho xi faneleko ku khatalelwa lexi xa ha ta mahekako, niku xana a ximaho lexo xi ta wula yini ka hina?
13 A xinwani xiprofeto xa Biblia lexi xi nga ni tlhamuselo wa lisima nguvu xi wulile lezi na ka ha hi mahlweni: “Laha va ta ngaku ngalo: Matiko ma etlele, a ku na nchumu, zonake hi xitshuketi xa zalezo a kulobyiswa ku tava hehla kabye, khwatsi hi wasati laha a lunwako; vona cima va nga ta pona.” (1 Va Le Tesalonika 5:2, 3) Lezi a kuhuwelelwa loko ka ‘kuetlela ka matiko ni ku nga hi na nchumu’ ku ta nga mahekisa zona ka ha ta woneka. Kanilezi lezo hakunene zi nga ta wula lezaku a varangeli va tiko va tava va tlhatlhile a zikarato za vanhu. Lava va langutelako a siku ga Jehova va nga ta khohliswa hi kuhuwelelwa loko. Vona va zi tiva lezaku anzhakunyana ka lezo, ku tata a kulobyiswa ka xitshuketi.
14. Zimaho muni lezi zi to maheka kuxanisekeni ka hombe, niku xana zi ta xaxametiswa kuyini?
14 A kusanguleni ka kuxaniseka ka hombe, a vafumeli va ta vukela Babuloni wa Hombe, a mufumo wa misava yontlhe wa wukhongeli ga mawunwa, va tlhela va mu lovisa. (Mateu 24:21; Kuvululelwa 17:15, 16) Anzhako ka lezo, a mifumo yi ta vukela vontlhe lava va seketelako a wuhosi ga Jehova, kasi lezo zi ta vindlukisa a zanga ya Jehova hehla ka mifumo ya wupolitika ni vaseketeli va yona, zonake zi gumesa hi kulobyiswa kabye va ku bhi. Leyo yi tava yimpi ya Har–Magedoni, leyi yi tova magumo ya kuxaniseka ka hombe. Hi kulanzela, Satani ni madimoni yakwe va ta hoxiwa nkeleni wa lieswila, lezaku va nga ha zi koti ku kucetela vanhu. Loko ku tava kugumesa ka siku ga Jehova laha a vito gakwe gi ta nga basiswa. — Ezekieli 38:18, 22, 23; Kuvululelwa 19:11–20:3.
15. Hikuyini zi nga hiko wutlhari a ku alakanya lezaku a siku ga Jehova ga ha hi kule?
15 A kugumesa ka mafambisela lawa ku tata hi xikhati xi faneleko, hi kuyelana ni xikhati xi yimisilweko xa Nungungulu. Ku nga ta thindeka. (Habakuka 2:3) Alakanya lezaku a kuloviswa ka Jerusalema hi 70 Nguveni ya Hina ku tile hi kuhatlisa, ka xikhati lexi a vaJuda va nga kala va nga ku rinzelangi, na va alakanya lezaku a mhango yi wa hunzile. Hi nga kuyini hi Babuloni wa kale? I wa hi ni ntamu wa hombe, na a ti tsumba, niku i wa bhiyelwe hi makhokhola ya hombe nguvu. Kanilezi i wile hi wusiku ginwe. Hi kufanana, a kulobyiswa ka xitshuketi ku tata hehla ka mafambisela lawa ya kubiha. A xikhati lexi ku ta ngata, ngha hi kumiwa na hi hi ni wumunwe wukhozelini ga lisine, na hi langutele a siku ga Jehova.
Ziwutiso Za Kuvuxeta
• Hikuyini zi nga za lisima a ku tshama na hi langutele a siku ga Jehova? Xana hi nga zi mahisa kuyini lezo?
• Xana hina wutsumbu hi khumbisiwa kuyini hi kuhambanyiswa ka vanhu loku ku mahekako?
• Zini lezi zi to maheka mahlweni ka kusangula ka siku ga Jehova? Hikwalaho, zini lezi hina wutsumbu hi faneleko ku ngha hi zi maha?
[Mifota ka phajina 180, 181]
Lokuloku, a masiku yo gumesa ma ta mbhela hi kulobyiswa ka mafambisela ya Satani