Nungungulu i na ni vito

XINI lexi a kutala ka zikhati u wutisako munhu loku u mu wona hi khati go sangula? — Hi zona, u mu wutisa vito gakwe. Hontlheni hi na ni mavito. Nungungulu i chulile a munhu wo sangula laha misaveni, lezaku hi Adamu. A sati wa Adamu ku wa hi Eva.

Hambulezo, a hi vanhu voce va nga ni mavito. Alakanyela zilo zinwani zi nga ni mavito. Hambu zihari lezi hi fuyako, zo kota mbyana ni ximanga, zonawu ha zi chula mavito, a hi zona? — Hakunene, a kuva ni vito za lisima nguvu.

Cuwuka tilweni ni wusiku, u ta wona tinyeleti to tala nguvu. U alakanya lezaku ti na ni mavito? — Ina, Nungungulu i chulile a nyeleti yinwe ni yinwani yi nga le tilweni. A Biblia gi hi byela lezi: “Wa hlaya a ntsengo wa tinyeleti, wa ti vitana hi mavito ya tona.” — Tisimu 147:4.

Himani a munhu wa lisima nguvu a nga kona wuakweni gontlhe? —  Ina, hi Nungungulu. Xana u alakanya lezaku i na ni vito? — Jesu i wulile lezaku i nago. Ka khati go kari, Jesu i te ngalo ka Nungungulu hi mukhongelo: ‘Nzi tivisile a vito ga wena ka vapizani va mina.’ (Johani 17:26) Wa gi tiva a vito ga Nungungulu? — Yena nwinyi Nungungulu wa hi byela a vito gakwe. I ngalo: “Nzi Jehova, hi gona vito ga mina lego.” Hikwalaho, a vito ga Nungungulu hi JEHOVA. — Isaya 42:8.

Xana u ti zwisa kuyini loku a vanwani va alakanya a vito ga wena? — Wa tsaka, a hi zona? — Jehova yenawu i lava lezaku a vanhu va tiva a vito gakwe. Hikwalaho, hi fanele ku tirisa vito Jehova a xikhati lexi hi wulawulako hi Nungungulu. Mugonzisi wa Hombe i tirisile a vito ga Nungungulu, Jehova, a xikhati lexi a nga wulawula ni vanhu. Ka khati go kari Jesu ite: “U ta ranza Jehova Nungungulu wa wena hi mbilu ya wena yontlhe.” — Marku 12:30, Tradução do Novo Mundo.

Jesu i wa zi tiva lezaku “Jehova” i vito ga lisima nguvu. Hikwalaho, i lo gonzisa a valanzeli vakwe a ku tirisa vito ga Nungungulu. I tlhelile a va gonzisa ku wulawula hi vito ga Nungungulu mikhongelweni yabye. Jesu i wa zi tiva a ku Nungungulu i lava lezaku a vanhu va tiva a vito Gakwe, Jehova.

Xikhatini xa kale, Nungungulu i kombile a lisima la vito gakwe ka Mosi, loyi a nga hi munwe wa vanana va ka Israeli. A vaIsraeli lavo va wa hanya ka tiko ga Gipite. A vanhu va tiko lego va wa tiviwa kota vaGipite. A vaIsraeli va lo mahiwa tikhumbi va tlhela va xanisiwa hi ndlela ya xapi, hi vaGipite. A xikhati lexi Mosi a nga kula, i lo zama ku vuna a muIsraeli-kulobye. A ximaho lexo xi lo zangarisa Faro a hosi ya Gipite. I wa lava ku daya Mosi! Hikwalaho, Mosi i lo tsutsuma le Gipite.

I loya ka tiko ginwani. Gi wa hi tiko ga Midiani. Ka tiko lego Mosi i lo chada zonake a sangula ku wundla ngango. I tirile kambe kota murisi wa tiyivu. Ka siku go kari Mosi na a khomekile hi ku hlayisa tiyivu takwe kusuhani ni xitsunga i lo wona nchumu wo hlamalisa. Ku wa hi ni nzilo wu nga kari wu vura xikari ka khuhu ga mizwa, kanilezi na gi ngaswi! Mosi i lo tshinela kasi ku zi wona khwatsi.

Wa zi tiva ku zini zi nga humelela? — Mosi i lozwa a gezu na gi vitana lomu ka khuhu lego. A gezu gi wa vitana giku: “Mosi, Mosi!” Himani a nga kari a vitana? — Ku wa hi Nungungulu! Nungungulu i wa hi ni ntiro wo tala kasi ku nyika Mosi. I te ngalo ka Mosi: “Nza ku ruma, famba ka Faro u ya humesa a vanhu va mina, a vanana va ka Israeli le Gipite.” Nungungulu i lo tsumbisa Mosi lezaku i ta mu vuna ku maha ntiro lowo.

Kanilezi Mosi i te ngalo ka Nungungulu: ‘Loku mina nzi famba ka vanana va ka Israeli nziya va byela ku ngalo, Nungungulu i nzi rumile. Vona va taku ka mina: “Himani vito gakwe?” Nzi ta kuyini?’ Nungungulu i byelile Mosi a ku famba a ya byela a va ka Israeli a ku: ‘Jehova i nzi rumele ka nwina.’ A tlhela a engeta aku: ‘Jehova i vito ga mina ga kala kupinzuka.’ (Eksodusi 3:1-15) Lezo zi komba lezaku Nungungulu i wa ta simama ku tirisa a vito Jehova. I wa nga ta tshuka a gi cica. Nungungulu i wa lava lezaku a simama a tiviwa ku hi Jehova, kala kupinzuka.

A xikhati lexi Mosi a nga tlhela le Gipite, a vaGipite va wa alakanya lezaku Jehova i Nungungulu wa vaIsraeli a nga vuniko nchumu. Va wa nga zi tivi lezaku i Nungungulu wa misava yontlhe. Hikwalaho, Jehova i te ngalo ka hosi ya Gipite: ‘Nzi ta tivisa vito ga mina misaveni yontlhe.’ (Eksodusi 9:16) Jehova i tivisile vito gakwe. Wa zi tiva a ku i zi mahisile kuyini? — 

I yimisile Mosi kasi ku rangela vaIsraeli lezaku va huma Gipite. A xikhati lexi va nga chikela Bimbini go Pswhuka, Jehova i lo vulula ndlela lomu xikari ka bimbi, va tsemakanya hi lomu ka misava yo woma. Kanilezi hi kulanzela, Faro ni masochwa yakwe va lo va lanza. Kala ka xikhati lexo, Jehova i wa yimisile mati ka matlhelo wontlhe ya mambiri. Laha Faro ni masochwa yakwe va nga nghenile, a mati ma lo wuya ma ta va daya vontlhe.

Ka xikhati xalexo, a vanhu misaveni yontlhe va lo sangula kuzwa lezi Jehova a nga mahile le Bimbini go Pswhuka. Hi zi tivisa kuyini a ku va zi zwile? — Loku ku hunzile xipimo xa 40 wa malembe, a vaIsraeli va loya tikweni ga Kanani, ku nga tiko legi Jehova a nga tsumbisile ku va nyika. A vavanuna vambiri va vaIsraeli va lo byeliwa lezi hi wasati wo kari wa ku hi Rahabi: ‘Hi zwile lezi Jehova a womisisileko zona a mati ya Bimbi go Pswhuka mahlweni ka nwina, a xikhati lexi mu nga huma hi le Gipite.’ — Joxua 2:10.

Inyamutlha, a vanhu vo tala va fana ni vaGipite lavo. A va kholwi lezaku Jehova i Nungungulu wa misava yontlhe. Hikwalaho, Jehova i lava lezaku a vanhu vakwe va wulawula hi yena ka vanwani. Hi zalezo Jesu a zi mahileko. A xikhati lexi a nga hi kusuhani ni kufa, i lo wula lezi ka Jehova hi mukhongelo: “Nzi va tivisile a vito ga wena.” — Johani 17:26.

Wa zi lava ku fana na Jesu? Loku u zi lava, byela vanwani lezaku a vito ga Nungungulu hi Jehova. U ta wona lezaku a vanhu vo tala a va zi tivi lezo. Kuzilava u nga va komba a vito legi lomu ka Biblia, ka bhuku ga Tisimu 83:18. A hi vulule zinwe a Biblia, hi lera a mutsalo lowu. Wu ngalo: “Kasi va fela ku tiva lezaku hi wena wece u nga ni vito ga Jehova, Loyi a Hunzeleleko Kutlakuka misaveni yontlhe.”

Hi gonza yini ka vesi legi? — Hi gonza lezaku Jehova i vito ga lisima a ku hunza wontlhe ma nga kona. I vito ga Nungungulu Nyamintamu, a Dadani wa Jesu, Loyi a mahileko zilo zontlhe. Niku alakanya lezaku Jesu i te hi fanele ku ranza Jehova Nungungulu hi mbilu ya hina yontlhe. Wa mu ranza Jehova ke? — 

Hi nga zi kombisa kuyini lezaku ha mu ranza Jehova? — A yinwe ya tindlela ku mu tiva khwatsi hi tlhela hi mu maha Munghana wa hina. A ndlela yinwani ku byela vanwani a vito ga Nungungulu. Hi nga va komba hi ku kongoma lomu ka Biblia lezaku a vito gakwe hi Jehova. Hi nga tlhela hi va byela a zilo zo hlamalisa lezi Nungungulu a zi vangileko ni zilo zo saseka lezi a zi mahako. Lezo za mu tsakisa nguvu Jehova hakuva i lava lezaku a vanhu va mu tiva. Hinawu hi nga vuna vanhu lezaku va tiva Jehova, a hi zona? — 

Kanilezi a hi vontlhe va to tsakela ku zizwa loku hi wulawula hi Jehova. Hambu Jesu, Mugonzisi wa Hombe, a vanhu vo tala a va zi tsakelangi ku muzwa a xikhati lexi a nga wulawula hi Nungungulu. Kanilezi, lezo a zi mu tsikisangi ku wulawula hi Jehova.

Makunu hinawu hi fanele ku pimanyisa Jesu. Hi fanele ku simama ku wulawula hi Jehova. Loku hi maha lezo, Jehova i ta hi tsakela hakuva hi ta komba lezaku ha gi ranza a vito gakwe.