Hikuyini hi nga faneliko ku hemba?

ALAKANYA ku a nhanyana wo kari i byelile a mamani wakwe aku: “Ina mama, loku hi huma le xikoleni nzi ta tekela ku wuya.” Kanilezi, a gumesa a tshama a hlakana ni vanghana vakwe zonake a ta byela mamani wakwe aku: “A xikhati lexi hi nga huma mugonzisi i lo nzi byela lezaku nzi fanele ku sala.” Zi wa tava zi nene a ku wula zilo zo khwatsi hi lezo? —

Alakanyela a ku a mufanyana wo kari i byela a papai wakwe aku: “Ahihi, a hi mina nzi nga bela bhola lomu ndlwini.” Kanilezi, ahati loku ku hi lezaku hakunene i belile ke? Xana zi wa tava zi bihile ku wula ku a nga belangi? —

Mugonzisi wa Hombe i hi kombile a nchumu wa wu nene lezaku hi wu maha. I te ngalo: “Kuwulawuleni ka nwina, loku muku, Ina, a kuve ina; a Ahihi ava ahihi; kani hi xihi xa ku hunza lezi xita hi ka loyi wa kubiha.” (Mateu 5:37) I wa lava ku wula yini Jesu hi magezu lawa? — I wa lava ku wula lezaku hi fanele ku maha lezi hi zi wulako.

Ku na ni matimu yo kari lomu ka Biblia lawa ma kombako a lisima la ku wulawula lisine. Ma wulawula hi vanhu vambiri va nga kari va ti wula lezaku vapizani va Jesu. A hi wone lezi zi humeleleko.

Na ku nga se hunza tihweti timbiri Jesu na a file, a vanhu vo tala va ngata hi ka matshamu ya le kule, va lota Jerusalema ka mubuzo wa lisima wa vaJuda wu nga vitaniwa ku i Pentekosta. Mupostoli Pedro i lo veka kanelo yo tsakisa nguvu yi nga wulawula hi Jesu, loyi Jehova a nga mu vuxile hi ka vafileko. A kutala ka vanhu lavo va nga hi le Jerusalema, gi wa hi khati go sangula a kuzwa zokari xungetano hi Jesu. Hikwalaho, va wa lava ku tiva zotala. Makunu zini va nga maha?

Va lo tshama xikhati xo hunza lexi va nga xi alakanya. Kanilezi hi kufamba ka xikhati, a vokari va lo mbheta mali yabye zonake va lava ku vuniwa hi mali ya ku xava zakuga. A vapizani va le Jerusalema va wa lava ku vuna vapfhumba lavo. Hikwalaho, a kutala kabye va lo xavisa zilo zo kari va nga hi nazo zonake va nyikela a mali ya kona ka vapostoli va Jesu. A vapostoli va lo gumesa va nyikela a mali leyo ka lava va nga hi ni xilaveko.

Ananiasi ni sati wakwe Safira, lava va nga lumba a bandla ga wuKristu le Jerusalema, va lo xavisa a simu gabye. I hava a nga va byelile lezaku va gi xavisa. Va lo zi lava ha voce. Kanilezi, lezo a va zi mahangi hi ku ranza a vapizani vaswa va Jesu. Hi lisine, Ananiasi na Safira va wa lava lezaku a vanhu va alakanya a ku vona va wa hi va nene a ku hunza lezi va nga hi zona. Hikwalaho, va lo maha xiboho xa ku nga nyikeli a mali yontlhe, kanilezi va gumesa va wula lezaku va nyikele yontlhe kasi ku vuna vanwani. U zi wonisa kuyini lezi va zi mahileko? —

Kunene, Ananiasi i loya laha a vapostoli va nga hi kona, a ya va nyika mali. Hi lisine, Nungungulu i wa zi tiva lezaku Ananiasi i wa nga nyikeli a mali yontlhe. Hikwalaho, i lo tivisa mupostoli Pedro lezaku lezi Ananiasi a nga kari a zi wula i wo hemba.

Zonake Pedro aku: ‘Ananiasi, hikuyini u tsikileko Satani a ku kucetela ku maha lezi ke? A simu gi wa hi ga wena. U wa nga kurumeteki ku gi xavisa. Niku hambu loku u gi xavisile, zi wa hi le mandleni ka wena lezaku u ta yi maha yini a mali ya kona. Makunu hikuyini u wulako lezaku u nyikele a mali yontlhe kasi lezo a wu nyikelangi yontlhe? A wu hembelangi hina ntsena, kanilezi u hembele na Nungungulu.’

Leyo yi wa hi mhaka ya hombe. Ananiasi i wo hemba! I wa nga mahi lezi a nga wula ku hi zona a mahako, kanilezi i wa mahisa ku khwatsi hi zona. A Biblia gi hi byela lezi zi nga gumesa zi maheka. Gi ngalo: ‘Laha a ngazwa magezu ya Pedro, Ananiasi i lowa lahasi afa.’ Nungungulu i lo mu daya! Anzhako ka lezo, va lo rwala xirumbi xakwe va huma naxo va ya lahla.

Anzhako ka tihora tinharu, Safira i lo chikela. I wa nga zi tivi lezi zi nga humelele nuna wakwe. Hikwalaho, Pedro i lo mu wutisa aku: ‘Mu xavisile a simu hi mali leyi mu hi nyikileko ke?’

Safira i lo hlamula aku: ‘Ina, hi xavisile a simu hi mali yaleyi.’ Kanilezi lawo ma wa hi mawunwa! Va wa pambulile a mali yo kari leyi va nga xavisile a simu va sala nayo. Hikwalaho, Nungungulu i lo daya Safira kambe. — Mitiro 5:1-11.

Hi gonza yini ka lezi zi humeleleko Ananiasi na Safira? — Hi gonza lezaku Nungungulu a nga zi lavi a ku hi hemba. I lava lezaku xontlhe xikhati hi wulawula lisine. Kanilezi, a vanhu vo tala va wula lezaku a zi bihangi a ku hemba. U alakanya lezaku lezi a vanhu lavo va zi wulako lisine futsi? — U wa zi tiva lezaku a mababyi wontlhe, kubayisa, ni kufa laha misaveni zi tile hi kota ya kuhemba? —

Alakanya lezaku, Diabolusi i hembele Eva, a wasati wo sangula. I lo byela Eva lezaku i wa nga tafa loku a tsika ku ingisa Nungungulu aga a hanzu lowu a nga mu byelile lezaku i wa nga faneli kuga. I lo kholwa lezi Diabolusi a nga wula, aga hanzu lowo. Eva i lo gumesa a kucetela Adamu lezaku yenawu aga. A xikhati lexi va nga maha lezo, va lo maha vaonhi, niku vontlhe a vana vabye va wa ta pswaliwa na va hi vaonhi. Niku kota lezi vontlhe a vana va Adamu va nga hi vaonhi, va wa ta xaniseka va tlhela vafa. Xana a kuxaniseka ni zikarato zontlhe zi sangulisile kuyini? — Zi sangulile hi kota ya kuhemba.

Za zwisiseka lezi Jesu a nga wula lezaku Diabolusi ‘muhembi, ni papai wa mawunwa’! Hi yena munhu wo sangula ku hemba. Loku a munhu wo kari a hemba, o maha lezi Diabolusi a nga ranga a maha. Hi fanele ku alakanya lezo loku hi tshuka hi ringiwa ku hemba. — Johani 8:44.

Hi ka ziyimo muni u nga ti zwako na u ringiwa ku hemba? — Hi loku u mahile za kubiha, a hi zona? — Hambu loku u nga zi lavi, u nga tshuka u panza nchumu. Loku u wutisiwa a ku himani a nga panza, xana u fanele ku wula lezaku makabye wa wena? Kutani u fanele ku mahisa ku khwatsi a wu zi tivi a ku zi mahisile kuyini? —

Ahati loku ku hi lezaku u wa fanele ku maha T.P.C. kanilezi u nga mahi yontlhe? Xana u fanele ku wula lezaku u mahile yontlhe, kuveni a wu mbhetangi? — Hi fanele ku alakanya Ananiasi na Safira. A va wulangi lisine lontlhe. Niku Nungungulu i kombile a kubiha ka zona hi ku va daya.

Hikwalaho, kani xini hi mahako, xontlhe xikhati loku hi hemba hi to engetela ku bihisa zilo. A hi faneli ku wula zilo hi siya zinwani. Hi fanele ku wula lisine lontlhe. A Biblia gi ngalo: ‘Wulawulani lisine.’ Gi tlhela giku: “Mu nga hembelani.” Xontlhe xikhati Jehova i wulawula lisine, niku i rinzela lezaku hinawu hi maha zalezo. — Va Le Efesusi 4:25; Va Le Kolosi 3:9.