“Fambani, Mu . . . Maha Vapizani”

1-3. (a) Zini lezi a murimi wo kari a zi mahako loku a mavele ma pfunile nguvu lezaku a ma hlengeleta yece? (b) Xikarato muni lexi Jesu a tlhanganako naxo kusanguleni ka ximumu xa 33 Nguveni ya Hina, niku xana i yimisanisa kuyini naxo?

A MURIMI i yimisana ni xikarato. Ka tihweti to sangula, i rimile masimu yakwe a tlhela a byala timbewu. I wa cuwukela hi kukhatala ka hombe a xikhati lexi a matluka yo sangula ma nga tlhava, zonake a tsaka laha a timbewu ti nga buva. Makunu a ntiro wakwe wontlhe a wu mahileko hi ntamu wu chachazelwe, hakuva a xikhati xa kutshovela xi chikele. A xikarato xakwe hi lexi: A mavele ma pfunile nguvu lezaku a ma hlengeleta yece. Kasi ku yimisana ni xikarato lexi, hi wutlhari i boha ku thola vatiri vo kari zonake a va rumela masinwini yakwe. A mhaka hi lezaku, kova ni xikhati xa ku hlengeleta a mavele yakwe ya lisima ntsena.

² Kusanguleni ka ximumu xa 33 Nguveni ya Hina, Jesu loyi a vuxilweko hi ka vafileko i yimisana ni xikarato xo fana. Nzeni ka wutireli gakwe ga laha misaveni, yena i lo byala timbewu ta zinene. Makunu ku na ni pfuno wu lavako ku tshovelwa, niku a mavele ma tele. A vanyingi lava va vumelako va lava ku hlengeletwa kota vapizani. (Johani 4:35-38) Xana Jesu i yimisanisa kuyini ni xikarato lexi? Le hehla ka xitsunga le Galilea, xikhatanyana mahlweni ka kuva a tlakukela tilweni, yena i nyika vapizani vakwe a ntiro wa ku lava vatiri vanwani, aku: “Fambani, mu va maha vapizani a matiko wontlhe, mu va bapatiza . . . , mu va gonzisa a ku gonga zontlhe lezi nzi mu layileko zona.” — Mateu 28:19, 20.

³ A ntiro lowo hi wona wu nga tshinya ga lezi zi wulako kuva mulanzeli wa lisine wa Kristu. Makunu, a hi kambisiseni ziwutiso zinharu. Hikuyini Jesu a tivisileko a ntiro wu lavako vatiri vanwani? Xana i gonzisisile kuyini vapizani vakwe a ku kuma vatiri lavo? Xana hina hi patsekisa kuyini ntirweni lowo?

Hikuyini Ku Nga Laveka Vatiri Vanwani

4, 5. Hikuyini Jesu a nga wa ta kala a nga mbheti a ntiro lowu yena a wu sangulileko, niku mbamani lava va nga wa ta wu yisa mahlweni anzhako ka kuva a tlhelele tilweni?

⁴ A xikhati lexi Jesu a nga sangula wutireli gakwe hi 29 Nguveni ya Hina, i wa zi tiva lezaku i wa sangula ntiro lowu yena a nga wa ta kala a nga wu mbheti yece. Ka xikhati xi tsongwani lexi a nga hi laha misaveni, wutshamu gitsongwani legi a nga wa ta gi eneta ni ntsengo wutsongwani wa vanhu lava a nga wa ta va chikelela hi mahungu ya Mufumo. Hakunene, i kongomisile a kuxumayela kakwe nguvunguvu ka vaJuda ni ka vaproselita, va nga “tiyivu ti lahlekileko ta yindlu ya ka Israeli.” (Mateu 15:24) Hambulezo, a ‘tiyivu leto ti lahlekileko’ ti wa hangalakile tikweni gontlhe ga Israeli, a tiko gi tlhanganyisako makume ya mazana ya tikilometro. Ahandle ka lezo, a tiko gontlhe legi gi nga sele hi magumo gi wa ta chikelelwa hi mahungu yo saseka. — Mateu 13:38; 24:14.

⁵ Jesu i wa zi tiva lezaku a ntiro wo tala wu wa ta sala wu mahiwa anzhako ka kufa kakwe. Ka vapostoli vakwe va 11 vo tsumbeka, i te ngalo: “Hizinene nziku ka nwina: Loyi a kholwako ka mina, yenawu i ta maha mitiro leyi nzi yi mahako; ni mitiro ya hombe yo hunza leyi i ta yi maha, hakuva nziya ka Dadani.” (Johani 14:12) Kota lezi a N’wana a nga kari a tlhelela tilweni, a valanzeli vakwe — na ku nga hi vapostoli ntsena kanilezi ni vontlhe lava va nga wa ta maha vapizani ka xikhati xi tako — ​va wa ta simama ni ntiro wa kuxumayela ni kugonzisa. (Johani 17:20) Jesu hi kutikoramisa i zi tivile lezaku a mitiro yabye yi wa tava “ya hombe yo hunza” leyi yakwe. Hi ndlela muni? Hi tindlela tinharu.

6, 7. (a) Xana a mitiro yi mahilweko hi valanzeli va Jesu yi wa tava ya hombe yo hunza leyi yakwe hi tindlela muni? (b) Xana hi nga kombisa kuyini lezaku a kutsumba ka Jesu ka valanzeli vakwe ku wa nga hi kuluza?

⁶ Yo sangula, a valanzeli va Jesu va wa ta tlhanganyisa a wutshamu ga hombe. Inyamutlha, a wukustumunyu gabye ga chikelela a magemeta-musi ya misava, ka kule nguvu ni mimbhingano ya tiko legi Jesu wutsumbu a xumayeleko ka gona. Ya wumbiri, vona va wa ta chikelela vanhu vanyingi. A ntlawa wutsongwani wa vapizani lava Jesu a va siyileko wu lo kula hi kuhatlisa wu maha makume ya mazana. (Mitiro 2:41; 4:4) Zalezi vona va wumba timiliyoni, niku a mazana ya makume ya mazana ya vanhu va vaswa va bapatizwa lembe ni lembe. Ya wunharu, vona va wa ta xumayela hi xikhati xo leha nguvu — kala nyamutlha, laha ku hunzako a xipimo xa 2.000 wa malembe anzhako ka kugumesa ka wutireli ga Jesu ga malembe manharu ni khihlanya.

⁷ Jesu i wa kombisa kutsumba a ka valanzeli vakwe a xikhati lexi a nga wula lezaku vona va wa ta “maha mitiro ya hombe yo hunza leyi.” Yena i wa veka mandleni yabye a ntiro lowu wu nga hi wa lisima nguvu kakwe, wa ku xumayela ni ku gonzisa “a ivangeli ya mufumo wa Nungungulu.” (Luka 4:43) I wa tiyisekile lezaku vona va wa ta tatisa xiavelo lexo hi kutsumbeka. Xana lezo zi wula yini ka hina inyamutlha? A xikhati lexi hi tatisako a wutireli ga hina hi kupinyama ni mbilu yontlhe, hi komba lezaku a kutsumba ka Jesu ka valanzeli vakwe ku wa nga hi kuluza. Xana legi a hi lungelo go hlawuleka nguvu? — Luka 13:24.

Va Gonzisilwe Lezaku Va Nyika Wukustumunyu

8, 9. Hi xihi xikombiso lexi Jesu a xi nyikileko wutirelini, niku xana hina hi nga xi lanzelisa kuyini wutirelini ga hina?

⁸ Jesu i nyikile vapizani vakwe a gonziselelo ya wuchukwana hi laha zi kotekako ha kona xungetano hi wutireli. Nguvunguvu i lo va nyika xikombiso xo mbhelela. (Luka 6:40) Ka xipimo lexi xa ha hi ku hunzako, hi wulawulile hi mawonela yakwe xungetano hi wutireli. Hi xikhatanyana, alakanyela a vapizani lava va nga fambafamba na Jesu maenzweni yakwe ya kuxumayela. Vona va wonile lezaku yena i wa xumayela kontlhe lomu ku nga kumeka vanhu — lomu timbhirini ta mativa ni minzhelelweni ya zitsunga, lomu madoropeni ni mabazarini, ni lomu mitini. (Mateu 5:1, 2; Luka 5:1-3; 8:1; 19:5, 6) Va wonile lezaku yena i wa hi mutiri wa kutitsitsirita, na a vuka na ga ha hi mixo nguvu zonake a tira kala giva wusiku nguvu. A ka yena, a wutireli gi wa nga hi kutihungata! (Luka 21:37, 38; Johani 5:17) Handle ko kanakana va zi wonile lezaku yena i wa kuciwa hi liranzo lo eta nguvu hi vanhu. Kuzilava va wonile nghoheni yakwe a zikombiso za kuzwela wusiwana loku a nga kuzwa mbilwini yakwe. (Marku 6:34) Xana u alakanya lezaku a xikombiso xa Jesu xi khumbisile kuyini a vapizani vakwe? Xana wena u wa ta ngha u khumbekisile kuyini?

⁹ Kota valanzeli va Kristu, hi lanzela xikombiso xakwe wutirelini ga hina. Hikwalaho, hi maha zontlhe lezi hi zi kotako kasi ku “kanela” hi kumbhelela. (Mitiro 10:42) A ku fana na Jesu, hi enzela vanhu lomu mitini yabye. (Mitiro 5:42) Hi zwananisa a longoloko wa hina, loku zi laveka, kasi hi va enzela hi xikhati lexi kuzilava va talako kuva mitini. Hi tlhela hi hlota vanhu ni ku va xumayela hi wukheta kubaseni — lomu maruweni, maparki, zitolo, ni lomu mitirweni. Hi simama ku ‘tira ni kulwa’ wutirelini, hakuva ha khatala nguvu hi ntiro wa hina. (1 Timote 4:10) A ku ranza vanwani hi kuetileko ni hi mbilu yontlhe ku hi susumeta lezaku hi simama ku hlota tindlela ta ku xumayela ka xikhati xihi ni xihi ni ka wutshamu gihi ni gihi lomu a vanhu va nga kumiwako kona. — 1 Va Le Tesalonika 2:8.

10-12. Hi zihi zigonzo za lisima lezi Jesu a gonzisileko a vapizani vakwe mahlweni ka ku va ruma lezaku va ya xumayela?

¹⁰ A yinwani ndlela leyi Jesu a gonzisileko a vapizani vakwe ha yona ku wa hi ku va nyika zileletelo zo tala. Mahlweni ka kuva a rumele a 12 wa vapostoli niku hi nzhako a ruma 70 wa vapizani lezaku va ya xumayela, Jesu i fambisile mitlhangano na vona, a va nyika zileletelo zo tala xungetano hi ntiro wa kuxumayela. (Mateu 10:1-15; Luka 10:1-12) A gonziselelo leyo yi bhinzulile mihanzu ya yi nene, hakuva Luka 10:17 ga bika: “Lava va 70 va lo wuya hi kutsaka.” A hi kambisiseni a zigonzo zimbiri za lisima xikari ka lezi Jesu a zi gonzisileko, hi tiva lezaku a magezu yakwe ma fanele ku zwisisiwa kuyini maringano ni mikhuwo ya xiJuda ya zikhati za kutsaliwa ka Biblia.

¹¹ Jesu i gonzisile vapizani vakwe lezaku va tsumba Jehova. Yena i va byelile lezi: “Mu nga weleli mali ya nzalama ni siliva ni suku lomu mabhandeni ya nwina. Mu nga teki kwama pfhumbeni ga nwina, hambu mabhaji mambiri, hambu zilato ni nhonga; hakuva a xitiri xi fanelwe hi kuga ka xona.” (Mateu 10:9, 10) Zi wa tolovelekile lezaku a vaenzi va famba ni libhandi lo welela hi lona mali, a nkwama kasi ku chela kona timbuva, ni patswa wunwani wa zilato.a Hi ku gonzisa vapizani vakwe lezaku va nga karateki hi zilo lezo, hi lisine Jesu i wa kari aku: “Vekani kutsumba ka nwina ka Jehova hi kumbhelela, hakuva yena i ta khatalela a zilaveko za nwina.” Jehova i wa ta va wundla hi ku kuca lava va nga kari va vumela a mahungu yo saseka lezaku va va rurela, lezi zi nga hi tolovelo le Israeli. — Luka 22:35.

¹² Jesu kambe i gonzisile vapizani vakwe lezaku va potsa zilo zi nga lavekiko lezi zi pengisako mapimo. I te ngalo: “Mu nga losi munhu ndleleni.” (Luka 10:4) Xana Jesu i wa va byela lezaku va ngavi ni wunghana kutani ku nga khatali hi munhu? Kokwihi! Zikhatini za kutsaliwa ka Biblia, hi tolovelo a ku losa zi wa patsa zo tala a ku hunza a ku wula ku xewe ntsena. A ku losa ko toloveleka ku wa patsa ku ambisa mahungu hi kulanza mikhuwo yo tsalangana ni mabhulo yo leha. A tlhari yo kari ya ku hlola Biblia yi wula lezi: “A kulosana xikari ka vanhu va le Mutsuwuka-gambo ku wa nga fanani ni ka vanhu va mudawuko wa le Mupela-gambo, ku nga ku koramanyana, kutani ku khomana mandla, kanilezi va wa losana hi kuangarelana, ni ku koramisa hloko, hambu ni ku barama lahasi. Zontlhe lezi zi wa lava xikhati xo leha.” Hi ku byela vapizani vakwe lezaku va nga losi munhu, Jesu hi lisine, i wa wula lezi: “Mu fanele ku tirisa khwatsi a xikhati xa nwina, hakuva a mahungu lawa mu nga nawo nja xihatla.”b

13. Hi tindlela muni leti hi nga kombisako ha tona lezaku hi lanzela hi mbilu yontlhe a zileletelo lezi Jesu a nyikileko vapizani vakwe va zana go sangula ga malembe?

¹³ Hi lanzela hi mbilu yontlhe a zileletelo lezi Jesu a nyikileko vapizani vakwe va zana go sangula ga malembe. Hi ku yisa a wutireli ga hina mahlweni, hi veka a kutsumba ka hina ko mbhelela ka Jehova. (Mavingu 3:5, 6) Ha zi tiva lezaku hi nga ta tshuka hi kiyelelwa hi zilaveko za wutomi loku hi simama ku ‘lava mufumo wakwe.’ (Mateu 6:33) A vaxumayeli va Mufumo va xikhati xontlhe misaveni yontlhe va zi kota ku kustumunya lezaku hambu zikhatini zo nonoha, a woko ga Jehova cima a gi komangi. (Tisimu 37:25) Hinawu ha zi tiva lezaku hi fanele ku potsa zilo zi pengisako mapimo. Loku hi nga ti woneli, a mafambisela lawa ya zilo ma nga zi kota ku hi hambukisa hi kuolova. (Luka 21:34-36) Hambulezo, lexi a hi xikhati xa ku hambukiswa. Kota lezi a wutomi ga vanhu gi nga mhangweni, a mahungu ya hina nja xihatla. (Va Le Roma 10:13-15) A ku hlayisa xihatla mbilwini ya hina zi ta hi vikela lezaku hi nga vumeleli a zihambukiso za tiko legi ziga xikhati ni ntamu lezi zi nga wa ta tiriselwa khwatsi wutirelini. Alakanya, a xikhati lexi xi seleko xi tsongwani niku a kutshovela ka hombe. — Mateu 9:37, 38.

Ntiro Lowu Wu Patsako Na Hina

14. Zini zi kombako lezaku a ntiro lowu wu tsalilweko ka Mateu 28:18-20 wu tira ka valanzeli vontlhe va Kristu? (Wona kambe a tlhamuselo wa lahasi.)

¹⁴ Hi magezu “fambani, mu . . . maha vapizani,” Jesu loyi a vuxilweko hi ka vafileko i lo nyika a wutihlamuleli go binza a valanzeli vakwe. Yena i wa nga alakanyeli ntsena a vapizani lava va nga hi kona ka siku lego laha xitsungeni le Galilea.c A ntiro lowu a va nyikileko wu patsa a ku chikelela vanhu va “matiko wontlhe,” ni kuva wu simama “na kona kugumelweni ka xikhati.” Hi laha ku dlunyatekileko, a ntiro lowu wu tira ka valanzeli vontlhe va Kristu, a ku patsa na hina inyamutlha. A hi kambisiseni khwatsi a magezu ya Jesu lawa ma tsalilweko ka Mateu 28:18-20.

15. Hikuyini ku hi wutlhari a kuva hi ingisa a kulaya ka Jesu ka ku maha vapizani?

¹⁵ Mahlweni ka kuva a nyika ntiro lowo, Jesu i te ngalo: “Wu nyikilwe ka mina a ntamu wontlhe a tilweni ni laha misaveni.” (Vesi 18) Xana Jesu i na ni ntamu lowo wa hombe hakunene? Ina! Yena i ngelosi ya hombe, yi rangelako mazanazana ya mazana ya tingelosi. (1 Va Le Tesalonika 4:16; Kuvululelwa 12:7) Kota “hloko ya bandla,” i na ni ntamu hehla ka valanzeli vakwe. (Va Le Efesusi 5:23) Kusukela 1914, wa fuma kota Hosi ya wuMessia le tilweni. (Kuvululelwa 11:15) A ntamu wakwe wu chikela hambu ni le xilahleni, hakuva i na ni wuzikoti ga ku vuxa vafileko. (Johani 5:26-28) Hi ku sangula a wulawula hi ntamu wakwe wa hombe, Jesu i komba lezaku a magezu ma lanzelako a hi yo nyika mawonela kanilezi nja kulaya. Wutlhari a kuva hi ingisa, hakuva a ntamu wakwe a hi wa ku ti nyika ha yece kanilezi i nyikilwe hi Nungungulu. — 1 Va Le Korinte 15:27.

16. Hi ku hi byela a ku “fambani,” xini lexi Jesu a nga kari a hi laya ku maha, niku xana hi tatisisa kuyini a tshamela legi ga ntiro?

¹⁶ Jesu makunu i nyika a xileletelo xa ntiro, lexi xi sangulako hi gezu ginwe: “Fambani.” (Vesi 19) Hi ndlela leyo yena i hi laya lezaku hi sangula hi hina hi yela vanwani ni mahungu ya Mufumo. Hi ku tatisa a tshamela legi ga ntiro, hi nga ha tirisa a tindlela to hambanahambana. A ku xumayela hi muti-ni-muti i ndlela yi humelelako nguvu ya ku angula vanhu hi munwe ni munwe. (Mitiro 20:20) Hina kambe hi hlota a zikhati zi faneleko lezaku hi nyika wukustumunyu ga xitshuketi, ha navela nguvu a ku sangula bhulo xungetano hi mahungu yo saseka kwihi ni kwihi lomu ku faneleko wutomini ga hina ga siku ni siku. A tindlela ta hina ta kuxumayela ti nga hava to hambanahambana, ti zi kotako ku zwananiswa ni zilaveko ni matshamela ya lomu xipanzeni. Hambulezo, ku na ni nchumu wunwe wu nga ciciko: Hi ‘famba’ hi hlota lava va faneleko. — Mateu 10:11.

17. Xana hi “maha vapizani” hi ndlela muni?

¹⁷ Hi kulanzela, Jesu i tlhamusela a khungo ga ntiro, ku nga ku “maha vapizani a matiko wontlhe.” (Vesi 19) Xana hi “maha vapizani” hi ndlela muni? Hi lisine la kona, a mupizani xigonzani, loyi a gonzisiwako. Hambulezo, a ku maha vapizani a hi ntsena ku nyika wutivi vanwani. A xikhati lexi hi gonzako a Biblia ni lava va tsakelako, a khungo ga hina ku va vuna lezaku va maha valanzeli va Kristu. Ka xikhati xontlhe lexi zi kotekako, hi khanyisa a xikombiso xa Jesu kasi a zigonzani za hina zi gonza a ku mu wona kota Mugonzisi ni Xikombiso xabye, zi hanya hi ndlela leyi a hanyileko ha yona ni ku maha a ntiro lowu a wu mahileko. — Johani 13:15.

18. Hikuyini a kubapatizwa ku hi ximaho xa lisima nguvu wutomini ga mupizani?

¹⁸ A xipanze xa lisima ntirweni lowu xi tlhamuselwa ka magezu lawa: “Mu va bapatiza hi vito ga Dadani ni ga N’wana ni ga Moya wa ku Basa.” (Vesi 19) A kubapatiza ximaho xa lisima nguvu wutomini ga mupizani, hakuva xikombiso xi faneleko xa kutihendleleta kakwe hi mbilu yontlhe ka Nungungulu. Hikwalaho, ka lisima kasi ku hanyiswa. (1 Pedro 3:21) Ina, hi ku simama ku maha lezi a zi kotako ntirweni wa Jehova, a mupizani loyi a bapatizilweko wa zi kota ku languta mahlweni a wona a makatekwa ma nga gumelwiko misaveni yiswa leyi yi tako. Xana u vunile wo kari lezaku ava mupizani a bapatizilweko wa Kristu? Wutirelini ga wuKristu, a ku na litsako la hombe a ku hunza lezo. — 3 Johani 4.

19. Zini lezi hi gonzisako vanhu va vaswa, niku hikuyini hi faneleko ku simama hi va gonzisa anzhako ka kuva va bapatizilwe?

¹⁹ Jesu i tlhamusela a xipanze xi lanzelako xa ntiro, hi ku wula lezi: “Mu va gonzisa a ku gonga zontlhe lezi nzi mu layileko zona.” (Vesi 20) Hi gonzisa a vanhu va vaswa lezaku va lanzela a kulaya ka Jesu, a ku patsa ni zileletelo za ku ranza Nungungulu, ku ranza muakelane, ni kuva vamahi va vapizani. (Mateu 22:37-39) Hiya mahlweni hi va gonzisa a ku tlhamusela a zinene za Biblia ni ku vikela a kukholwa kabye ku kulako. Loku vona va ringanelwa hi ku hlengela ntirweni wa laha kubaseni wa kuxumayela, hi tira navo, hi va gonzisa hi magezu ni xikombiso lezi va nga hlengelisako zona ntirweni lowu hi kuhumelela. A ku gonzisa a vapizani vaswa a zi mbheli mahlweni ka kubapatizwa kabye. Lava va ha hiko ku bapatizwa va nga ha lava a kugonziswa ko engeteleka kasi ku va vuna lezaku va yimisana ni zikarato zi patsekako kulanzeleni ka Kristu. — Luka 9:23, 24.

“Nzi Na Nwina A Masiku Wontlhe”

20, 21. (a) Kutatiseni ka ntiro wa Jesu, hikuyini hi nga hiko na xigelo xa ku chava? (b) Hikuyini lexi xi nga hiko xikhati xa ku loloha, niku ku fanele kuva kwihi a kutiyimisela ka hina?

²⁰ A magezu yo gumesa ya ntiro wa Jesu ma na ni kutiyisa ka hombe nguvu: “Mangabye, nzi na nwina a masiku wontlhe, na kona kugumelweni ka xikhati.” (Mateu 28:20) Jesu wa zi tiva lezaku a xiavelo lexi xi na ni lisima nguvu. Yena kambe wa zi tiva lezaku a ku xi tatisa za tshuka zi vanga tihanyi ka vakaneti. (Luka 21:12) Hambulezo, a ku na xigelo xa ku chava. A Murangeli wa hina a nga rinzeli lezaku hi tatisa a xiavelo lexi na hi nga vuniwi kutani na hi hi hoce. Xana a zi tangalisi a ku tiva lezaku Loyi a nga ni “ntamu wontlhe a tilweni ni laha misaveni” i na hina kasi ku hi vuna a ku tatisa a ntiro lowu?

²¹ Jesu i tiyisile vapizani vakwe lezaku i wa tava na vona wutirelini gabye hi mazana ya malembe kala “kugumelweni ka xikhati.” Ku kala a kugumesa ku chikela, hi fanele ku simama hi tatisa a ntiro wa Jesu. Lexi a hi xikhati xa ku loloha. A kutshovela ka hombe ka moya kuya mahlweni! Lava va vumelako vaya mahlweni va tlhanganyiswa hi ntsengo wa hombe. Kota valanzeli va Kristu, a hi ti yimiseleni a ku tatisa a ntiro lowu wo binza hi nyikilweko wona. Ngha hi ti yimisela a ku tirisa xikhati xa hina, ntamu, ni titshomba ta hina lezaku hi tatisa kulaya ka Kristu: “Fambani, mu . . . maha vapizani.”