Xigonzo xi hi vunako ku kombisa wunene

WA XI tiva ku xini a xihlawulela? — A xihlawulela hi loku a munhu a venga munwani ntsena hi kota ya lezi a nga ni hlonge yo hambana ni ya yena kutani a wulawulako lirimi linwani. Hikwalaho, a kuva ni xihlawulela ku venga munhu kutani kuva ni mawonela ya hava hi yena hi ku kala u nga se mu tiva khwatsi.

U alakanya lezaku zi nene a ku venga munhu hi ku kala u nga se mu tiva khwatsi kutani ntsena hi kota ya lezi mu hambeneko? — Ahihi, a zi lulamangi niku a hi zi nene a kuva ni xihlawulela. A hi faneli ku nga kombisi wunene ka munhu ntsena hi kota ya lezi kuzilava a hambeneko na hina.

Ehleketa hi lezi. Wa tiva a munhu wo kari a nga ni hlonge yo hambana ni ya wena kutani a wulawulako lirimi lo hambana ni la wena? — Kuzilava wa tiva a munhu wo kari a nga ni matshamela yo hambana ni vanwani hi kota ya lezi a nga bayisiwa kutani hi kota ya mababyi. Wa va ranza u tlhela u va kombisa wunene a vanhu lavo va hambeneko na wena? —

Loku hi ingisa Mugonzisi wa Hombe, Jesu Kristu, hi ta kombisa wunene ka vanhu vontlhe. A hi faneli ku venga munhu hi kota ya tiko legi a tako hi ka gona kutani hi kota ya hlonge yakwe. Hi fanele ku kombisa wunene ka munhu loye. Hambu lezi a vanhu vo tala va kalako va nga zi wonisi lezo, hi zalezo Jesu a nga gonzisa. A hi wulawule hi zilo lezo.

A muJuda wo kari a nga hi ni xihlawulela i lota ka Jesu a ta mu wutisa lezi: ‘Zini nzi faneleko ku maha, kasi nzi hanya kala kupinzuka ke?’ Jesu i wa zi tiva lezaku a wanuna loye kuzilava i wo zama ku mu maha a wula lezaku hi fanele ku kombisa wunene ntsena ka vanhu va hlonge yo fana ni ya hina kutani va tiko ga hina. Hikwalaho, wutshanwini ga ku hlamula xiwutiso lexo, Jesu i lo mu wutisa aku: ‘A Nayo wa Nungungulu wu ngalo hi fanele ku maha yini?’

A wanuna loye i lo hlamula lezi: ‘U ta ranza Jehova Nungungulu wa wena hi mbilu ya wena yontlhe, ni ku ranza muakelane wa wena kukotisa lezi u ti ranzisako zona.’ Jesu aku kakwe: ‘U hlamulile khwatsi; maha zezo, u ta kuma wutomi ga pinzukelwa.’

Hambulezo, a wanuna loye i wa nga zi lavi ku kombisa wunene kutani ku ranza vanhu va hambeneko naye. Hikwalaho, i lo zama ku ti yimelela. I lo wutisa Jesu aku: ‘Himani muakelane wa mina ke?’ Kuzilava i wa lava lezaku Jesu aku: “A muakelane wa wena vanghana va wena,” kutani aku, “vanhu va fanako na wena.” Kasi ku hlamula xiwutiso xakwe, Jesu i lo hlawutela mufananiso wa muJuda ni muSamaria. A mufananiso wa kona hi lowu:

A wanuna wo kari i wa kari a relela hi ndlela yi sukelako Jerusalema yiya Jeriko. A wanuna loye i wa hi muJuda. Laha a nga kari a famba, i lo tlhangana ni zigevenga. Zi lo mu wisa lahasi zi mu tekela mali yakwe ni tinguwo takwe. Zi muba zi mu tsika laha ndleleni na a hi kusuhani ni kufa.

Anzhako ka xikhatanyana, ku lota mupristi hi ndlela yaleyo. I lo wona a wanuna loye a nga bayisilwe nguvu. Loku ku wa hi wena na u mahile yini? — A mupristi loye i lo mu potsa. Ne a nga nyimangi. A nga mahangi nchumu kasi ku vuna a wanuna loye.

Hi kulanzela, ku lota wanuna munwani a nga hi mukhongeli wa hombe hi ndlela yaleyo. I wa hi muLevi a nga tira tempeleni le Jerusalema. Xana i nyimile a mu vuna? — Ahihi. I mahile zalezi a mupristi a mahileko.

Hi kugumesa, ku lota muSamaria. Wa mu wona gaya a tako laha ka djikwa? — A muSamaria loyi, i lo wona muJuda loye na a wile, na a bayisilwe nguvu. A vaSamaria ni vaJuda va wa nga zwanani. (Johani 4:9) Xana a muSamaria loyi i wa ta hunza wanuna loye na a nga mu vunangi? Xana i wa ta ti byela lezi: ‘Nzi ta mu vunela yini a muJuda loyi? Loku ku wa hi mina nzi nga bayisiwa, i wa ta nzi vuna?’

A muSamaria i lo wona a wanuna loye a nga wile laha tlhelweni ga ndlela, zonake a mu zwela wusiwana. I wonile lezaku zi wa nga tava zi nene a ku mu tsika laho a sala afa. Hikwalaho, i lo chika laha ka mbongola yakwe aya ka wanuna loye, a sangula ku mu hlaza zilonza zakwe, zonake a zi chela mafura ni vinya. Lezo zi wa ta maha lezaku zi hatlisa ku hola. I lo gumesa a zi bohelela hi nguwo.

A muSamaria i lo tlakula wanuna loye hi khwatsanyana, a mu khileta laha ka mbongola yakwe. Zonake i lo famba hi kutsongwani-kutsongwani hi ruwa kala a kuma a yindlu ya ku amukela vapfhumba, kutani ka hotela ya yi tsongwani. A muSamaria loye i lo kuma wutshamu ga gi nene ga ku veka wanuna loye kasi a mu khatalela.

Hi kugumesa, Jesu i lo wutisa wanuna loyi a nga bhula naye aku: ‘Xana u alakanya lezaku hi wihi wa lava va vanharu a nga maha muakelane wa mu nene?’ Loku ku wa hi wena, na u hlamulile yini? Kuve Mupristi, muLevi, kutani kuve muSamaria? —

A wanuna loye i lo hlamula aku: ‘A wanuna loyi a nga nyima a khatalela munhu loyi a nga bayisilwe hi yena a mahileko muakelane wa mu nene.’ Jesu aku kakwe: ‘U hlamulile khwatsi. Famba u ya mahawu zalezo.’ — Luka 10:25-37.

Mufananiso wa wu nene, a hi zona? Wu hi vuna ku tiva lava va nga vaakelane va hina. A hi vanghana va hina ntsena. Niku a hi lava va nga ni hlonge yo fana ni leyi ya hina ntsena kutani lava va wulawulako lirimi la hina. Jesu i hi gonzisile ku kombisa wunene ka vanhu vontlhe na zi ngayi hi tiko va tako hi ka gona, hlonge yabye kutani lirimi va wulawulako.

Hi zalezo Jehova Nungungulu a tshamisileko zona. A nga na xihlawulela. Jesu i te ngalo: ‘A Papai wa nwina loyi a nga le tilweni wa tsuwukisa gambo gakwe hehla ka va kubiha ni ka vanhu va va nene, a nisa vula hehla ka valulamileko ni ka va nga lulamangiko.’ Hikwalaho, hi fanele ku kombisa wunene ka vanhu vontlhe, a ku fana na Nungungulu. — Mateu 5:44-48.

Makunu loku u wona a munhu wo kari na a ti bayisile, u ta kuyini? — Ahati loku a munhu loye a hi wa tiko ginwani kutani a hi wa hlonge yo hambana ni ya wena? Muakelane wa wena, niku u fanele ku mu vuna. Loku u nga zi koti ku mu vuna hi kota ya lezi u nga nwanana, vitana munhu wa hombe a ta ku vuna. Kutani ku kombela ku vuniwa hi maphoyisa hambu mugonzisi wa xikola. Lezo ku kombisa wunene, a ku fana ni wanuna wa muSamaria.

Mugonzisi wa Hombe i lava lezaku hi kombisa wunene. I lava lezaku hi vuna vanwani na ku ngayi hi ku hi vamani a vanhu lavo. Hi zalezo zi nga mu maha a hlawutela mufananiso wa muSamaria wa mu nene.