Lomu hi nga kumako kona a kuchavelelwa

WA TSHUKA u bayiseka u tlhela uzwa a xiwunza? — Wa tshuka u ti wutisa lezaku i kona a ku ranzako? — A vanana vo kari va tshuka va ti wutisa. Kanilezi Nungungulu i tsumbisa lezi: “Mina cima nzi nga ta ku rivala.” (Isaya 49:15) Xana a ma tsakisi a magezu lawo? — Hi zona, Jehova Nungungulu wa hi ranza futsi!

A mutsali wo kari wa Biblia i lo wula lezi: “Hambu loku dadani na mamani va nzi tsika, Jehova i ta nzi rola.” (Tisimu 27:10) A ku tiva lezo zi nga hi chavelela, a hi zona? — Ina, Jehova i hi byela lezi: ‘U nga chavi, hakuva nzi na wena; nzi ta ku vunetela.’ — Isaya 41:10.

Hambulezo, ka zikhati zinwani Jehova wa tsika Satani a hi vangela zikarato. A tlhela a mu tsika a ringa malanza Yakwe. Ka khati go kari Diabolusi i lo maha Jesu a xaniseka nguvu laha ka kuza Jesu a rila ka Jehova aku: “Nungungulu wa mina, Nungungulu wa mina, u nzi tsikele yini?” (Mateu 27:46) Hambu lezi Jesu a nga kari a xaniseka, i wa zi tiva lezaku Jehova wa mu ranza. (Johani 10:17) Kanilezi, Jesu i wa zi tiva kambe lezaku Nungungulu wa tsika Satani a ringa malanza Yakwe ni ku mu tsika a ma xanisa. Ka xipimo xinwani xa ha tako hi ta kuma tlhamuselo wa ku hikuyini Nungungulu a tsikako Satani a maha lezo.

Loku hi hi vanana, za olova nguvu ku a zikhati zinwani hi chava. Hi xikombiso, u tshuka u lahleka? — Xana u chavile? — A vanana vo tala va wa ta chava. Ka khati go kari Mugonzisi wa Hombe i lo hlawutela a mufananiso wo kari xungetano hi kulahleka. Kanilezi ku wa nga hi kulahleka ka nwanana. Ku wa hi ka yivu.

Hi tindlela to kari u fana ni yivu. Hikuyini ku nga wuliwako lezaku u fana ni yivu? A xigelo hi lezaku a yivu a yi tiyangi nguvu. Niku a tiyivu ti lava a munhu wo kari lezaku a ti hlayisa a tlhela a ti vikela. A munhu loyi a mahako lezo i vitaniwa ku murisi.

A mufananiso wa Jesu wu wulawula hi murisi loyi a nga hi ni 100 wa tiyivu. Kanilezi ku lo lahleka a yinwe. Kuzilava yi wa lava ku wona lezi zi nga hi ka tlhelo ginwani ga xitsunga. Kanilezi na ku nga se hunza xikhati xo leha, a yivu leyo yi lo hambana nguvu ni leti tinwani. Wa zi alakanyela lezi a yivu leyo yi nga ti zwisa zona a xikhati lexi yi nga cuwuka seno ni seno yi wona lezaku yi yoce? —

Zini lezi a murisi a nga wa ta maha loku a wona lezaku ka kiyela yivu yinwe? I wa ta wula lezaku a yivu hi yona yi nga ni nanzu, zonake a nga karateki hi zona? Kutani i wa ta siya leti ta 99 ka wutshamu ga gi nene zonake a ya lavetela leyi ya yinwe? Xana zi wa ta ringana a ku a karateka nguvu hi kota ya yivu yinwe ntsena? — Loku ku wa hi wena yivu leyo yi lahlekileko, u wa ta tsaka hi kuva a murisi a ku lavetela? —

A murisi i wa ti ranza nguvu a tiyivu takwe tontlhe, hambu leyi ya yinwe yi nga lahlekile. Hikwalaho, i lo famba a lavetela leyi ya yinwe yi nga lahlekile. Hi nga alakanyela lezi a yivu leyo yi nga lahlekile yi nga tsakisa zona a xikhati lexi yi nga wona a murisi wa yona na ata! Niku Jesu i wulile lezaku a murisi i lo tsaka hi kuva a kumile a yivu yakwe. I lo tsaka nguvu hi yona a ku hunza leti tinwani ta 99 ti nga kala ti nga lahlekangi. Makunu, himani loyi a fanako ni murisi ka mufananiso wa Jesu? Himani loyi a hi khatalelako nguvu a kufana ni lezi a murisi a nga maha ka tiyivu takwe? — Jesu i wulile lezaku i Papai wakwe wa le tilweni. Niku a Papai wakwe hi Jehova.

Jehova Nungungulu hi yena Murisi wa Hombe wa vanhu vakwe. I ranza vontlhe lava va mu tirelako, a kupatsa ni vanana vo fana na wena. A nga lavi lezaku a munwe wa hina a bayisiwa kutani ku a lovisiwa. Hakunene za tsakisa a ku tiva lezaku Nungungulu wa khatala nguvu hi hina! — Mateu 18:12-14.

Xana hakunene wa kholwa ka Jehova Nungungulu? — Wa mu wona na a fana ni papai wa wena kutani munhu munwani a ku hlayisako? — Lisine lezaku a hi nge zi koti ku wona Jehova. Hakuva yena i Moya. I na ni miri hi kalako hi nga zi koti ku wu wona. Kanilezi i kona hakunene, niku wa zi kota ku hi wona. Wa zi tiva loku hi lava ku vuniwa. Niku hi nga wulawula naye hi mukhongelo a ku fana ni lezi hi wulawulisako zona ni vanhu vanwani laha misaveni. Jehova i lava lezaku hi wulawula naye hi mukhongelo.

Hikwalaho, loku u tshuka u bayiseka u tlhela uzwa xiwunza, zini u faneleko ku maha? — Wulawula na Jehova. Tshinela kakwe, i ta ku chavelela a tlhela a ku vuna. Alakanya lezaku Jehova wa ku ranza, hambu loku u hi ni xiwunza. A hi vulile a Biblia ga hina. Lomu ka Tisimu 23, hi kuma lezi kusanguleni ka vesi 1: “Jehova hi murisi wa mina, nzi nga ta vumala nchumu. Wa nzi etlelisa mikoveni yo nyuka, wa nzi rangela matini ya malenga.”

Wona lezi a mutsali a engetelako ka vesi 4: “Ina, hambu nzi tsemakanya a nzhelelo wa nzhuti wa kufa, nzi nga ta chava za kubiha, hakuva wena u zinwe na mina; a nhonga ya wena ni chetengelo wa wena za nzi miyeta.” Hi lezi a vanhu va ti zwisako zona loku a Nungungulu wabye ku hi Jehova. Va kuma kuchavelelwa a xikhati lexi va nga zikaratweni. Xana wenawu u ti zwisa lezo? —

A ku fana ni lezi a murisi wa liranzo a khatalelako a tiyivu takwe, Jehova yenawu i va khatalela khwatsi a vanhu vakwe. I va nyika a zileletelo za zi nene, niku va zi lanzela na va tsakile. Hambu loku va hi zikaratweni, a va chavi. A murisi i tirisa nhonga yakwe kasi ku vikela a tiyivu ka zihari lezi zi nga ha lavako ku bayisa tiyivu. A Biblia gi hi byela lezi Davida a nga vikelisa zona a tiyivu takwe ka nghala ni ka urso. (1 Samueli 17:34-36) Niku a vanhu va Nungungulu va zi tiva lezaku Jehova i ta va vikela vonawu. Va nga tizwa na va hlayisekile hakuva Nungungulu i na vona.

Jehova wa ti ranza nguvu a tiyivu takwe, niku i ti khatalela hi liranzo. A Biblia gi ngalo: ‘A ku fana ni murisi i ta risa tiyivu takwe. I ta tsombanyisa a tiyivana mawokweni yakwe, a ti rwala laha xifuveni xakwe.’ — Isaya 40:11.

A zi ku tsakisi a ku tiva lezaku Jehova i tshamisile lezo? — Wa zi lava kuva munwe wa tiyivu takwe? — A tiyivu ti ingisa a gezu ga murisi wa tona. Ti tshama kusuhani naye. Wa mu ingisa Jehova? — Wa tshama kusuhani naye? — Hikwalaho, loku u maha lezo u nga ta tshuka u chava. Jehova i tava na wena.