Hikuyini hi faneleko ku tsetselela vanwani?

I KONA a tshukileko a ku mahela zilo za kubiha? — Xana i ku bayisile kutani ku ku byela zilo zi nga kala ku ku tsakisa? — Xana u fanele ku mu mahela lezi a ku maheleko? —

A vanhu vo tala loku a wokari a va bayisa kutani ku va zangarisa va tolovela ku phota. Kanilezi, Jesu i gonzisile lezaku hi fanele ku tsetselela lava va hi gohelako. (Mateu 6:12) Ahati loku a munhu loye a hi gohela makhati yo tala ke? Makhati mangani hi faneleko ku mu tsetselela? —

Hi zalezo Pedro a nga lava ku zi tiva. Hikwalaho, ka siku go kari i lo wutisa Jesu aku: ‘Nzi fanele ku mu tsetselela kala ntlhanu wa makhati ni mambiri ke?’ A ntlhanu wa makhati ni mambiri ma tsongwani. Jesu i lo mu byela lezi: Loku a munhu a ku gohela ‘u fanele ku mu tsetselela 77 wa makhati.’

A makhati lawo ma tele nguvu! Hi wa nga ta zi kota ku alakanya a makhati lawo yo tala, lawa a munhu a hi maheleko zilo zo biha, a hi zona? Niku Jesu i wa lava ku hi byela lezi: A hi faneli ku zama ku alakanya a makhati lawa a vanwani va hi gohelako. Loku va kombela ku tsetselelwa, hi fanele ku va tsetselela.

Jesu i wa lava ku komba vapizani vakwe a lisima la ku tsetselela. Hikwalaho, anzhako ka ku hlamula xiwutiso xa Pedro, i lo hlawutela mufananiso wo kari ka vapizani vakwe. Wa zi lava ku wuzwa? —

Ka xikhati xo kari, ku wa hi ni hosi ya yi nene. A hosi leyo yi wa hi yi nene nguvu. Yi wa lombisa mali ka malanza ya yona loku ma lava ku vuniwa. Kanilezi, ku lo chikela siku legi a hosi yi nga lava lezaku a malanza ya yona ma tlhelisa mali leyi ma nga pembile. Ku lo nehiwa a nanza gi nga deva a 60 wa timiliyoni ta zingerengere za mali. A mali leyo yi wa tele nguvu!

Kanilezi, a nanza lego gi wa tirisile mali yontlhe ya hosi, niku gi wa nga ta zi kota ku hakhela. Hikwalaho, a hosi yi lo laya lezaku a nanza lego gi xavisiwa. A hosi yi lo tlhela yi laya lezaku ku xaviswa sati wa nanza lego, vana va gona, ni zontlhe gi nga hi nazo. Zonake, a hosi yi wa ta hakhelwa hi mali leyo yi nga wa ta kumiwa. U alakanya lezaku a nanza lego gi ti zwisile kuyini? —

Gi lo khizamela hosi leyo gi kombela giku: ‘Nzi nyike xikhati, nzi ta riha zontlhe lezi nzi ku devako.’ Loku ku wa hi wena hosi leyo, na u gi mahile yini a nanza lego? — A hosi yi lo gi zwela wusiwana a nanza ga yona. Hikwalaho, yi lo gi tsetselela. Yi lo byela a nanza lego lezaku gi wa nga ha faneli ku riha mali leyo, ne xingerengere xinwe xa mali leyo ya 60 wa timiliyoni. Handle ko kanakana a nanza lego gi tsakile nguvu!

Kanilezi, zini lezi a nanza lego gi nga gumesa gi zi maha? Gi lo ya kumana ni nanza ginwani, legi gi nga kari gi mu deva a 100 wa zingerengere za mali ntsena. Gi lo tlimba a nanza lego giku: ‘Nzi tlhelisele mali ya mina ya 100 wa zingerengere leyi u nzi devako!’ U mu wonisa kuyini a munhu wa ku maha zo fana ni lezo, nguvunguvu anzhako ka kuva a tsetselelwe a nanzu wa hombe hi hosi? —

A nanza legi gi nga deva a 100 wa zingerengere za mali gi wa hi xisiwana. Gi wa nga ta zi kota ku hakhela a mali leyo hi ku hatlisa. Hikwalaho, gi lo khizama mikonzweni ya nanza-kulobye gi mu kombela giku: ‘Nzi mahele wuxinji, u nzi nyika xikhati, nzi ta ku riha zontlhe nzi ku devako.’ Xana a wununa loye i gi nyikile a xikhati a nanza lego? — Loku ku wa hi wena na u mahile yini —

A wanuna loyi i wa nga fani ni hosi, leyi yi nga mu mahele wunene. I wa lava mali yakwe hi xihatla. Kota lezi a nanza lego gi nga tsanzeka ku hakhela, i lo gi valela paxweni. A malanza lawa manwani ma lo wona zontlhe lezi zi nga mahekile, niku a zi ma tsakisangi. Ma lo gi zwela wusiwana a nanza lego gi nga valelwe paxweni. Hikwalaho, ma lo ya byela hosi lezi zi nga mahekile.

Yonawu hosi a yi zi tsakelangi lezi zi nga mahekile. Yi lo gi zangarela nguvu a nanza lego gi nga kala ku tsetselela munghana. Hikwalaho, i lo gi vitana aku ngalo ka gona: ‘Nanza go biha, nzi ku tsetselele nanzu wa wena wontlhe. Xana u wa nga fanelangi ku tsetselela a nanza-kuloni?’

A nanza legi gi nga kala ku tsetselela munghana gi wa fanele ku gonza xo kari ka hosi ya yi nene. Kanilezi a gi gonzangi nchumu. Hikwalaho, a hosi yi lo nghenisa a nanza lego paxweni kala gi hakhela a 60 wa timiliyoni ta zingerengere za mali leyo. Niku hi lisine, gi wa nga ta zi kota ku kuma mali yo hakhela hosi na gi hi lomu paxweni. Hikwalaho, gi wa ta tshama paxweni kala gifa.

A xikhati lexi Jesu a nga gumesa a mufananiso lowu, i lo byela vapizani vakwe aku: ‘A Dadani wa mina wa le tilweni i ta mu maha zalezo, loku a munwe ni munwani wa nwina a nga tsetseleli a makabye wakwe hi mbilu yontlhe.’ — Mateu 18:21-35.

Hontlheni ha mu deva nguvu Nungungulu. Hi lisine, a wutomi ga hina gita hi ka Nungungulu! Hikwalaho, loku hi fananisa lezi hina hi devako Nungungulu, lezi a vanwani va hi devako zi tsongwani. Hi nga zi fananisa ni 100 wa zingerengere za mali leyi a nanza legiyani gi nga deva le’ginwani. Kanilezi, lezi hi devako Nungungulu hi kota ya zilo zo biha lezi hi zi mahako zi fana ni 60 wa timiliyoni ta zingerengere za mali, leyi a nanza legiyani gi nga deva hosi.

Nungungulu mu nene nguvu. Hambu lezi hi mahako zilo zo biha, wa hi tsetselela. A nga hi rihisi a zionho za hina hi ku hi lovisa. Kanilezi, hi fanele ku alakanya a xigonzo lexi xi lanzelako: Nungungulu i hi tsetselela ntsena loku hi tsetselela lava va hi gohelako. Lexo xigonzo xa lisima kasi ku ehleketa hi xona, a hi zona? —

Makunu, loku a wokari a ku mahela zilo za kubiha kanilezi a gumesa a kombela ku tsetselelwa, zini u faneleko ku maha? U ta mu tsetselela? — Ahati loku a ku gohela makhati yo tala ke? U ta simama ku mu tsetselela? —

Loku ku wa hi hina hi kombelako ku tsetselelwa, hi wa nga ta lava lezaku a munwani a hi tsetselela? — Hikwalaho, hinawu hi fanele ku mu tsetselela. A hi faneli ku wula ntsena lezaku hi mu tsetselele; kanilezi hi fanele ku mu tsetselela futsi, na zi sukela mbilwini. Loku hi maha lezo, hi komba lezaku hi lava ku maha valanzeli va Mugonzisi wa Hombe.