Xana a tiko gi ta lovisiwa kambe hi ndambi?

WA TSHUKA uzwa wokari na a wulawula hi kugumesa ka tiko ke? — Inyamutlha a vanhu vo tala va wulawula hi zona. A vanhu va wula lezaku a misava yi ta lovisiwa ka yimpi yo kari leyi a vanhu va to tirisa zibhamu za hombe nguvu. U alakanya lezaku Nungungulu i ta tshuka a tsika vanhu va lovisa misava ya hina yo saseka? —

Kota lezi hi gonzileko, a Biblia gi wulawula hi kugumesa ka tiko. Gi ngalo: “A tiko ga hunza.” (1 Johani 2:17) U alakanya lezaku a kugumesa ka tiko zi ta wula a kulovisiwa ka misava? — Ahihi, a Biblia gi wula lezaku Nungungulu i mahile misava kasi yiva “wutshamu go aka kona” — ku nga lezaku a vanhu va hanya ka yona na va tsakile. (Isaya 45:18) A bhuku ga Tisimu 37:29 gi ngalo: “A valulamileko va taga tshomba ya tiko, va aka ka gona kala kupinzuka.” Hi xigelo lexo, a Biblia gi tlhela gi wula lezaku a misava yi ta tshama kala kupinzuka. — Tisimu 104:5; Mutshawuteli 1:4.

Loku a kugumesa ka tiko ku nga wuli a kuloviswa ka misava, makunu ku wula yini? — A hlamulo wa kona hi wu kuma loku hi kambisisa khwatsi lezi zi nga humelela xikhatini xa Noa. A Biblia gi tlhamusela lezi: ‘A tiko legi gi nga hi kona ka xikhati lexo gi lo khulungelwa hi mati gi lova.’ — 2 Pedro 3:6.

I kona a nga pona a kugumesa ka tiko xikhatini xa Ndambi ya hombe, masikwini ya Noa? — A Biblia gi wula lezaku Nungungulu i lo ponisa “Noa, a mukaneli wa kululama, zinwe ni vanwani va ntlhanu ni vambiri, laha a nga neha a ntalo hehla ka tiko ga lava va nga chaviko Nungungulu.” — 2 Pedro 2:5.

Makunu xini xi nga lovisiwa? Misava kutani vanhu vo biha? — A Biblia gi wula ku i “tiko ga lava va nga chaviko Nungungulu.” Niku wona lezaku Noa i vitaniwa a ku “mukaneli” kutani muxumayeli. U alakanya lezaku i wa xumayela yini? — Noa i wa tlharihisa vanhu xungetano hi kugumesa ka ‘tiko legi gi nga hi kona ka xikhati lexo.’

Laha Jesu a nga wulawula hi Ndambi ya hombe, i lo byela a vapizani vakwe lezi a vanhu va nga kari va zi maha na ku nga se chikela kugumesa. I wulile lezi: “Hakuva khwatsi hi lezi [a vanhu] va ngaga, vanwa, va teka, ni ku tekiwa, a masikwini lawo ya mahlweni ka ntalo, ku kala siku lego Noa a nga enghena ha gona lomo tarwini, a va chelangi kota kala wuta ntalo, wu va kukuleta vontlhe.” Jesu i lo gumesa a wula lezaku a vanhu va wa ta maha zo fana ni lezo na ku nga se chikela kugumesa ka tiko legi. — Mateu 24:37-39, Tradução do Novo Mundo.

Hi kuya hi magezu ya Jesu, lezi a vanhu va nga kari va maha a Ndambi na yi nga se chikela, zi nga hi gonzisa zilo za lisima. Wa zi alakanya lezi a vanhu va nga kari va maha xikhatini lexo ke, kota lezi hi zi wonileko lomu ka Xipimo 10 xa bhuku legi? — A vavanuna vo kari va wa maha wugevenga go tshisa nguvu. Kanilezi, a vanwani kota lezi Jesu a nga wula, a va ingisangi a xikhati lexi Nungungulu a nga rumela Noa lezaku a ya va xumayela.

Makunu ku lo chikela a xikhati lexi Jehova a nga byela Noa lezaku i wa lava ku lovisa vanhu vo biha hi ndambi. A mati ma wa ta fenengeta misava yontlhe ni zitsunga. Jehova i lo byela Noa lezaku a aka taru kutani ngalava ya hombe. A taru lego gi wa fana ni kaxa go leha, kota lezi wu kombako a mufota wu nga ka phajina 238.

Nungungulu i lo byela Noa lezaku a aka taru ga hombe nguvu ga ku ringana ku nghena yena, ngango wakwe ni zihari zo tala; kasi va pona. Noa ni ngango wakwe va lo tira hi ku ti karata. Va lo tsema tisinya ta hombe, va teka mapulango ya kona va maha hi wona a taru. Lezo zi mbhetile malembe yo tala hakuva a taru gi wa hi ga hombe nguvu.

Wa zi alakanya a ku zini zinwani lezi Noa a nga kari a zi maha ka malembe wontlhe lawa a nga mbheta na a aka taru?— I wo xumayela, a tlharihisa vanhu xungetano hi Ndambi leyi yi nga kari yita. I kona a nga ingisa a xitlharihiso lexo? I hava a nga ingisa, ntsena a ngango wa Noa. A vanhu vanwani va wa khomekile hi ku maha zinwani. Wa zi alakanya lezi Jesu a nga wula ku hi zona va nga kari va maha? — Va wa khomekile hi kuga, kunwa ni ku chada. Va wa nga alakanyi lezaku va wa bihile, niku a va ti nyikangi xikhati xa ku ingisela Noa. Makunu a hi wone lezi zi nga gumesa zi va humelela.

Anzhako ka kuva Noa ni ngango wakwe va nghenile lomu tarwini, Jehova i lo vala livati la taru. Lava va nga hi lahandle ka taru va lo simama va nga kholwi lezaku a Ndambi yi tata. Kanilezi, hi xitshuketi ku lo sangula kuna vula ya hombe nguvu! Ku wa nga hi vula yo toloveleka. Ku wa hi vula ya hombe nguvu! A mati ma lo tekela ku tala ma maha micongo ya hombe, ma tlhela ma vanga guwa ga hombe. Ma lo wisetela tisinya ta hombe ma tlhela ma wumbulutela maribye ya hombe a ku khwatsi mo wumbulutela ziribyana. Ahati lava va nga hi lahandle ka taru ke? Zini zi nga va humelela? — Jesu i te ngalo: ‘A ntalo wu lota, wu ta va kukuleta vontlhe.’ Vontlhe va nga hi lahandle ka taru va lofa. Hikuyini? — Jesu i wulile lezi: “A va chelangi kota.” A va ingisangi! — Mateu 24:39, NM; Genesisi 6:5-7.

Alakanya ku Jesu i wulile lezaku lezi zi humeleleko a vanhu lavo, zi hi gonzisa zilo za lisima inyamutlha. Zini hi zi gonzako? — A vanhu lavo a va lovisiwangi hi kota ya kubiha kabye ntsena, kanilezi hi lezi a votala va nga khomekile nguvu, laha ka kuza va nga kumi ni xikhati xa ku gonza xungetano hi Nungungulu ni lezi a nga wa ta zi maha. Hi fanele ku ti wonela kasi hi nga tshuki hi fana navo, a hi zona? —

U alakanya lezaku Nungungulu i ta tlhela a lovisa tiko hi ndambi? — Ahihi, Nungungulu i tsumbisile lezaku a nga ta ha lovisa misava hi ndambi. I lo wula lezi: ‘Nza yimisa a wura ga mina ga nyazimu le marefini, giva xikombiso.’ Jehova i lo wula lezaku a wura ga nyazimu, gi wa tava xikombiso xa lezaku “a mati ma nga ta ha maha a ntalo wa ku lovisa a nyama yontlhe.” — Genesisi 9:11-17.

Hikwalaho, hi nga tiyiseka lezaku Nungungulu a nga ta ha tshuka a lovisa tiko kambe hi ndambi. Hambulezo, kota lezi hi zi wonileko, a Biblia gi wulawula hi kugumesa ka tiko. A xikhati lexi Nungungulu a to lovisa tiko legi, hi vamani a to va ponisa? — Xana i ta ponisa a vanhu lava va nga kari va khatalela zinwani, va nga lavi ku tiva nchumu xungetano hi Nungungulu? Kutani lava xontlhe xikhati va nga kala va nga ti nyiki xikhati xa ku gonza a Biblia? Hi wahi mawonela ya wena? —

Hi lava kuva xikari ka lava Nungungulu a to va ponisa, a hi zona? — Zi wa nga ta tsakisa loku a ngango wa hina wu fana ni wa Noa kasi Nungungulu a hi ponisa hontlheni? — Kasi a hi ponisa kugumeseni ka tiko legi, hi fanele ku tiva lezi Nungungulu a to gi lovisisa zona, ni lezi a to maha kasi ku tisa misava yiswa ya kululama. A hi wone lezi a to zi mahisa zona.

A Biblia gi hi nyika hlamulo ka Danieli xipimo 2, vesi ga 44. A vesi legi gi wulawula hi xikhati lexi hi hanyako ka xona loku giku: “A masikwini ya tihosi leto, Nungungulu wa le tilweni i ta vuxa a mufumo wu to kala wu nga lobyiswi, ni wuhosi ga wona cima gi nga ta nyikelwa ka ginwani tiko. Wu ta panza wu lovisa yontlhe mifumo leyi, wona wu ku tsonzoma kala kupinzuka.”

Wa zi tiva a ku zi wula yini lezo? — A Biblia gi wula lezaku a mufumo wa Nungungulu wu ta lovisa a mifumo yontlhe ya laha misaveni. Hikuyini? — Hakuva a mifumo yontlhe ya laha misaveni a yi mu ingisi loyi Nungungulu a mu yimisileko kota Hosi. Himani munhu wa kona? — Hi zona, hi Jesu Kristu!

Jehova i na ni fanelo ya ku hlawula a mufumo lowu wu faneleko ku fuma, niku i hlawulile N’wana wakwe, Jesu, lezaku a maha Hosi. Lokuloku Jesu Kristu, ku nga Hosi leyi Jehova a yi hlawulileko, hi yena a to rangela a xikhati lexi ku to lovisiwa a mifumo yontlhe ya tiko legi. A Biblia, ka bhuku ga Kuvululelwa xipimo 19, mavesi 11 kala 16, gi wulawula hi yena na a lovisa a tihosi leto, kota lezi u zi wonako laha ka mufota lowu. Lomu ka Biblia, a yimpi ya Nungungulu leyi yi to lovisa a mifumo yontlhe ya tiko yi vitaniwa ku i Har–Magedoni.

Makunu, Nungungulu i wula lezaku a Mufumo wakwe wu ta lovisa a mifumo ya vanhu. Kanilezi, yena wa hi byela lezaku hi lovisa a mifumo leyo? — Ahihi, lomu ka Biblia, a Har–Magedoni yi vitaniwa a ku “kulwa ka siku lego ga hombe ga Nungungulu wa Ntamu-wontlhe.” (Kuvululelwa 16:14, 16) Ina, a Har–Magedoni i yimpi ya Nungungulu, niku i ta tirisa Jesu Kristu lezaku ava yena murangeli wa tingelosi kulweni loko. Xana a yimpi ya Har–Magedoni yi laha kusuhani? A hi wone a hlamulo wa kona.