Lava va nga maha vapizani va Jesu

HIMANI nanza ga Nungungulu ga gi nene nguvu ku hunza wontlhe ma vileko kona? — Hi zona, hi Jesu Kristu. U alakanya lezaku hi nga zi kota ku fana naye? — A Biblia gi wula lezaku i hi vekele xikombiso kasi hi xi lanzela. Niku wa hi ramba lezaku hi maha vapizani vakwe.

Wa zi tiva ku zi wula yini ku maha mupizani wa Jesu? — Zi wula zilo zo tala. Xo sangula: Hi fanele ku gonza ka yena. Kanilezi a hi zona zoce. Hi fanele ku tlhela hi kholwa lezi a zi wulako. Niku loku hi kholwa hi ta maha lezi a hi byelako.

A vanhu vo tala va wula lezaku va kholwa ka Jesu. Kanilezi, u alakanya lezaku vontlhe a vanhu lavo vapizani va Jesu? — Ahihi, a votala xikari kabye a hi vapizani vakwe. Kuzilava a vanwani vaya chechini. Hambulezo, a kutala ka vona a va ti nyiki xikhati xa ku gonza lezi Jesu a zi gonzisileko. Hi lisine, ntsena lava va lanzelako xikombiso xa Jesu hi vona va nga vapizani vakwe.

A hi wulawule kutsongwani hi lava va mahileko vapizani va Jesu, a xikhati lexi a nga hanya kota munhu wa nyama laha misaveni. Filipu munwe wa vapizani vo sangula va Jesu. Filipu i lo ya kuma munghana wakwe Nataneli (a tiviwako kambe ku hi Bartolomeu), yaloyi u mu wonako na a tshamile lahasi ka sinya. A xikhati lexi Nataneli a ngata ka Jesu, Jesu i te ngalo: ‘Cuwukani, a muIsraeli wa lisine, loyi a nga hiko na kuxengetela.’ Nataneli i lo hlamala aku: “U nzi tivisa kuyini?”

Jesu i lo engeta aku: ‘Hi mahlweni na Filipu a nga se ku vitana, nzi ku wonile na u hi lahasi ka nkuwu.’ Nataneli i lo hlamala nguvu hi lezi Jesu a nga kari a ku tiva khwatsi lomu a nga hi kona, hikwalaho i lo wula lezi: “Wena u N’wana wa Nungungulu, u Hosi ya vaIsraeli.” — Johani 1:49.

A vanwani va rangile hi siku ginwe va maha vapizani va Jesu, Filipu na Nataneli va nga se maha. A vapizani lavo hi Andreu ni makabye wakwe Pedro zinwe na Johani niku kuzilava na Jakobe, a makabye wa Johani. (Johani 1:35-51) Hambulezo, hi nzhako ka xikhati, a vapizani lavo va mune va lo tlhelela ntirweni wabye wa ku kukuta. Zonake ka siku go kari, Jesu na a famba hi lomu mbhirini ya Bimbi ga Galilea, i lo wona Pedro na Andreu na va hoxela tikoka tabye lomu bimbini. Jesu i lo va vitana aku: “Nzi lanzeleni.”

Anzhako ka kuva a fambile ku tsongwani, Jesu i lo wona Jakobe na Johani. Va wa hi lomu ka ngalava ni papai wabye, na va lungisa a tikoka tabye. Jesu i lo va vitanawu lezaku va mu lanzela. Na u mahile yini loku Jesu i wa no vitana wena? Xana na u fambile naye? — A vavanuna lava va wa mu tiva ku Jesu himani. Va wa zi tiva lezaku i rumelwe hi Nungungulu. Hikwalaho, va lo tekela ku tsika a bhinzu gabye ga ku kukuta va lanzela Jesu. — Mateu 4:18-22.

Xana anzhako ka kuva a vavanuna lava va mahile vapizani va Jesu zi wula lezaku a va ha mahangi zihoxo? — Ahihi, va mahile. Kuzilava wa ha zi alakanya lezaku a vavanuna lava va tshukile va kanetisana xungetano hi ku himani a nga hi wa hombe xikari kabye. Kanilezi, va lo ingisa Jesu, niku va wa ti yimisele ku cica mawonela yabye. Loku hi ti yimisela ku cica, hinawu hi nga maha vapizani va Jesu.

Jesu i ramba vanhu va tixaka tontlhe lezaku va maha vapizani vakwe. Ka khati go kari, ku lota a hosi ya jaha yo ganya ka Jesu, zonake yi mu wutisa a ku yi nga maha yini kasi yi kuma wutomi ga pinzukelwa ke. A xikhati lexi a hosi leyo yi nga wula lezaku yi wa hlayisa a milayo ya Nungungulu kusukela wunwananeni ga yona, Jesu i lo yi ramba aku: ‘Ngone u nzi lanzela.’ Wa zi tiva lezi zi nga humelela? —

A xikhati lexi a wanuna loye a nga tiva lezaku a ku maha mupizani wa Jesu zi fanele kuva za lisima ku hunza ku ganya, a zi mu tsakisangi. A nga mahangi mupizani wa Jesu hakuva i wa ranza nguvu mali ku hunza ku ranza Nungungulu. — Luka 18:18-25.

Anzhako ka kuva Jesu a xumayele hi xipimo xa lembe ni khihlanya, i lo hlawula 12 wa vapizani lezaku va maha vapostoli. A vapostoli va wa hi vavanuna a nga va rumile ku maha mitiro yo hlawuleka. Wa ma tiva a mavito yabye? — A hi zame ku ma tiva. Cuwuka mifota ni mavito yabye. Zonake u zama ku ma wula hi hloko.

Hi kugumesa, a munwe wa vapostoli lava va 12 i lo maha wo biha. Hi Judasi Iskarioti. Hi nzhako ka xikhati, ku lo hlawuliwa a mupizani munwani kasi a maha mupostoli. Wa gi tiva a vito gakwe? — Hi Matiasi. Hi ku famba ka xikhati, Paule na Barnabasi vonawu va lo maha vapostoli, kanilezi va wa nga mahi xipanze xa lava va 12. — Mitiro 1:23-26; 14:14.

Kota lezi hi gonzileko ka xipimo 1 xa bhuku legi, Jesu i wa khatala hi vanana. Hikuyini a nga khatala hi vona? — Hakuva i wa zi tiva lezaku vonawu va wa ta maha vapizani vakwe. Hi lisine, a vanana va tolovela ku wula zilo zaku zi nga khumba a munhu wa hombe laha ka kuza a lava ku ingisela, a tlhela a lava ku tiva zilo zo tala xungetano hi Mugonzisi wa Hombe.

A vavasati vo tala vonawu va lo maha vapizani va Jesu. A vokari va wa enza naye a xikhati lexi a nga kari aya ka madoropa manwani kasi ku ya xumayela. Maria wa le Magdala, Johana, na Susana vonawu va wa enza naye. Kuzilava va wa tira ku mu bhikela ni ku hlaza tinguwo takwe. — Luka 8:1-3.

Wa zi lava ku maha mupizani wa Jesu? — Alakanya kambe lezaku, a ku wula ntsena ku hi vapizani vakwe a zi eneli. A hi faneli ku ti kombisa kota vapizani va Jesu mitlhanganweni ya wuKristu ntsena, kanilezi hi fanele ku maha vapizani vakwe kontlhe lomu hi nga kona. Wa alakanya matshamu yo kari lawa zi nga za lisima a kuva hi ti kombisa lezaku hi vapizani va Jesu? —

Hi zona, hi nga zi komba laha kaya. Kanilezi, ku na ni kunwani u nga mahako lezo — hi le xikoleni. Mina na wena a hi faneli ku rivala lezaku kasi hiva vapizani va lisine va Jesu, hi fanele ku maha lezi a zi mahileko, nzeni ka siku gontlhe, siku ni siku, ni ka gihi wutshamu hi nga ka gona.