Timote i wa lava ku vuna vanhu

Timote i wa hi jaha legi gi nga tsakela ku vuna vanhu. Yena i enzele matshamu yo tala kasi ku vuna vanhu. Hi kota ya lezo, i vile ni wutomi go tsakisa nguvu. Xana wa zi lava kuzwa zokari xungetano hi zona? — 

Timote i kulele doropeni gi vitwako Listra. Na a ha hi mutsongwani, a kokwani wakwe Loisi ni mamani wakwe Eunike, va lo sangula ku mu gonzisa hi Jehova. A xikhati lexi a nga kula, Timote i wa lava ku vuna vanhu lezaku va gonza hi Jehova.

Loku Timote a ha hi jaha, Paule i lo mu kombela lezaku va enza zinwe kasi ku ya xumayela ka matshamu manwani. Timote i te ngalo: ‘Nza vumela!’ Yena i wa longile ku famba a vuna vanhu.

Timote i lo enza na Paule vaya Makedonia, le doropeni gi vitanwako Tesalonika. Kasi ku chikela seyo, vona va fambile pfhuka wo leha nguvu hi milenge va tlhela va khilela ngalava. Loku va chikele, vona va vunile vanhu vo tala lezaku va gonza hi Jehova. Kanilezi a vokari va lo va zangarela va tlhela va lava ku va mahela kubiha. Hikwalaho, Paule na Timote va lo ya xumayela matshanwini manwani.

Anzhako ka tihweti to kari, Paule i lo kombela Timote lezaku a tlhela Tesalonika kasi ku ya tiva a kuvuka ka vamakabye. Zi wa lava a kutiya-hlana ka hombe kasi ku tlhela doropeni lego ga mhango! Kanilezi Timote i tlhelile hakuva i wa karatekela a vamakabye. Yena i wuyile ni mahungu yo tsakisa ka Paule. A vamakabye va le Tesalonika va wa ha vukile khwatsi!

Hi malembe yo tala, Timote i tirile zinwe na Paule. Ka khati go kari, Paule i tsalile lezaku Timote i wa hi munhu wa chukwana kasi ku mu rumela a ku ya vuna mabandla. Timote i wa ranza Jehova ni vanhu.

Xana wa ranza vanhu u tlhela u lava ku va vuna lezaku va gonza hi Jehova? — Loku u maha lezo, u tava ni wutomi go tsakisa, a ku fana na Timote!