A mibuzo yontlhe ya mu tsakisa Nungungulu ke?

WA ZI ranza a kuya mibuzweni ke? — A mibuzo yi ngava ni zilo zo tala zo tsakisa. U alakanya lezaku Mugonzisi wa Hombe i wa ta tsaka loku hiya mibuzweni? — Jesu i yile ka mubuzo wa muchado, niku a nga fambangi yece. I fambile ni vapizani vo kari. Jehova i Nungungulu wo tsaka, hikwalaho wa tsaka loku hi maha mibuzo ya yi nene. — Johani 2:1-11.

Lomu ka phajina 29 ya bhuku legi hi tivile lezaku Jehova i avanyisile Bimbi go Pswhuka kasi a vaIsraeli va tsemakanya. Wa zi alakanya lezo ke? — Anzhako ka lezo, a vanhu va lo yimbelela va kina va tlhela va bonga Jehova. Lezo zi wa fana ni mubuzo. A vanhu va wa tsakile nguvu, niku a hi kanakani lezaku Jehova yenawu i wa tsakile. — Eksodusi 15:1, 20, 21.

Loku ku hunzile a xipimo xa 40 wa malembe, a vaIsraeli va loya ka mubuzo wunwani wa hombe. Ka khati legi, a vanhu lava va nga va rambile ne va wa nga khozeli Jehova. Hi lisine, a vanhu lavo va wa khizamela a vanungungulu vanwani niku va wa hlengela masango ni vanhu va kalako va nga chadangi navo. U alakanya lezaku zi wa hi zi nene a kuya ka mubuzo wo fana ni lowo? — Jehova a nga tsakangi hi zona, niku i lo tsayisa a vaIsraeli. — Mitsengo 25:1-9; 1 Va Le Korinte 10:8.

A Biblia gi tlhela gi wulawula hi mibuzo yimbiri ya ku alakanya a siku ga kupswaliwa. Xana a wunwe wa yona wu wa hi wa ku alakanya a siku ga kupswaliwa ka Mugonzisi wa Hombe? — Ahihi. Yontlhe yi wa hi mibuzo ya vavanuna va nga kala va nga tireli Jehova. A wunwe wa yona wu wa hi wa ku alakanya a siku ga kupswaliwa ka Hosi Herodi Antipasi. I wa hi hosi ya muganga wa le Galilea, a xikhati lexi Jesu a nga tshama leyo.

Hosi Herodi i wa maha zilo zo tala zo biha. I wa tekile sati wa makabye wakwe. A vito gakwe i wa hi Herodia. Johani mubapatizi, a nanza ga Nungungulu, i lo byela Herodi lezaku lezi a nga zi mahile zi wa bihile. Lezo a zi mu tsakisangi Herodi. Hikwalaho, i lo valelisa Johani lomu paxweni. — Luka 3:19, 20.

Laha Johani a nga hi paxweni, ku lo chikela siku ga ku alakanya a kupswaliwa ka Herodi. Herodi i lo mahisa mubuzo wa hombe. I lo ramba vanhu vo tala va lisima. Va loga, vanwa va tlhela va tsaka nguvu. Anzhako ka lezo a nhanyana wa Herodia i lota a ta kina. A vanhu vontlhe va nga hi kona va lo tsakisiwa nguvu hi makinela yakwe, zonake Hosi Herodi a lava ku mu nyika xinyikiwo xo hlawuleka. I lo mu byela lezi: “Nzi ta ku nyika ni xihi u xi kombelako, hambu ni khihlanya ga mufumo wa mina.”

I wa ta kombela yini? I wa ta kombela mali? Tinguwo to saseka? Yindlu ya wuhosi? A nhanyana loye i wa nga zi tivi a ku i ta kombela yini. Hikwalaho, i loya ka mamani wakwe, Herodia, a yaku: ‘Nzi kombela yini ke?’

Herodia i wa mu venga nguvu Johani Mubapatizi. Hikwalaho, i lo byela a nhanyana wakwe lezaku a ya kombela a hloko ya Johani. A nhanyana loye i lo tlhela ka hosi a yaku: ‘Nzi lava ku zalezi u nzi nyika a hloko ya Johani Mubapatizi na yi hi lomu ngelweni.’

Hosi Herodi i wa nga zi lavi a ku daya Johani hakuva i wa zi tiva lezaku Johani i wa hi munhu wa mu nene. Kanilezi, Herodi i wa tsumbisile ku mu nyika ni xihi a xi lavako, niku i wa chava lezi zi nga wa ta alakanyiwa hi lava va nga hi laho. Hikwalaho, i lo rumela wanuna wo kari lezaku aya lomu paxweni a ya tsema hloko ya Johani. Na ku nga se hunza xikhati xo leha, a wanuna loye i lo wuya ni hloko ya Johani na yi hi lomu ngelweni, a ta nyika a nhanyana loye. Anzhako ka lezo, a nhanyana loye i lo ya yi nyikela ka mamani wakwe. — Marku 6:17-29.

A mubuzo wunwani wa ku alakanya siku ga kupswaliwa wu kumbukiwako lomu ka Biblia, wonawu wu wa nga hi wu nene. Wu wa hi wa hosi ya Gipite. Ka mubuzo lowo kambe a hosi yi lo leletela lezaku ku tsemiwa hloko ya munhu. Anzhako ka lezo, yi lo laya lezaku a wanuna loye a hayekiwa laha sinyeni kasi a giwa hi zinyanyani! (Genesisi 40:19-22) U alakanya lezaku Nungungulu i yi tsakele a mibuzo leyo ya yimbiri ke? — Na u tsakile loku u wa hi ka mibuzo leyo? —

Ha zi tiva lezaku a zilo zontlhe zi nga lomu ka Biblia zi tsalilwe hi xigelo xo kari. Gi kumbuka a mibuzo yimbiri basi ya ku alakanya a siku ga kupswaliwa. Niku ka yontlhe ya yimbiri, ku mahekile zilo za kubiha. Makunu, u alakanya lezaku Nungungulu i hi gonzisa yini xungetano hi mibuzo ya ku alakanya siku ga kupswaliwa ka munhu? Xana Nungungulu wa zi lava lezaku hi maha mibuzo ya ku alakanya a masiku ya kupswaliwa ka munhu? —

Lisine lezaku inyamutlha a ku tsemiwi tihloko ta vanhu ka mibuzo leyo. Kanilezi, a ku maha mubuzo hi siku ga kupswaliwa ka munhu zi sangulilwe hi vanhu va nga kala va nga khozeli Nungungulu wa lisine. Xungetano hi mibuzo ya ku alakanya siku ga kupswaliwa leyi yi kumbukiwako lomu ka Biblia, a bhuku go kari gi wula lezi: “A vaonhi hi vona voce . . . va nga kari va maha mibuzo, na va tsakela siku legi va nga pswaliwa hi gona.” (The Catholic Encyclopedia) Wa zi lava a ku fana ni vaonhi lavo? —

Ahati Mugonzisi wa Hombe ke? I mahile mubuzo a tsakela siku legi a nga pswaliwa hi gona? — Ahihi. A Biblia a gi wuli nchumu xungetano hi mubuzo wa ku alakanya siku ga kupswaliwa ka Jesu. Hi lisine, a valanzeli vo sangula va Jesu va wa nga mahi a mubuzo wa ku tsakela a siku ga kupswaliwa ka Jesu. Wa zi tiva a ku hikuyini a vanhu va nga gumesa va sangula ku maha mubuzo wa ku alakanya a siku ga kupswaliwa ka Jesu hi siku ga 25 ka Dezembro? —

Ku yimisilwe a siku legi hakuva “a vanhu va le Roma va wa sina va hlayisa a siku legi kota Mubuzo wa maSaturnali, na va alakanya a kutsuwuka ka gambo.” (The World Book Encyclopedia) Hikwalaho, a vanhu va lo hlawula ku alakanya a kupswaliwa ka Jesu hi siku legi gi nga hi feriado ya vanhu va nga kala va nga khozeli Jehova!

Wa zi tiva lezaku hikuyini zi nga kotekiko a kuva Jesu a pswalilwe hi Dezembro? — Hi lezaku a Biblia gi wula a ku a xikhati lexi Jesu a nga pswaliwa ku wa hi ni varisi va zihari lehandle ni wusiku. (Luka 2:8-12) Niku va wa nga ta tshama lahandle xikhatini lexo, hakuva ka tiko legi Jesu a nga pswaliwa ka gona a hweti ya Dezembro i nguva ya xirami ni ya tivula ta hombe.

A vanhu vo tala va zi tiva lezaku a siku ga Khisimuso a hi siku ga kupswaliwa ka Jesu. Niku va zi tiva kambe lezaku ka siku lego, a vanhu va nga khozeliko Jehova va wa maha mubuzo wu nga mu tsakisiko Nungungulu. Hambulezo, a vanhu vo tala va simama kuga Khisimuso. Lexi va xi lavako nguvu ku maha mubuzo wutshanwini ga ku lava ku tiva ku xana Nungungulu i wu wonisa kuyini a mubuzo lowo ke. Kanilezi hina hi lava ku tsakisa Jehova, a hi zona? —

Hikwalaho, loku hi maha mibuzo yi fanele kuva mibuzo ya yi nene, leyi yi mu tsakisako Jehova. Hi nga maha mibuzo leyo ni ka xihi xikhati nzeni ka lembe. A zi lavi a ku hi rinzela siku go kari go hlawuleka. Hi ngaga zakuga za zi nene hi tlhela hi hlakana hi zilo zo tsakisa. Wa zi lava ku maha lezo? — Kuzilava u nga bhula ni vapswali va wena lezaku va ku vuna ku longisela a mubuzo wo kari. Lezo zi nga tsakisa, a hi zona? — Kanilezi, na u nga se sangula ku longisela mubuzo, u fanele ku tiyiseka lezaku a zilo lezo za amukeleka ka Nungungulu ke.