Hi fanele ku ala ziringo

I KONA a tshukileko a ku kombela ku maha zilo u zi tivako ku zi bihile? — I ku kurumetile ku zi maha? Kutani i wulile lezaku zilo zo tsakisa niku a zi bihangi? — Loku a munhu a maha lezo, o hi ringa.

Zini hi faneleko ku maha loku hi ringiwa? Hi fanele ku vumela ku maha zilo zo biha? — Lezo zi wa nga ta mu tsakisa Jehova Nungungulu. Kanilezi, wa zi tiva ku himani a nga wa ta tsaka? — Hi zona, hi Satani Diabolusi.

Satani i nala wa Nungungulu ni nala wa hina kambe. A hi nge zi koti ku mu wona hakuva i moya. Kanilezi yena wa hi wona. Ka siku go kari Diabolusi i lo wulawula na Jesu, Mugonzisi wa Hombe, na a zama ku mu ringa. A hi wone lezi Jesu a nga maha kasi hi tiva lezi hi faneleko ku mahawu loku hi ringiwa.

Xontlhe xikhati Jesu i wa lava ku maha kuranza ka Nungungulu. I zi kombisile laha kubaseni a xikhati lexi a nga bapatizwa lomu Congweni wa Jordani. Satani i zamile ku ringa Jesu zalezo a nga huma hi lomu ka ku bapatizwa. A Biblia gi wula lezaku “a tilo gi lo vululeka” mahlweni kakwe. (Mateu 3:16) Kuzilava lezo zi wula ku Jesu i lo sangula ku alakanya a xikhati lexi a nga kari a hanya na Nungungulu le tilweni.

Anzhako ka kuva Jesu a bapatizilwe i loya xiwuleni kasi ku ya tshama a ehleketa hi zilo zo tala lezi a nga sangula ku zi alakanya. I lo mbheta a 40 wa masiku ni 40 wa wusiku na a hi kwaseyo. Ka xikhati xontlhe lexo Jesu i wa ngagi nchumu, hikwalaho i wazwa nguvu ndlala. Kuve ka xikhati lexo Satani a nga zama ku mu ringa.

Diabolusi ite: ‘Loku wena u hi N’wana wa Nungungulu, laya a maribye lawa lezaku ma maha tipawa.’ Lezi Jesu a ngazwa ndlala, hi nga alakanyela lezi yi nga wa ta nanzihisa zona a pawa! Hambulezo, xana Jesu na a zi kotile ku cica maribye ma maha tipawa futsi? — Ina, na a zi kotile. Hikuyini? Hakuva Jesu, a N’wana wa Nungungulu, i wa hi ni ntamu wo hlawuleka.

Loku Diabolusi i wa lo byela wena lezaku u cica ribye gi maha pawa, na u vumele? — Jesu i wazwa ndlala. Zi wa tava zi bihile loku i wa no vumela? — Jesu i wa zi tiva lezaku zi wa bihile a ku tirisa ntamu wakwe hi ndlela leyo. Jehova i wa mu nyikile a ntamu lowo kasi ku vuna vanhu lezaku va tiva Nungungulu, na ku nga hi ku maha zilo zi vunako yena.

Hikwalaho, wutshanwini ga ku vumela, Jesu i lo byela Satani lezi zi tsalilweko lomu ka Biblia. I te ngalo: ‘A munhu a nga ta hanya hi pawa yoce, kanilezi hi timhaka tontlhelele leti ti humako nonwini wa Nungungulu.’ Jesu i wa zi tiva lezaku a ku tsakisa Jehova zi wa hi za lisima nguvu a ku hunza ku kuma zakuga.

Kanilezi Diabolusi i lo mu ringa kambe. I lo yisa Jesu le Jerusalema a mu yimisa ka wutshamu ga ku tlakuka nguvu ga tempeli. Satani a gumesa aku: ‘Loku wena u hi N’wana wa Nungungulu, ti tsikelete laha, hakuva ku tsalilwe ku ngalo: I ta ruma tingelosi takwe lezaku ti ta ku vikela kasi u nga ti bayisi.’

Hikuyini Satani a wulileko lezo? — I wulile lezo kasi ku ringa Jesu lezaku a maha zilo zo fayela. Kanilezi, Jesu a nga vumelangi kambe. Jesu i lo hlamula Satani aku: “Ku tsalilwe ku ngalo: U nga ringi Hosi Nungungulu wa wena.” Jesu i wa zi tiva lezaku zi bihile a ku ringa Jehova hi ku veka wutomi gakwe mhangweni ha womu.

Hambulezo, Satani a nga nyimangi a ku ringa Jesu. I lo teka Jesu a mu yisa ka xitsunga xo leha nguvu. I lo ya mu komba a mifumo yontlhe ya misava ni titshomba ta yona. Zonake Satani a byela Jesu aku: “Nzi ta ku nyika zontlhe lezi zilo, loku uwa lahasi u nzi khozela.”

Hi nga alakanyela lezi Diabolusi a nga kari a nyika Jesu! Xana a mifumo yontlhe ya vanhu leyi yi nga kona, yi lumba Satani hakunene? — Jesu a nga kanetangi lezaku yi wa hi ya Satani. Loku yi wa nga hi yakwe na a mu kanetile. Hi lisine, Satani hi yena hosi ya matiko wontlhe ma nga laha misaveni. A Biblia gi mu vitana ku i ‘hosana ya tiko legi.’ — Johani 12:31.

U wa ta maha yini loku Satani i wo ku tsumbisa ku ku nyika nchumu loku u mu khozela? — Jesu i wa zi tiva lezaku zi wa tava zi bihile a ku khozela Diabolusi, hambu loku i wo nyikwa nchumu wo kota kwihi. Hikwalaho, Jesu ite: ‘Suka Satani; hakuva a Biblia gi ngalo: U ta khozela Jehova Nungungulu wa wena, hi yena yece u to mu tirela.’ — Mateu 4:1-10; Luka 4:1-13.

Hinawu ha ringiwa. U nga wula a ziringo zo kari? — Wona a xikombiso xinwe. A mamani wa wena a nga ha maha mikati kutani xikhaba xo nanziha nguvu kasi kunwa hi zona caya kutani kuga hi xikhati xinwani. A nga ha ku byela lezaku u ngagi kala ku chikela a xikhati xa kona. Kanilezi na uzwa ndlala, u nga ha ringiwa kuga. Xana u ta mu ingisa mamani? — Satani i lava lezaku u nga mu ingisi a mamani wa wena.

Alakanya Jesu. Yenawu i wa yizwa nguvu ndlala. Kanilezi, i wa zi tiva lezaku a ku tsakisa Nungungulu zi wa hi za lisima ku hunza kuga. Loku u maha lezi a mamani wa wena a ku byelako, u komba lezaku u fana na Jesu.

A vanana vanwani va nga ha ku kucetela a kunwa a makinino yo kari. Va nga ha ku byela lezaku u ta tizwa na u tsakile nguvu loku unwa. Kanilezi, za koteka ku a makinino lawo ma hi zilo za ku loku unwa u popiwa. Ma nga ku babyisa hambu ku ku daya futsi. A munhu munwani a nga ha ku nyika sigari, zonake a ku kurumeta ku dzaha. U ta maha yini? —

Alakanya Jesu. Satani i zamile ku maha Jesu lezaku a hlakana hi wutomi gakwe hi ku tlula hi le hehla ka tempeli. Kanilezi Jesu a nga vumelangi. U ta maha yini loku a wokari a ku kucetela ku maha zilo zi nga vangako mhango? — Jesu a nga mu ingisangi Satani. Wenawu u nga tsiki munhu a ku kucetela ku maha zilo za kubiha.

A munhu wo kari a nga ha ku byela lezaku u yimbelela a Hino nacional kutani lezaku uva kona ka ximaho xo kari xa ku alakanya a masiku yo kari laha xikoleni. U nga ha byeliwa lezaku u ta hlongoliwa laha xikoleni loku u nga vumeli. U ta maha yini? — Loku u vumela ku maha lezo zi ta fana ni ku khozela a nchumu wo kari. Kanilezi, a Biblia gi hi byela lezaku hi fanele ku khozela Jehova basi. (Eksodusi 20:4, 5)

A zi karati a ku maha za zi nene loku lava hi nga navo va mahawu za zi nene. Kanilezi, zi nga karata ku maha za zi nene loku a vanwani va hi kucetela ku maha za kubiha. Va nga ha wula lezaku lezi va zi mahako a zi bihangi nguvu. Kanilezi, hi fanele ku ti wutisa lezi: Nungungulu i zi wonisa kuyini a zilo lezi? A mawonela yakwe hi wona ma nga ma nene.

Hikwalaho, a hi faneli ku tshuka hi maha zilo lezi Nungungulu a wulako lezaku zi bihile, hambu loku a vanwani vaku zi nene. Loku hi maha lezo, xontlhe xikhati hi ta tsakisa Nungungulu, niku hi nga ta tshuka hi tsakisa Diabolusi.